Buakuidi Budi Bukola bua Nzambi

Pavua Yezu pa buloba, Wakalombola Ekelezia Wenda ne bukola bua buakuidi. Wakafila bukola ebu kabidi kudi Bapostolo Benda. Panyima pa nkama ya bidimu bamana kufua, bidimba biabungi biakumbuka mu Ekelezia. Bakakudimuna bibi lumu luimpa ne mushindu uvua Ekelezia wenza mudimu. Buakuidi bua Nzambi kabuvua kabidi pa buloba to. Mu 1829, Yezu wakatuma Yona Mutambuishi ne Bapostolo Petelo, Yakobo, ne Yona bua kupesha Joseph Smith buakuidi. Ekelezia wa Yezu Kilisto wa Bansantu ba Matuku a Ndekelu udi bulongolodi bumua pa buloba budi ne bukokeshi bua Nzambi ebu.

Nsapi ya Buakuidi idi bukokeshi bua kuludika nabu ngenzelu wa mudimu wa buakuidi, bumudi difila dia dianyisha bua kukumbaja milulu. Yezu Kilisto udi ne nsapi yonsu ya buakuidi. Mulombodi Mukulu wa Ekelezia udi muntu umuepela pa buloba udi mua kuenza mudimu ne nsapi ya buakuidi bua kuludika Ekelezia mujima. Ku buludiki buenda, bakuabu badi mua kuenza mudimu ne nsapi mikuabu mu mudimu wa Nzambi. Balombodi bumudi bepiskopo ne balombodi bakulu ba makunji badi benza mudimu ne nsapi ya buakuidi bua kulombola mu bikongo ne makunji abu. Bualu mabikila a kusadila adi afuma kudi balombodi badi ne nsapi ya buakuidi, bantu baluma ne bakaji badi basadila mu mabikila badi benzejibua ku bukokeshi bua buakuidi mu midimu yabu.

Buakuidi budi ne bitupa bibidi: Buakuidi bua Melekisedek ne Buakuidi bua Alona. Kupitshila ku Buakuidi bua Melekisedek, balombodi ba Ekelezia badi baludika mudimu onsu wa mu nyuma wa Ekelezia, bumudi bukenji ne mudimu wa ntempelu. Midimu ya Buakuidi bua Alona idi muinshi mua bukokeshi bua Buakuidi bua Melekisedek. Budi buenza mudimu wa milulu bumudi ditambula ne biakudia bia tshijila

Kupitshila ku bipungidi ne milulu, Nzambi udi wenza bua mabenesha a buakuidi akumbena bana Benda bonsu. Mabenesha aa adi bumudi ditambula, dipa dia Nyuma wa Tshijila, biakudia bia tshijila, ne milulu ya ntempelu. Bantu baluma ne bakaji badi benza dotation mu ntempelu badi bapeta dipa dia bukola bua buakuidi bua Nzambi kupitshila ku bipungidi. Tudi kabidi mua kupeta mabenesha a buakuidi a londapu, a dikankamika, ne a buludiki.

Buakuidi buvua buikala mu bikondo bia kala budi bua momumua ne budiku mpindiewu (tangila Mosa 6:7).

Nsapi ya buakuidi idi yambuluisha bua kujadika ne tudi tukumbaja mudimu wa Mukalenga mu mushindu mululama (tangila Dilongesha ne Bipungidi 42:11).

Bantu baluma badi ne buakuidi badi mua kuenza nabu mudimu “anu ku maludiki a buakana” (Dilongesha ne Bipungidi 121:36).

Imua ya ku midimu ya aba badi ne buakuidi idi miumvuija mu Dilongesha ne Bipungidi 20:38–67.