“Lub Pov Thawj Hwj Yog Vajtswv lub Hwj Chim,” Liahona, Yim Hli Ntuj 2021
Zaj Lus hauv Liyahaunas Txhua Hli, Yim Hli Ntuj 2021
Lub Pov Thawj Hwj Yog Vajtswv lub Hwj Chim
Vajtswv foom koob hmoov rau peb los ntawm lub hwj chim pov thawj hwj. Cov koob hmoov pov thawj hwj los muaj pub rau txhua leej txhua tus.
Lub pov thawj hwj yog Vajtswv lub hwj chim. Nws siv lub hwj chim no kom foom koob hmoov rau tag nrho Nws cov me nyuam thiab pab lawv rov qab los nrog Nws nyob. Vajtswv tau muab lub hwj chim pov thawj hwj rau Nws cov me nyuam hauv lub ntiaj teb no. Nrog lub hwj chim no, cov thawj coj pov thawj hwj muaj cai coj lub Koom Txoos, thiab cov uas tuav lub pov thawj hwj ua tau cov kab ke dawb ceev, xws li kev cai raus dej, uas pab peb nyob ze Vajtswv ntxiv. Txhua tus txiv neej thiab poj niam uas tsim nyog txais cov kab ke pov thawj hwj thiab ua raws li tej kev khi lus (cov lus cog tseg dawb ceev) txais tau Vajtswv lub hwj chim.
Tau Muab lub Hwj Chim Pov Thawj Hwj rau Joseph Smith
Thaum Yexus Khetos nyob hauv lub ntiaj teb no, Nws tau siv lub hwj chim pov thawj hwj coj Nws lub Koom Txoos. Nws kuj muab lub hwj chim no rau Nws cov Thwj Tim. Nyob hauv ntau pua xyoo tom qab lawv tuag tas lawm, cov mej zeej coob tau tso lub Koom Txoos tseg. Lawv tau ua yuam kev hloov txoj moo zoo thiab tej txheej txheem hauv lub Koom Txoos. Tsis tau muaj Vajtswv lub pov thawj hwj nyob hauv lub ntiaj teb ntxiv li lawm. Nyob rau xyoo 1829, Yexus tau xa Yauhas tus uas Muab Neeg Ua Kev Cai Raus Dej thiab cov Thwj Tim Petus, Yakanpaus, thiab Yauhas kom lawv muab lub pov thawj hwj rau Joseph Smith. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog tib lub koom haum hauv lub ntiaj teb no uas muaj Vajtswv txoj cai no.
Petus, Yakaunpaus, thiab Yauhas lub Suab, los ntawm Linda Curley Christensen thiab Michael T. Malm
Cov Yuam Sij Pov Thawj Hwj
Cov yuam sij pov thawj hwj yog txoj cai coj neeg siv lub pov thawj hwj, xws li kev tso cai ua ib txoj kab ke. Yexus Khetos yog tus uas tuav txhua tus yuam sij ntawm lub pov thawj hwj. Tus Thawj Tswj Hwm ntawm lub Koom Txoos yog tib tug neeg nyob hauv lub ntiaj teb uas siv tau cov yuam sij pov thawj hwj kom coj tag nrho lub Koom Txoos no. Raws li nws coj peb, lwm tus muaj cai siv tej yuam sij ua Vajtswv txoj hauj lwm. Cov thawj coj xws li cov npisov thiab ceg txheem ntseeg cov thawj tswj hwm siv cov yuam sij pov thawj hwj kom coj lawv tej pawg ntseeg thiab ceg txheem ntseeg. Vim cov thawj coj uas muaj cov yuam sij pov thawj hwj hu neeg ua hauj lwm, cov txiv neej thiab cov poj niam uas ua li Vajtswv hu lawv ua yeej siv txoj cai pov thawj hwj thaum lawv ua lawv tej tes num.
Lub Pov Thawj Hwj Mekhixedes thiab lub Pov Thawj Hwj Aloos
Lub pov thawj hwj muaj ob feem: lub Pov Thawj Hwj Mekhixedes thiab lub Pov Thawj Hwj Aloos. Los ntawm lub Pov Thawj Hwj Mekhixedes, cov thawj coj hauv lub Koom Txoos coj tag nrho tej hauj lwm ntawm sab ntsuj plig hauv lub Koom Txoos, xws li kev ua tub txib thiab kev ua hauj lwm hauv lub tuam tsev. Lub Pov Thawj Hwj Aloos yeej ua hauj lwm raws li lub Pov Thawj Hwj Mekhixedes coj. Yus siv lub hwj chim no kom ua tej kab ke xws li kev cai raus dej thiab lub cim nco txog.
Cov Koob Hmoov uas Los ntawm lub Pov Thawj Hwj Los
Dhau los ntawm tej kev khi lus thiab cov kab ke, Vajtswv muab cov koob hmoov pov thawj hwj rau tag nrho Nws cov me nyuam. Cov koob hmoov no los muaj kev cai raus dej, lub txiaj ntsim Vaj Ntsuj Plig Dawb Huv, lub cim nco txog, thiab cov kab ke hauv lub tuam tsev. Cov txiv neej thiab cov poj niam uas tau txais lub vaj txiaj ntsim hauv lub tuam tsev txais ib lub txiaj ntsim uas yog Vajtswv lub hwj chim pov thawj hwj los ntawm lawv tej kev khi lus. Peb kuj txais tau cov koob hmoov pov thawj hwj uas kho peb zoo, nplij peb lub siab, thiab coj peb kev.
Cov Vaj Lug Kub Hais Li Cas txog lub Pov Thawj Hwj?
Lub pov thawj hwj uas muaj puag thaum ub yog tib lub hwj chim uas muaj tam sim no (saib Mauxes 6:7).
Cov yuam sji pov thawj hwj pab peb ua tus Tswv tej hauj lwm raws li ib txoj kev xwm yeem (saib Lus Qhuab Qhia thiab Kev Khi Lus 42:11).
Cov txiv neej uas tuav lub pov thawj hwj muaj cai siv “tsuas yog los ntawm tej ntsiab cai ncaj ncees xwb” (Lus Qhuab Qhia thiab Kev Khi Lus 121:36).
Muaj tej lus piav txog tej tes num ntawm cov uas tuav lub pov thawj hwj nyob hauv phau Lus Qhuab Qhia thiab Kev Khi Lus 20:38–67.
© 2021 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, August 2021. Hmong. 17472 295