“Yexus Khetos Cawm Peb Dim Kev Txhaum thiab Kev Tuag,” Liyahaunas, Plaub Hlis Ntuj 2021
Zaj Lus hauv Liyahaunas Txhua Hli, Plaub Hlis Ntuj 2021
Yexus Khetos Cawm Peb Dim Kev Txhaum thiab Kev Tuag
Vim yog Yexus txoj kev txi, peb txhua tus muaj lub cib fim nrhiav kom tau kev kaj siab lug thiab kev xyiv fab nyob mus ib txhis li.
Khetos Tsim lub Ntiaj Teb, los ntawm Robert T. Barrett
Peb hais tias Yexus Khetos yog peb tus Cawm Seej. Nov yog vim rau qhov uas Yexus them tus nqi rau peb tej kev txhaum lawm thiab tau kov yeej lub hwj chim ntawm kev tuag. Nws cawm peb dim! Nws txoj kev txi rau peb, uas hu ua txoj Kev Theej Txhoj, yog qhov uas muaj los tseem ceeb tshaj plaws. Vim yog Nws, kev tuag tsis yog qhov kawg. Vim yog Nws, peb txais tau kev zam txim rau peb tej kev txhaum, raug ntxuav kom dawb huv dua, thiab ua neeg zoo zuj zus tuaj txhua hnub.
Yexus Khetos Yog Thawj tug Yug Los
Ua ntej peb yug los hauv lub ntiaj teb, peb tau nrog peb leej niam leej txiv saum ntuj ceeb tsheej nyob ua ke. Vim Nws yog Thawj tug Yug Los, Yexus Khetos tau pab tsim lub ntiaj teb zoo nkauj heev no. Nws raug xaiv los ua peb tus Cawm Seej thiab kam yug los hauv lub ntiaj teb no kom Nws thiaj ua tau yam ntxwv zoo tag nrho, qhia Nws txoj moo zoo, thiab ua txoj Kev Theej Txhoj tiav tas rau peb.
Auj Kuv Leej Txiv, los ntawm Simon Dewey
Yexus Khetos Tau Them tus Nqi rau Peb Tej Kev Txhaum
Thaum Yexus paub tias tsis ntev Nws yuav tas sim neej, Nws mus rau lub vaj Khexemanes kom thov Vajtswv. Thaum nws thov Vajtswv, Nws pib them tus nqi rau peb tej kev txhaum. Nws muaj lub siab kam raug tsim txom kom peb thiaj tsis tas raug—yog tias peb yuav hloov siab lees txim. Thaum peb tig mus tawm ntawm peb tej kev txhaum thiab ua raws li tus Cawm Seej hais, peb txais tau kev zam txim thiab kev kho. Vim yog tej yam Yexus raug hauv lub vaj Khexemanes, Nws to taub zoo heev saib nws zoo li cas ua ib tug tib neeg li peb txhua tus. Nws hnov tau tag nrho peb tej kev tu siab, tej kev mob kev nkeeg, thiab tej kev mob siab. Nov yog thawj qhov ntawm txoj Kev Theej Txhoj.
Kev Faus tus Khetos, los ntawm Carl Heinrich Bloch
Yexus Khetos Kov Yeej Kev Tuag
Tom qab Nws thov Vajtswv hauv lub vaj Khexemanes, Yexus raug neeg ntxeev siab rau nws, raug ntes, thiab raug ntsia saum ntoo khaub lig. Txawm hais tias Nws muaj hwj chim loj tshaj plaws, Yexus cia Nws tus Kheej tuag rau ntawm tus ntoo khaub lig. Cov neeg raws Nws qab muab Nws lub cev faus hauv ib lub qhov ntxa. Lawv tsis paub hais tias txawm tias Nws lub cev tuag, Nws sab ntsuj plig tseem ciaj hauv lub ntuj ntsuj plig. Peb hnub tom qab ntawd, Yexus sawv rov los ciaj dua thiab los xyuas lawv, es phua qhov tseeb rau lawv hais tias Nws kov yeej tau kev tuag. Ua li no ua txoj Kev Theej Txhoj tiav tas. Vim rau qhov uas Yexus sawv rov los, peb txhua tus yuav sawv hauv qhov tuag rov qab los ciaj dua ib zaug ntxiv.
Nws Muaj Txoj Sia Nyob, los ntawm Simon Dewey
Lub Ntsiab ntawm Ob lub Caij Christmas thiab Easter
Neeg coob heev hauv lub ntiaj teb ua koob tsheej nco txog Yexus Khetos txoj Kev Theej Txhoj ib xyoos ob hnub phav. Thaum lub caij Christmas, peb ris Vajtswv txiaj uas Yexus kam txais txoj hauj lwm nqis los rau hauv lub ntiaj teb, txawm hais tias Nws yuav raug tsim txom thiab tuag theej peb. Lub hnub Easter ua koob tsheej nco txog tus Cawm Seej txoj kev kov yeej kev txhaum thiab kev tuag, uas muab kev cia siab rau peb tias peb yuav muaj kev xyiv fab nyob mus ib txhis li nyob rau lub sij hawm yav tom ntej.
Khetos Hu Petus thiab Adales, los ntawm James Taylor Harwood
Cov Vaj Lug Kub Hais Li Cas txog tus Cawm Seej txoj Kev Theej Txhoj?
Vim Yexus paub peb zoo kawg nkaus li, Nws “pab” tau peb (saib Amas 7:11–12).
Tus Cawm Seej to taub peb tej kev tu siab thiab kev puas ntsoog (saib Yaxayas 53:2–5).
Vajtswv xa Yexus los cawm peb vim Vajtswv hlub peb txhua tus (saib Yauhas 3:16–17).
Yexus thov Vajtswv rau cov uas raws Nws qab, suav peb thiab rau haud, kom tiv thaiv peb tawm ntawm kev phem thiab muab siab npuab nrog Nws thiab Leej Txiv Saum Ntuj Ceeb Tsheej (saib Yauhas 17).
Peb tus Cawm Seej caw peb los raws Nws qab thiab rov qab mus nyob ntawm Nws lub xub ntiag (saib Lus Qhuab Qhia thiab Kev Khi Lus 19:16–19, 23–24; 132:23).
© 2021 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Monthly Liahona Message, April 2021. Hmong. 17467 295