“Yexus Khetos Hais Kom Peb Txais lub Cim Nco Txog,” Liahona, Peb Hlis Ntuj 2021
Zaj Lus hauv Liahona Txhua Hli, Peb Hlis Ntuj 2021
Yexus Khetos Hais Kom Peb Txais lub Cim Nco Txog
Thaum peb nco txog peb tus Cawm Seej txhua lub lim tiam los Nws ntxuav peb huv thiab kho peb zoo.
Pluas Mov Kawg, los ntawm Carl Heinrich Bloch
Ua ntej Nws tuag, Yexus Khetos noj ib pluas mov ntxiv hu ua Pluas Mov Kawg. Thaum noj mov tas lawm, Nws qhia Nws cov thwj tim ua lub cim nco txog. Nws tau maub cov mov mog tais thiab foom koob hmoov rau cov mov mog. Nws hais tias, “Nej ua li no [kom nej] yuav nco ntsoov kuv” (Lukas 22:19). Ces Nws tau foom koob hmoov rau ib kho cawv txiv hmab thiab muab rau lawv.
Ib Feem ntawm Kev Teev Tiam Txhua lub Lim Tiam
Thaum tau muab Yexus Khetos lub Koom Txoos txum tim rov qab los rau hauv lub ntiaj teb, ces peb tau pib txais lub cim nco txog thaum peb teev tiam Vajtswv txhua lub lim tiam. Nyob hauv lub koom txoos, cov uas tuav lub pov thawj hwj foom koob hmoov thiab muab lub cim nco txog rau tib neeg. Lawv thov Vajtswv raws li cov lus hauv cov vaj lug kub (saib Maulaunais 4; 5). Ces txhua tus hauv pawg ntseeg noj cov mov thiab haus cov dej kom nco txog Yexus Khetos thiab Nws txoj kev txi rau peb, zoo li Nws hais kom peb ua.
Daim duab los ntawm Angela Suitter
Npaj Txais lub Cim Nco Txog
Xwv kom npaj txais lub cim nco txog, peb yuav tsum ua siab ncaj xav txog peb lub neej thiab tej yam peb ua. Peb yuav tsum hloov siab lees txim txog tej kev txog kev txhaum uas peb ua hauv lub lim tiam tas los, thiab thov Vajtswv zam txim pub rau peb. Peb tsis tas ua neeg zoog tag nrho kom txais lub cim nco txog, tiam sis peb yuav tsum txo hwj chim.
Thov Vajtswv hauv Khexemanes los ntawm Del Parson
Tsis Yog cov Mov Mog thiab Dej Xwb
Kev txais lub cim nco txog yog ib lub sij hawm dawb huv heev. Ob zag lus thov foom koob hmoov rau lub cim nco txog ua rau peb nco txog qhov uas thaum peb txais cov mov mog thiab cov dej, peb nco txog Yexus Khetos lub cev thiab cov ntshav uas Nws foom pub rau peb. Peb cog lus tias peb yuav coj raws li Nws thiab ua neej li Nws tau ua. Peb cog lus tias peb yuav sim ua raws li Vajtswv cov lus txib. Ces, Nws yuav muab tus Vaj Ntsuj Plig Dawb Huv rau peb kom nplij peb lub siab, coj peb kev, thiab kho peb zoo.
Kev Rov Qab Khi Lus
Thaum peb cov uas tau ua ue kev cai raus dej muaj ib lub siab dawb txais lub cim nco txog, ceb peb rov qab ua kev khi lus li peb tau ua thaum peb ua kev cai raus dej. Kev khi lus ntawd kuj hais txog qhov uas peb txais tus Vaj Ntsuj Plig Dawb Huv thiab txais kev ntxuav kom tsis muaj kev txhaum zoo li peb rov qab ua kev cai raus dej ib zaug ntxiv. Nov yog kev cia siab thiab kev siab hlub uas Yexus pub rau peb txhua leej txhua tus. Yeej tsis lig dhau kom hloov siab lees txim thiab txais kev zam txim.
Nej Nco Ntsoov txog Kuv, los ntawm Gary L. Kapp, tsis pub luam
Cov Vaj Lug Kub Hais Li Cas txog lub Cim Nco Txog?
Peb yuav tsum saib peb sab ntsuj plig, ua siab ncaj saib hauv peb lub siab, ua ntej peb txais lub cim nco txog (saib 1 Kauleethaus 11:28).
Tom Nws tau Sawv Rov Los, Yexus tau qhia Nws cov neeg nyob hauv Amelikas kom lawv paub txais lub cim nco txog li cas (saib 3 Nifais 18).
Cov yaj saub niaj hnub nim no tau qhia kom peb siv cov mov mog thiab cov dej thaum ua kev cai txais lub cim nco txog, tiam sis qhov uas peb noj thiab haus los tsis ua li cas (saib Lus Qhuab Qhia thiab Kev Khi Lus 27:2). Tej lub sij hawm cov neeg uas muaj kev fab yuav tsum siv lwm yam uas zoo li mov mog.
© 2021 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Monthly Liahona Message, March 2021. Hmong 17464 295
Pluas Mov Kawg, los ntawm Carl Heinrich Bloch; daim duab txog tus ntxhais hluas thov Vajtswv los ntawm Angela Suitter; Kev Thov Vajtswv hauv Khexemanes, los ntawm Del Parson; Nej Nco Ntsoov txog Kuv, los ntawm Gary L. Kapp, tsis pub luam