Samatail Nanleng Ketin Kupwurki Kitail en Ahneki Popohl

Ni atail kin tamanda sapwellimen Koht koasondi en popohl, kitail kak diar peren tetehn mie kahpwal nan mour.

Mwohn atail ipwidi pohn sampa, kitail koaros kin koukouson rehn Sahm Nanleng oh Sapwellime seri ngehn kan. E ketkihda pilahn ehu pwehn sewese Sapwellime serihkan en esehla oh keirda. Pwehki Sapwellime pilahno, kitail kak duwehla Ih oh warehng ahneki mour soutuk. Pilahn wet kak wiawi pwehki Ieros en Koht, Sises Krais, ketdohr sampa pwehn lokolongki dipatail kan, tounmetei wet me adaneki Tomw.

Pilahn en Sahm Nanleng kin kahdaneki pilahn en

popohl (tehk Alma 42:8),
komour (tehk Moses 6:62),
doarehla (tehk Jacob 6:8), de
kalahngan (tehk Alma 42:15).

Ire pwukat oh irehn pwuhk sarawi teikan kasalehda me, Sahm Nanleng ketin kupwurki kitail en duwehla Ih, pwurala Reh, oh ahneki popohl (tehk Moses 1:39).

Kitail Kohdo Sampa pwehn Esehla oh Keirda

Koht ketin kadarkitaildo sampa, wasa kitail kak ahneki ehu paliwar (tehk Senesis 1:26-27). Kitail anahne paliwaratail pwehn sewesei kitail ahneki mour pohn sampa.

Koht mwahngi me kitail sohte pahn ahneki popohl ansou koaros. Kitail kin kehn nsensuwed, medek, oh pil mehla. Ahpw pwehki kahpwal kan en mour, Sahm Nanleng kin ketin sewesei kitail en esehla oh keirda.

Koht pil ketkihong kitail saledek en pilipil, kak en pilada dahme mwahu oh suwed. E ketin mweidohng kitail en pilada ong kitail atail madmadau oh wiewia. E ketkihongehr kitail pwuhk sarawi kan oh soukohp momour kan pwehn sewesei kitail en esehla pilada dahme pwung (tehk Abraham 3:25).

Song en Duwehla Sises Krais

Koht sohte ketkihdo kitail sampa oh sohte ketkihda ehu mehn kahlmengi pwehn idawehn (tehk Sohn 13:15). E ketkihdo Sapwellime Ieros, Sises Krais, pwehn kaslehieng kitail ahlo. Pwehn esehla duwen idawehn Ih, kitail kak wadek irehn pwuhk sarawi kan pwehn esehla ihs Ih oh dahme E ketin wia nin doken Ah ketin ieias pohn sampa. Kitail kak pil wia uwen atail kak pwehn duwehla Krais ni atail kin peikiong Koht oh poakohng mehteikan.

Ni atail kin wiahda me sapwung kan, kitail kin pekimahk oh doadoahngki Tomw en Sises Krais pwehn sewesei kitail en wekila. Kitail kak diar popophl ni atail kin song rahn koaros en duwehla Ih.

Mehla Sohte Wia Imwi

Ni atail mehla, ngenatail kan kin kohla nan sapwen ngehn. Wasao kitail kin pousehla atail kasukuhl pwehn onopada ong Iasadao.

Ni ansoun Iasadao, paliwaratail kan oh ngenatail kan pahn patpene. Paliwaratail kan pahn unsek, oh kitail sohte pahn pwurehng mehla de ahneki soumwahu (tehk Alma 11:44-45). Nin duwen en Sises Krais ah ketin pwoula oh pwurehng ieiasda, kitail koaros pahn pwurehng mourda.

Ni en Koht ah ketin kadeik kitail, E pahn ketin teneki atail wiewia kan oh ineng kan. Ma kitail songehr en kapwaiada kosonned akan oh inou kan me kitail wiahiongehr Sahm Nanleng, eri kitail kak pwurehng kousonla Reh.

Momour rehn Koht oh Atail Peneinei kan en Nanleng

Nan wehin selestial, kitail pahn kouson rehn Koht oh Sises Krais. Kitail pahn pil kak iang atail peneinei kan kouson wasao ma kitail katengeteng penehr, Kitail pahn diar meleilei, popohl, oh kommol (tehk Mosiah 2:41).

Kitail kin diar kahpwal ekei ansou pohn sampa, ahpw ma kitail kin idawehn Sises Krais, kitail kak diar popohl nan mour wet oh popohl soutuk nan mour kohkohdo,

Dahme Iren Pwuhk Sarawi Kan Mahsanih duwen Koasondi en Popohl?

E kesempwal mwomwen atail kin momourki atail mour kan. Koht pahn ketin kadeik oh katingih kitail nin duwen atail madmadau kan oh wiewia kan (tehk Alma 41:3).

Sehdan iei atail imwintihti ong atail popohl. E kin kasongosongi kitail en wiekauwe atail mour pohn sampa oh wiahda dihp. E mwahuki kitail en ahneki nsensuwed duwehte ih (tehk 2 Nephi 2:27).

Ni atail kin pwoson koasondi en Koht ong kitail, kitail kak ahneki meleilei itarte ma kitail kin diar kahpwal kan. Kitail kak kasik pwehn kousonla rehn Koht kohkohlahte (tehk Doctrine and Covenants 59:23).

© 2021 sang Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwehpen Padahk en Sounpwong kan en Liahona, Sulai 2021. Mahsen.17471 885.

Mahlen koaros sang J. Kirk Richards