“Gro igo insait long Prinsipol bilong Revelesen,” Liahona, Jenueri 2021
Olgeta munLiahona Toksave, Jenueri 2021
Gro igo insait long Prinsipol bilong Revelesen
Mi enkarijim yupela long kisim ol step yupela i nidim long harim Bikpela moa beta na planti moa taim olsem yupela inap long kisim gutpela tingting Em I ilaik givim long yupela.
Ol poto i kam long Getty Images
Long Septemba 30, 2017, bihain long wanpela sesin long avinun bilong jenerel konferens, mi bin stop long hausik long sekim bilaved kwarom memba, Elda Robert D. Hales. Em i bin stap long hausik taim em i sik wantaim hat atek sampela dei bipo.
Bung bilong mitupela ibin wanpela gutpela tumas, na em i luk olsem em bai orait. Em i bin wok long kisim win em yet tu, dispela em i bin wanpela gutpela sain.
Tasol, long dispela nait, Spirit bin toktok long tingting na lewa bilong mi olsem mi mas go bek long hausik long Sande. Namel long Sande moning sesen bilong jenerol konferens, dispela strongpela piling i kam bek. Mi pilim olsem mi mas lusim belo kaikai na hariap igo long bed bilong Elda Hale hariap taim moning sesen i pinis, na mi bin mekim dispela.
Taim mi bin kamap, mi lukim olsem Elda Hale i no orait tumas na i luk nogut olsem bai no inap orait. Sore olsem em i pasim ai sampela 10pela minit bihain long mi kamap, tasol mi tok tenkyu olsem mi bin stap long arere long bet bilong em wantaim switpela meri blong em, Mary na ol tupela pikinini man bilong ol, taim em i lusim dispela laip.
Mi tok tenkyu olsem dispela isi isi toktok bilong Holi Gos i bin tokim mi long mekim ol samting we sapos nogat mi no bin inap long mekim. Na mi pilim bikpela tenkyu long wok bilong revelesen taim ol dua na windo bilong heven i open wanpela taim gen.
Dispela yia, fokas bilong pesonel na klasrum stadi bilong yumi bai stap long dispela Doktrin na ol Kavanen. Ol dispela “divain revelesen na dekleresen i kam long Bikpela” i ken blesim olgeta husat i stadim ol na ekt long ol tok ikam long antap. Ol i singautim “olgeta pipol long olgeta hap long harim nek bilong Bikpela Jisas Krais,”1 long wanem tru tumas “nek bilong Bikpela em i bilong olgeta man” (Doktrin na ol Kavanen 1:2).
Birua, Tudak, Pasin Giaman
Ol birua na hevi bilong ples graun em ol samting yumi bai panim long dispela laip olsem COVID-19 pandemik i soim yumi pinis. Long taim pastaim long Nambatu Kam bilong Em, Sevia em i tokaut long ol de bilong bikpela pen bai kamap. Em i tok, “ Bai i gat ol taim bilong hangere, na bikpela sik, na ol guria bai kamap long ol kain kain ples,” (Joseph Smith—Matthew 1:29).
Wantaim dispela ol bikpela pen em tudak na pasin bilong tok giaman bai pulap na raunim yumi. Olsem Jisas i tokim ol disaipol bilong Em, “ Pasin nogut bai pulap” pastaim long Em bai kam bek(Joseph Smith—Matthew 1:30).
Satan em i salim ol lain bilong em na i wok long bagarapim ol wok bilong Bikpela na ol lain husait i sanap long mekim dispela gutpela wok. Bikos long ol planti birua yumi bungim, nid bilong yumi long divain gaidens i mas bikpela moa yet, na wok bilong yumi long harim nek bilong Jisas Krais—em husat i namel man bilong yumi, Sevia, na Ridima—bai kamap moa impoten tru.
Olsem mi bin tok liklik taim bihain long mi kamap Presiden bilong Sios, Bikpela Em i redi long soim tingting bilong Em long yumi. Dispela em i wanpela bilong ol bikpela blesing bilong Em ikam long yumi. 2
Long dispela taim, Em i promisim yumi olsem, “Sapos yu bai askim, yu bai kisim revelesen antap long revelesen, save antap long save“ (Doktrin nNa ol Kavanen 42:61).
Mi save olsem Em bai bekim ol krai bilong yumi.
Hau Yumi Harim Em.
Long save long hau spirit bai toktok long yu em i bikpela samting long dispel dei. Long kisim pesonol revelesen, long painim ol ansa, na long kisim lukaut na painim rot, yumi ken tingim dispela peten o wei Profet Joseph Smith i soim long yumi.
Nambawan, yumi mas go insait long ol skripsa na painim. Taim yumi mekim olsem, tingting na lewa bilong yumi bai open na long ol tising bilong Sevia na long ol trut. Ol toktok bilong Krais “i tokim [ yumi] olgeta samting [yumi] mas mekim” (2 Nephi 32:3), moa yet long dispela taim bilong planti tingting na poret.
Neks, yumi mas beten o pre Pasin bilong beten em i nidim yumi long tingting na mekim, olsem na yumi mas daunim yumi yet long ai bilong God, painim wanpela hap we i nogat nois, we yumi ken go long olgeta taim, taim yumi laik kapsaitim ol lewa bilong yumi igo long Em.
