“Mpungilu Munena: Tshisangilu tshia Ekelezia bua Buloba Bujima,” Liahona, Ngondo wa Tshitema 2021
Mukenji wa ku Ngondo wa Liahona, Ngondo wa Tshitema 2021
Mpungilu Munena: Tshisangilu tshia Ekelezia bua Buloba Bujima
Tudi tuteleja bambi ne bakuabu balombodi ba Ekelezia mu mpungilu munena. Badi batulongesha bidi Nzambi musue bua tumvua.
Ngondo Muinayi ne wa Dikumi yonsu, Ekelezia udi wenza mulongu wa bisangilu bibikidibua ne; mpungilu munena. Balombodi badi balongesha ne bajadika bua Yezu Kilisto ne bua lumu luimpa Luende. Mpungilu munena udi wenzekela mu Salt Lake City, Utah, USA, ne bamutangalaja mu buloba bujima mu miakulu mipita ku 80. Bidimba bionso ne bantu badi bangisha badi bakidibua bua kuteleja miyuki.
Mpungilu ya Kumpala ya Ekelezia
Ekelezia uvua mulongolola patoka mu nsangilu wa matuku 6 Ngondo Muinayi, 1830 (tangila Dilongesha ne Bipungidi 20). Mpungilu wa kumpala uvua muenza mu matuku 9 Ngondo Muisambombo, 1830. Kubangila apu, mpungilu minena ivua yenzeka anu ku buludiki bua Mulombodi Mukulu wa Ekelezia miaba yonsu uvua bidimba mua kukunguila. Mu bidimu bia 1840, balombodi bakabanga kuenza mpungilu misangu ibidi ku tshidimu.
Mushindu Udi Mpungilu Ilongolodibua Lelu
Bulombodi Bukulu, Mpuilu wa Bapostolo Dikumi ne Babidi, ne balombodi bakuabu badi bakula mu mpungilu munena. Tshisumbu tshia misambu tshia Tabernacle wa Temple Square ne bikuabu bisumbu bia misambu bia Ekelezia, bidi bimba. Mpungilu yonsu udi ne bitupa bitanu: bisatu mu Disambombo ne bibidi mu Dialumingu. Mu Ngondo Muinayi, tshitupa tshisatu mu Disambombo tshidi bua mpuilu ya bidimba bidi ne Buakuidi bua Alona ne Melekisedeke. Mu Ngondo wa Dikumi, tshidi bua bidimba bia mu Kasumbu Kambuluishi ne Bansonga Bakaji.
Malongeshi a Balombodi
Mu ngondo idi kumpala kua mpungilu, balombodi ba Ekelezia badi basambila pa bia kulongesha. Mukalenga udi ubapa lungenyi bua kumanya bia kuamba. Badi balongesha malelela a lumu luimpa ne batubikila bua kulama mikenji ya Nzambi. Badi kabidi bajadika bua Yezu Kilisto ne batukolesha bua kumulonda.
Kulonga mu Mpungilu
Kumpala kua mpungilu munena, tudi mua kusambila bua kumvua tshidi Mukalenga musue bua tulonga. Patudi tumvua miyuki, Nyuma udi utulongesha tshitudi ne bua kumanya. Panyima pa mpungilu, miyuki idi yedibua pa ChurchofJesusChrist.org, mu Application wa Tshisangi tshia Mikanda, ne mu Liahona. Tudi mua kulonga miyuki mu kusambila bua kumanya bimpe pa Yezu Kilisto ne lumu luimpa Luende.
Kupitshila ku Mifundu
Yezu Kilisto wakalongesha ne; tudi ne bua kuikala tudisangisha pamue (tangila 3 Nefi 18:22).
Padi bidimba bia Ekelezia bitendelela pamue, Mukalenga neyikala nabu (tangila Matayo 18:20).
Mukalenga wakatumina bidimba bia Ekelezia mukenji bua ” kulonga ne kukankamikangana” (Dilongeshi ne Bipungidi 43:8).
Padi bidimba bia Ekelezia bileja ditabuja mu Kilisto, Nyuma Wenda neyikala nabu diba didibu batutakena (tangila Dilongeshi ne Bipungidi 44:2).
© 2021 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, September 2021. Tshiluba. 17473 760