Peb Leej Txiv Saum Ntuj Ceeb Tsheej Xav Kom Peb Zoo Siab

Vajtswv xa peb nqis los rau hauv lub ntiaj teb, kom peb thiaj muaj tau ib lub cev nqaij daim tawv (saib Chiv Keeb 1:26–27). Peb yuav tsum muaj cev nqaij daim tawv kom peb thiaj ua neej nyob hauv lub ntiaj teb no.

Vajtswv paub hais tias peb yuav tsis zoo siab txhua lub sij hawm. Peb muaj kev tu siab, kev mob nkeeg, thiab kev tuag. Tiam sis vim yog lub neej no tej kev cov nyom, Leej Txiv Saum Ntuj Ceeb Tsheej pab peb kawm thiab loj hlob tuaj.

Vajtswv kuj muab kev ywj siab xaiv rau peb, txoj kev xaiv qhov zoo tawm ntawm qhov phem. Nws pab peb xaiv rau peb tus kheej saib peb xav thiab ua dab tsi. Nws tau muab cov vaj lug kub thiab cov yaj saub niaj hnub nim no rau peb kom pab peb kawm xaiv qhov yog (saib Abraham 3:25).

Vajtswv tsis xa peb nqis los nyob hauv lub ntiaj teb no es tsis muaj ib tug yam ntxwv uas peb yoog ua raws li tau (saib Yauhas 13:15). Nws txib Nws Leej Tub, Yexus Khetos, kom qhia kev rau peb. Kom thiaj paub saib peb yuav tsum ua li cas kom ua tau raws li Nws, peb nyeem tau cov vaj lug kub kom paub hais tias Nws yog leej twg tiag thiab saib Nws tau ua dab tsi thaum nws ua neej nyob hauv lub ntiaj teb no. Peb ua tau zoo li Khetos thaum peb mloog Vajtswv lus thiab hlub lwm tus neeg.

Thaum peb yuam kev ua txhaum, peb thov kom tau kev zam txim thiab siv lub hwj chim ntawm Yexus Khetos txoj Kev Theej Txhoj kom pab peb hloov. Peb ua neeg zoo siab tau thaum peb sim rais los mus ua zoo li Yexus txhua hnub.

Thaum peb tas sim neej, peb cov ntsuj plig mus rau hauv lub ntuj ntsuj plig. Nyob ntawd peb yeej meem kawm ntau yam ntxiv thiab npaj rau txoj Kev Sawv Rov Los.

Thaum lub sij hawm Sawv Rov Los ntawd, peb lub cev nqaij daim tawv thiab peb sab ntsuj plig yuav rov qab sib puab nyob ua ke. Peb lub cev nqaij daim tawv yuav zoo tag nrho, thiab peb yuav tsis raug kev tuag los sis kev mob nkeeg dab tsi ntxiv li lawm (saib Amas 11:44–45). Ib yam li Yexus Khetos tuag thiab sawv hauv qhov tuag rov qab los, peb yuav rov qab muaj sia nyob dua ib zaug ntxiv thiab.

Thaum Vajtswv txiav txim rau peb, Nws yuav xav txog tej yam peb ua thiab peb tej kev xav tau xav yuav. Yog tias peb tau sim ceev tej lus txib thiab tej kev cog lus uas peb cog nrog rau Leej Txiv Saum Ntuj Ceeb Tsheej, ces peb yuav nrog Nws nyob tau dua ib zaug ntxiv.

Nyob saum lub nceeg vaj xilethi-aus, peb yuav nrog Vajtswv thiab Yexus Khetos nyob ua ke. Peb yuav nrog peb tsev neeg nyob tau ua ke nyob ntawd yog tias peb tau nrog lawv ua kev cai sib khi. Peb yuav muaj kev thaj yeeb nyab xeeb, kev zoo siab, thiab kev so (saib Mauxiyas 2:41).

Tej zaum peb lub neej hauv lub ntiaj teb no yuav nyuaj, tiam sis yog tias peb ua raws li Yexus Khetos, peb ntsib tau kev xyiv fab hauv lub neej no thiab kev zoo siab nyob mus ib txhis hauv lub neej tom ntej.

Txoj kev uas peb ua neej tseem ceeb heev. Vajtswv yuav txiav txim rau peb thiab muab nqi zog rau peb raws li peb tej kev xav hauv nruab siab thiab tej yam peb ua (saib Amas 41:3).

Ntxwg Nyoog yog tus yeeb ncuab ntawm peb txoj kev zoo siab. Nws ntxias kom peb siv yuam kev peb lub neej hauv lub ntiaj teb no thiab kom ua txhaum. Nws xav kom peb poob ua neeg txom nyem heev ib yam li nws (saib 2 Nifais 2:27).

Thaum peb muaj siab ntseeg rau ntawm Vajtswv txoj hau kev rau peb, peb yuav ntsib kev nyab xeeb txawm tias peb raug tej kev sim siab dab tsi los xij. Peb tsom ntsoov tau qhov uas peb yuav nrog Vajtswv nyob ua ke mus ib txhis li (saib Lus Qhuab Qhia thiab Kev Khi Lus 59:23).