Bikpela i tok,” Kam klostu long mi na mi bai kam klostu long yu; wok hat long painim mi na yu bai painim mi; askim, na yu bai kisim samting,; nok long dua na bai dua i open long yu. ” (Doktrin na ol Kavanen 88:63).
Taim yu kam klostu long Bikpela, yu bai panim gutpela sindaun na tok bilong strongim bel hop na hiling. Olsem na, yumi pre o beten long nem bilong Em long ol wari bilong yumi, ol wiknes bilong yumi, ol samting yumi laikim na ol lain bilong yumi we yumi lavim tumas, ol koling bilong yumi na ol askim bilong yumi.
Na bihain yumi harim.
Sapos yumi stap nil daun long sampela taim bihain long yumi pinisim beten bilong yumi, ol tintgting, na piling na daireksen bai kam insait long tingting bilong yumi. Taim yumi rekodim ol dispela tingting dispela bai halivim yumi long tingim ol wanem samting Jisas Krais bai laikim yumi long mekim.
Taim yumi ripitim dispela proses, yumi bai, bihainim toktok bilong Profet Joseph Smith, “ Gro insait long Prinsipol bilong Revelesen.”3
Weti long Kisim Revelesen
Stretim save bilong yumi long luksave long tok isi isi bilong Holi Gos, na mekim bikpela save bilong yumi long kisim revelesen em i nidim wetines. Wetines ino nidim stretpela pasin, tasol em i nidim olsem yumi traim hat long mekim go bikpela klinpela pasin bilong yumi.
Bikpela em i laikim olsem yumi mas wok hat long wanwan dei, long mekim gut pasin bilong yumi long wanwan dei, long tanim bel long wanwan dei. Wetines bai bringim kam klinpela pasin, na klinpela pasin bai helpim yumi long pilim Holi Gos. Taim yumi kisim “Holi Spirit olsem gaid bilong [yumi]” (Doktrin na ol Kavanen 45:57 45:57), yumi ken kisim pesenol revelesen.
Sapos sampela samting i wok long stopim yumi long opim dua bilong kisim daireksen i kam long heven, ating yumi nid long tanim bel. Pasin bilong tanim bel bai larim yumi long opim dispela dua olsem yumi inap long harim nek bilong Bikpela moa yet na moa klia tu.
“Dispela stended em i klia, ,’’ Elda David A. Bednar bilong Kwarom bilong ol Twelpela Aaposol I i lainim yumi. “Sapos wanpela samting yumi tingting long en, lukim, o mekim i putim yumi longwe long Holi Gos, olsem yumi mas stop long tintging, lukim, harim na mekim dispela samting. Eksampol olsem, sapos dispela samting em i bilong givim hamamas, i pasim rot bilong yumi long Holi Spirit, olsem tru dispela kain hamamas em i no bilong yumi. Bikos Spirit ino inap long stap insait long samting em i no klinpela long ai bilong Bikpela, em i klia olsem ol dispela samting ino bilong yumi. 4
Taim yumi bungim klinpela pasin wantainna pasin bilong harim tok, wantaim fasting, wok hat long painim, pasin bilong stadim ol skripsa, na ol toktok bilong ol Profet i stap laip, na temple wok na femili histori, ol heven bai open. Bikpela bai givim promis bilong Em: “Mi bai givim yu Spirit bilong Mi, na emwe bai laitim tingting bilong yu.” (Doktrin nNa ol Kavanen 11:13).
Bai yumi nid long stap isi, na wet, tasol God bai toktok long yumi long wei bilong Em yet na taim bilong Em yet.
Spirit bilong Mekim Samting i Kamap Klia
Job em i bin tokaut, “ I gat spirit insait long man: na save bilong Bikpela bai givim tingting i kamap klia long ol” (Job 32:8). Insait long dispela niupela yia, mi enkarijim yupela long kisim ol dispela step yu nidim long harim Bikpela moa na moa yet bai yu ken kisim gutpela lait na tingting Em laik givim long yu.
Pastaim long Elda Hale i lusim laip bilong em long dispela dei long Oktoba 2017, em i bin redim wanpela sotpela toktok bilong jenerel konferens tasol em ino bin nap long givim. Insait long dispela toktok em i bin raitim, “Bilip bilong yumi I i redim yumi long stap long ai bilong Bikpela.”5
Taim yumi kisim revelesen, yumi spendim taim insait long ai bilong God taim Em i rivilim tingting bilong Em, na nek bilong Em ikam long yumi (lukim Doktrin na ol Kavanen 68:4). Bai yumi ken putim bilip bilong yumi long eksen, singaut long Em, stap weti long ol promis bilong Em na mekim ol samting Em i autim long yumi.
© 2019 by Intellectual Reserve, Inc. Olgeta toktok hia i bilong Sios tasol Printim long USA. Tok orait long Inglis: 6/19. Tok orait long tanim tokples: 6/19. Tanim Tok bilong Liahona toksave bilong Wanwan Mun Jenueri 2021. Tokples. 17463 878