“Kev Nrhiav Tsev Neeg zaj Keeb Kwm Pab Peb cov Poj Koob Yawm Txwv,” Liyahaunas, Kaum Ob Hlis Ntuj 2021
Zaj Lus hauv Liyahaunas Txhua Hli, Kaum Ob Hlis Ntuj 2021
Kev Nrhiav Tsev Neeg zaj Keeb Kwm Pab Peb cov Poj Koob Yawm Txwv
Tsev neeg zaj keeb kwm yog kev nrhiav thiab kev kawm txog peb tsev neeg. Peb kuj nrhiav xov xwm txog peb cov poj koob yawm txwv peb thiaj li ua tau hauj lwm pab lawv hauv lub tuam tsev.
Yuav tsum muaj tej tsev neeg thiaj li muaj raws li Leej Txiv Saum Ntuj Ceeb Tsheej txoj hau kev zoo siab. Nws tau npaj ib txoj kev rau peb tsev neeg nyob ua ke tas mus li. Thaum peb nrhiav tsev neeg zaj keeb kwm thiab ua hauj lwm hauv lub tuam tsev, peb coj peb tsev neeg, cov ciaj thiab cov tuag, los nyob ua ke. (“Kev ua hauj lwm hauv lub tuam tsev” txhais tias peb ua cov kab ke hauv lub tuam tsev rau peb tus kheej, xws li thaum yus ua kev cai sib khi nrog yus tus khub, thiab ua cov kab ke hauv lub tuam tsev rau peb cov poj koob yawm txwv.)
Tsev Neeg zaj Keeb Kwm thiab Kev Ua Hauj Lwm hauv lub Tuam Tsev
Txhua tus neeg uas tau nyob hauv lub ntiaj teb xav tau cov kab ke ntawm txoj moo zoo. Yog peb cov poj koob yawm txwv tsis tau muaj cib fim ua li ntawd, peb sawv cev ua cov kab ke hauv lub tuam tsev rau lawv los tau. Ib txoj kab ke ntawd yog kev cai sib khi rau lwm tus hauv ib tse neeg. “Sib khi” txhais tias peb yuav nrog peb tsev neeg nyob ua ke tas mus li yog tias peb ua ncaj ncees. Peb ua tau kev cai sib khi rau peb tsev neeg nyob hauv lub tuam tsev xwb.
Cov Koob Hmoov Los ntawm Kev Nrhiav Tsev Neeg Zaj Keeb Kwm
Kev nrhiav tsev neeg zaj keeb kwm yuav pab peb nrog peb tsev neeg uas nyob hauv lub ntiaj teb no sib raug zoo. Thaum peb hais txog tej zaj dab neeg, muab duab rau lwm tus saib, thiab hais txog lwm yam uas peb nco ntsoov, peb ua kom peb tsev neeg sib raug zoo. Peb kuj ua kom peb txoj kev sib hlub loj tuaj. Cov yaj saub tau cog lus tias thaum peb nrhiav tsev neeg zaj keeb kwm peb yuav paub Yexus Khetos zoo dua thiab.
Kev Nrhiav Peb cov Poj Koob Yawm Txwv
Leej Txiv Saum Ntuj Ceeb Tsheej xav kom peb ua kev cai sib khi nrog peb tsev neeg thiab peb cov poj koob yawm txwv. Ua ntej peb yuav sib khi rau peb cov poj koob yawm txwv, peb yuav tsum nrhiav lawv ces khaws cov xov xwm txog lawv. Tiam sis kev nrhiav tsev neeg zaj keeb kwm yeej tsis yog kev nrhiav tej npe, tej hnub, thiab tej qhov chaw xwb. Thaum peb kawm ntxiv txog peb cov poj koob yawm txwv, peb yuav sib raug zoo nrog lawv.
© 2021 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, December 2021. Hmong. 17476 295