Koht Mahsanihong Kitail en Pepdaisla

Ma kitail laudlahr oh koahiekengehr en koasoaia duwen wekpeseng en pwuhng oh sapwung, Samatail Nanleng mwahuki kitail en pepdaisla (kilang Doctrine and Covenants 18:42). Sises e unsek, ahpw E pil piladahte en pepdaisla pwehn idawehn Sapwellimen Koht kosonned akan (kilang Madiu 1:13-17; 2 Nihpai 3:17). Pil irail kan me melahr kak alehda pepdais. Kitail ehukiheng irail sang ni pepdaiskinirail nan tehnpas sarawi kan. (Kilang Doctrine and Covenants 128:15–18.)

Sises sohte pepdaisla sang aramas sohte lipilipil. E ketin ketila rehn Sapwellime koasen Sohn, me ahniki mweimwei oh manaman en prihsduhd sang Koht. Mwurin Sises ah ketin kepilsalehdala oh Sapwellime wahnpoaron kan arail kamala, manaman oh mweimwei en prihsduhdo sohrala sang sampah. Eri, ni 1829, Sohn Sounpepdais ahpw pwaredo rehn Joseph Smith oh ketkihong mweimwei en pepdais ni mwaren Koht. Pwehki sang ni kopwurupwurdou, kitail pil kak pepdaisla sang ni mweimweiohte lel rahnwet.

Pepdais mih ni soangen inou riau, de inou sarawi, nan pwungen kitail oh Koht. Kitail inouki:

1. Kitail en alehda mwaren Sises Krais.

2. Tamataman Ih ahnsou koaros.

3. Kapwaiada Sapwellime kosonned akan.

Ni atail pahn wia mepwukat, Kauno ketin inoukihdi me Sapwellime Ngehn pahn ketiket rehtail ahnsou koaros. Mahsen en kapakap en kamadipw sarawio kin kataman ong kitail inou sarawi wet nan wihk koaros. (Kilang Doctrine and Covenants 20:77, 79.)

Mwurin Sises ah pepdaislahr, Ngehn Sarawi ahpw ketididohng powe ni mwomwen mwuroi emen (kilang 2 Nihpai 31:8). Rahnwet, mwurin aramas akan arail kin pepdaisla, irail kin kasarawiala. Met me wewehki me irail alehdahr kapai tohrohr kesempwal ehu me irail luhkohng en ale kisakis en kamwakele palingenirail, iei Ngehn Sarawi (kilang Doctrine and Covanents 39:6). Ngehn Sarawi kak kaunop kitail ong kahpwal akan, koaloaloamwahui kitail, kaweid kitail en wiahda pilipil mwahu kan, oh sewese kitail en kehn Sapwellimen Koht limpoak (kilang Doctrine and Covenants 39:6).

Koht mwahngih me kitail pahn kin wiahda sapwung. Itarete atail pahn kin wia uwen atail kak koaros, kitail pahn kin dipada oh pwupwidi ni atail pahn nannantiheng momourki atail inou sarawi kan en pepdais. Eri E ketin ketikihong emen emen kitail ahnsou en koluhla. (Kilang Doctrine and Covenants 18:13.) Rahn koaros kitail kak wia uwen atail kak koaros en pekimahk oh kapwungala sapwung kan. Kitail kak kapakap oh peki rehn Koht en mahkohng kitail. Eri, ni ahnsou me kitail pahn alehda kamadipw sarawi ni mohngiong karakarahk, kitail pahn kak ahniki Ngehn Sarawi rehtail (kilang 3 Nihpai 18:11).

Pahpa oh nohno kan en sowese neirail serih kan onopadahng pepdais (kilang Doctrine and Covenants 68:25).

Irail kan me tikitik sang sounpar waluh sohte anahne pepdais (kilang Moroni 8).

Ni ansou me kitail pepdais, kitail inoukida en “iang irail kan me ahniki pahtou; … koaloaloamwahui irail kan me anahne koaloaloamwahu, oh wia sounkadehde en Koht ahnsou koaros oh ni mehkoaros, oh wasa koaros” (Mosaia 18:9).