Vajtswv Tau Hais Kom Peb Ua Kev Cai Raus Dej

Yog peb laus txaus thiab paub txaus thiaj li paub tias qhov yog thiab qhov txhaum, ces Leej Txiv Saum Ntuj Ceeb Tsheej xav kom peb ua kev cai raus dej (saib Lus Qhuab Qhia thiab Kev Khi Lus 18:42). Yexus yog ib tug neeg zoo tag nrho, tiam sis Nws tseem xav ua kev cai raus dej thiaj li ua raws li Vajtswv tej lus txib (saib Mathais 3:13–17; 2 Nifais 31:7). Cov uas twb tuag lawm los kuj txais tau kev cai raus dej. Peb muab txoj kab ke no rau lawv thaum peb sawv lawv cev ua kev cai raus dej hauv lub tuam tsev. (Saib Lus Qhuab Qhia thiab Kev Khi Lus 128:15–18.)

Yexus tsis tau lam mus rau ib tug neeg xwb. Nws yeej mus rau Nws tus tij laug Yauhas, tus uas muaj Vajtswv txoj cai pov thawj hwj. Tom qab Yexus tuag lawm thiab Nws cov thwj tim raug tua tuag, ces tsis muaj txoj cai pov thawj hwj hauv lub ntiaj teb no lawm. Ces, nyob rau xyoo 1829, Yauhas tus uas Muab Neeg Ua Kev Cai Raus Dej tau tshwm sim rau Joseph Smith thiab muab txoj cai rau nws kom nws muab neeg ua kev cai raus dej los ntawm Vajtswv lub npe. Vim tau muab qhov ntawd txum tim rov qab los, ceb peb thiaj li siv tib txoj cai ntawd muab neeg ua kev cai raus dej.

Kev cai raus dej yog ib txoj kev cog lus ntawm ob leeg, los sis kev khi lus ntawm peb thiab Vajtswv. Peb cog lus tias peb yuav:

1. Ris Khetos lub npe.

2. Nco ntsoov txog Nws.

3. Ua raws li Nws cov lus txib.

Ces, Vajtswv cog lus tias Nws tus Ntsuj Plig yuav nrog nraim peb nyob. Cov lus ntawm zaj lus thov rau lub cim nco txog ua rau peb nco txog txoj kev khi lus no txhua lub lim tiam. (Saib Lus Qhuab Qhia thiab Kev Khi Lus 20:77, 79.)

Tom qab Yexus tau ua kev cai raus dej, tus Vaj Ntsuj Plig Dawb Huv tau tshwm sim yam li ib tug nquab (saib 2 Nifais 31:8). Niaj hnub no, tom qab tib neeg ua kev cai raus dej, lawv txais kev pom zoo. Qhov no txhais hais tias lawv txais ib txoj kev foom koob hmoov tshwj xeeb uas hais kom lawv txais lub txiaj ntsim Vaj Ntsuj Plig Dawb Huv ua pab lawv sab ntsuj plig huv huv (saib 2 Nifais 31:17). Tus Vaj Ntsuj Plig Dawb Huv txawj ceeb toom peb, nplij peb lub siab, coj peb kom txiav txim qhov zoo, thiab pab peb hnov Vajtswv txoj kev hlub (saib Lus Qhuab Qhia thiab Kev Khi Lus 39:6).

Vajtswv paub tias peb yuav ua yuam kev. Txawm peb ua zoo npaum li cas los, peb yuav ua txhaum thiab tsis ua raws li txhua yam peb cog lus thaum peb ua kev cai raus dej. Yog li ntawd Nws muab cib fim rau peb hloov siab lees txim. (Saib Lus Qhuab Qhia thiab Kev Khi Lus 18:13.) Txhua hnub los peb yuav tau thov txim thiab kho tej yam peb tau ua tsis yog lawm. Peb yuav tsum thov Vajtswv kom Nws zam txim pub rau peb. Ces, thaum peb txo hwj chim txais lub cim nco txog, peb yuav muaj tus Vaj Ntsuj Plig Dawb Huv nrog peb nyob (saib 3 Nifais 18:11).

Cov niam tsev txiv tsev yuav tsum pab lawv cov me nyuam npaj rau txoj kev cai raus dej (saib Lus Qhuab Qhia thiab Kev Khi Lus 68:25).

Cov uas tsis tau muaj hnub nyoog yim xyoo tsis tas ua kev cai raus dej (saib Maulaunais 8).

Thaum peb ua kev cai raus dej, peb cog lus tias peb yuav “txaus siab nyuaj siab nrog cov uas nyuaj siab; … nplij cov uas xav tau kev nplij siab, thiab ua tim khawv txog Vajtswv txhua lub sij hawm thiab ua tim khawv txog txhua yam, thiab ua tim khawv nyob hauv txhua qhov chaw” (Mauxiyas 18:9).