Pawg Vajtswv Yog Dab Tsi?

Vajtswv muaj ib lub cev uas muaj nqaij daim tawv thiab pob txha thiab uas twb sawv rov los lawm. Nws yog Leej Txiv ntawm peb cov ntsuj plig. Nws hlub Nws cov me nyuam txhua tus yam zoo tag nrho. Vajtswv zoo tag nrho, muaj hwj chim loj tshaj, thiab paub txhua yam. Nws coj ncaj ncees, muaj siab hlub tshua, thiab siab zoo. Peb tau ua neej nyob ua ntsuj plig nrog Vajtswv ua ntej peb yug los. Vajtswv xa peb nqis los rau lub ntiaj teb no kom kawm tej yam tseem ceeb thiab loj hlob tuaj. Vajtswv lub siab xav yog kom Nws cov me nyuam txhua tus rov qab mus nrog Nws nyob dua ib zaug ntxiv tom qab peb tas sim neej. Vajtswv qhia peb hais tias peb yuav tsum ua raws li Yexus Khetos hais kom thiaj rov qab mus nyob hauv Vajtswv lub xub ntiag.

Yexus Khetos kuj muaj ib lub cev nqaij daim tawv thiab pob txha uas twb sawv rov los lawm thiab. Yexus yog Vajtswv thawj tug Tub. Ua ntej peb yug los, Vajtswv xaiv Yexus los mus ua peb tus Cawm Seej. Qhov no txhais tau hais tias Yexus nqis los hauv lub ntiaj teb no kom ua yam ntxwv rau peb, theej peb lub txhoj, thiab cawm peb dim ntawm kev tuag. Vim yog Yexus Khetos, peb hloov siab lees txim thiab txais tau kev zam txim rau peb tej kev txhaum. Yexus Khetos kuj raug txom nyem ntau yam xwv kom Nws yuav to taub saib peb xav tau li cas thiab pab tau peb. Yexus Khetos tuag thiab sawv rov los, es ua li ntawd ua rau peb txhua tus yuav rov muaj sia tau dua ib zaug ntxiv thiab.

Tus Vaj Ntsuj Plig Dawb Huv yog ib tug ntawm Pawg Vajtswv uas tsis muaj ib lub cev nqaij daim tawv. Nws yog ib tug ntsuj plig. Tus Ntsuj Plig Dawb Huv muaj peev xwm hais lus ncaj qha nrog rau peb sab ntsuj plig. Nws ua tim khawv rau peb hais tias Vajtswv muaj sia nyob tiag thiab Yexus Khetos yog peb tus Cawm Seej. Tus Vajtswv txoj kev hlub yog Vajtswv tus neeg xa xov kom muab tau kev hlub, kev coj, los sis kev nplij siab rau peb. Thaum peb ua kev cai raus dej thiab txais kev pom zoo, peb txais lub txiaj ntsim ntawm tus Vaj Ntsuj Plig Dawb Huv. Tom qab peb ua kev cai raus dej tas, tus Vaj Ntsuj Plig Dawb Huv yuav nrog peb nyob nraim thaum peb ua raws li Vajtswv tej lus txib.

Tau ntev lawm tib neeg ntxhov siab heev txog Pawg Vajtswv. Tib neeg tau muaj kev tsis sib hais haum txog saib Vajtswv, Yexus Khetos, thiab tus Vaj Ntsuj Plig Dawb Huv zoo li cas. Yog vim li no Joseph Smith Thawj Zaug Ua Yog Toog Pom tseem ceeb npaum li cas. Nws pom tias Leej Txiv Saum Ntuj Ceeb Tsheej thiab Yexus Khetos muaj cev nqaij daim tawv thiab yog ob tug neeg.

Cov vaj lug kub thiab cov yaj saub niaj hnub nim no qhia peb hais tias Vajtswv, Yexus Khetos, thiab tus Vaj Ntsuj Plig Dawb Huv yog peb tug neeg nyias muaj nyias tiam sis lawv muaj tib lub hom phiaj: txoj kev tsis txawj tuag thiab txoj sia nyob mus ib txhis rau peb txhua tus (saib Mauxes 1:39). Ib yam li cov mej zeej ntawm tib pawg neeg, Lawv ua hauj lwm ua ke kom pab peb txhua hnub. Peb nyob ze dua Lawv thaum peb hloov siab lees txim thiab xaiv qhov yog.

• Leej Txiv Saum Ntuj Ceeb Tsheej thiab Yexus Khetos koom siab kom ncav tau tib lub hom phiaj (saib Yauhas 10:30).

• Leej Txiv Saum Ntuj Ceeb Tsheej hais lus rau Nws Leej Tub (saib Mathais 3:16–17).

• Yexus Khetos hais lus rau Nws Leej Txiv (saib Yauhas 11:41).

• Yexus Khetos thov Vajtswv kom muaj ib hnub twg peb txhua tus yuav koom ib lub siab tau (saib Yauhas 17:11).

• Joseph Smith pom Leej Txiv Saum Ntuj Ceeb Tsheej thiab Yexus Khetos (saib Joseph Smith—Keeb Kwm 1:17).

• Tus Vaj Ntsuj Plig Dawb Huv ua tim khawv tias Yexus Khetos yog peb tus Cawm Seej (saib Yauhas 15:26).