2020
Juon Kūr eo Elukkuun Utiej
Māe 2020
11:25

Juon Kūr eo Elukkuun Utiej

Jān Joy D. Jones

Būreejtōn eo Eutiej an Būraimere

Āinwōt kōrā in tōmak ro, jemaron̄ epaakeļo̧k pedped in m̧ool ko jān en̄jake ko an Rikanaan Josep eo ej bōktok loļo̧kjeņ n̄an ad bōk revelesōn ko ad make.

Eļap aō kam̧m̧oolol bwe kōnono eo aō rainin emaron̄ pedped wōt ioon eddo ko an kōrā ro, ko me rej wōnm̧aanļo̧k wōt ilo Jepļaaktok eo. Elukkuun alikkar bwe ilo aolep bwebwenato, kōrā ro rekar kabwijere juon jikin eoktak ilo karōk eo an Jemedwōj Ilan̄. Būreejtōn Nelson ekar katakin, “Epen bwe kwōn jon̄e jon̄an kajoor in me … epād ippān kōrā rein, ejjab kōn baam̧le wōt ak ilo Kabun̄ eo an Irooj, āinwōt kōrā in ripālele ro, m̧am̧a ro; im bubu ro, im āinwōt kōrā ro jeid im jatid ak nej jined; āinwōt rūkaki ro im ritōl ro, im eļaptata āinwōt riwaanjon̄ak ro im rijojomar ro reniknik an tōmak eo.” 1

Ilo jinoin Doulul eo an Kōrā ro ilo Nauvoo 178 iiō remo̧o̧tļo̧k, Rikanaan Josep Smith ekar ko̧o̧njeļ e kōrā ro jeid im jatid n̄an “mour n̄an jeraam̧m̧an ko [aer].” 2 Waanjon̄ak eo aer ej katakin kōj rainin. Rekar bōro kuk im ļoor juon ainikien rikanaan im mour kōn tōmak edim ilo Jisōs Kraist ilo aer jipan̄ kajutak pedped eo kiiō jej jutak kake rainin. Kōrā raņ jeiū im jatū, ej kōj eo kiiō. Ewōr ippād juon jerbal jān Irooj, im ad tiljek, jipan̄ ko ad rejej uwaer ko relukkuun aorōk.

Būreejtōn Spencer W. Kimball explained: “Bwe jen erom̧ kōrā ro rewāppen ilo raan ko āliktata ioon laļ in, m̧okta jān itok eo kein karuo an Rilo̧mo̧o̧r, ej juon kūr eo elukkuun utiej. Kajoor im im̧we eo an kōrā eo ewāppen rainin emaron̄ jon̄oul kōttan an ļapļo̧k jān ta eo emaron̄ in pād ilo iien ko rejokne.” 3

Būreejtōn Nelson ekar barāinwōt akweļap: “Ij kajjitōk n̄an sister ro aō ilo Kabun̄ [in] bwe ren … bun̄maanļo̧k! Bōk jikin eo ejim̧we im emenin aikuj n̄an m̧weo im̧ōm̧, ilo jukjuk in pād ko ami, im ilo aelōn̄ in kiin̄ eo an Anij—eļapļo̧k jān kar mokta.” 4

Jet iien em̧ootļo̧k, ikar jeraam̧m̧an, kobaļo̧k ippān juon kurub in ajri in Būraimere, n̄an kobaļo̧k ippān Būreejtōn Russell M. Nelson ilo jikin eo ej bōk jikin m̧weo im̧ōn kar baam̧le eo an Smith ilo Pallmyra, New York. Ron̄jake ilo an rikanaan eo ad ejitōnbōro katakin ajri ro ta eo er remaron̄ kōm̧m̧ane n̄an wōnm̧aantak.

1:55

Sister Jones: “Ikōņaan jeļā eļan̄n̄e ekar wōr juon ami kajjitōk kom̧ kōņaan kajjitōk ippān Būreejtōn Nelson. Kwoj jijet ijin ippān rikanaan eo. Ewōr ke jabdewōt men kwaar baj kōņaan kajjitōk ippān juon rikanaan? Aaet, Pearl.”

Pearl: “Epen ke n̄an erom̧ juon rikanaan? Kwoj ke, āinwōt, lukkuun boub?”

Būreejtōn Nelson: “Aaet epen. Aolep men n̄an kōm̧m̧an n̄an erom̧ āinwōt Rilo̧mo̧o̧r, epen. N̄an waanjon̄ak, ke Anij ekar kōņaan leļo̧k Kien ko Jon̄oul n̄an Moses, ijo ekar jiron̄ Moses n̄an etal n̄ane? Ilōn̄tata ioon juon toļ, ilo ioon Toļ Sainai. Moses ekar aikuj in etetal lōn̄ļo̧k n̄an ilōn̄tata ioon toļ eo n̄an bōk Kien ko Jon̄oul. Kiiō, Jemedwōj Ilan̄ emaron̄ kar ba, ‘Moses, kwoj jino ijeņ, im inaaj jino ijin, im inaaj ioon eok ijeņ ioļapļap.’ Jaab, Irooj ej iakwe kijejeto, kōnke kijejeto ej bōktok nebar ko rejjab maron̄ itok n̄e ejjab kōn kijejeto. N̄an waanjon̄ak, kwonan̄in ke ebbōk kūlaaj in piano?”

Ajri: “Aaet.”

Pearl: “Ij ekkatak violin.”

Būreejtōn Nelson: “Im kwoj kamminene?

Ajri: “Aaet.”

Būreejtōn Nelson: “Ta eo enaaj waļo̧k eļan̄n̄e kwojjab kamminene?”

Pearl: “Kwoj meļo̧kļo̧k.”

Būreejtōn Nelson: “Aaet, kwojjab eddōkļo̧k, kwoj ke? Kōn menin uwaak eo ej aaet, Pearl. Ebōk kijejeto, eļap jerbal, eļap ekkatak, im ejjeļo̧k jem̧ļo̧kin. Em̧m̧an! Em̧m̧an, kōnke aolep iien jej eddōkļo̧k. Mekarta ilo mour in tok jej kōm̧m̧an eddōkļo̧k.”

Uwaak eo an Būreejtōn Nelson n̄an ajri rein raiboojoj ej itok n̄an kōj kajjojo. Irooj ej iakwe kijejeto, im kijejeto ej bōktok nebar. Jen ekkatak wōt. Jej aolep iien eddōkļo̧k to̧o̧n wōt ad kajjieon̄ ļoore Irooj. 5 Ejjab kōtmene ad wānōk rainin. Jej tallōn̄e toļ Sainai eo ad make. Ilo iien ko remootļo̧k iaļ eo ad em̧ool ej bōk kijejeto, buuļ jerbal, im ekkatak, ak wūjlepļo̧k n̄an eddōkļo̧k ej bōktok nōbar ko indeeo. 6

Ta eo eļapļo̧k jej ekkatak jān Rikanaan Josep Smith im Visōn eo M̧oktata kōn kijejeto, buuļ jerbal, im ekkatak? Visōn eo M̧oktata letok n̄an kōj tōl ilo eddo ko ad rejenolo̧k, rej wōnm̧aanļo̧k. Āinwōt kōrā in tōmak ro, jemaron̄ epaakeļo̧k pedped in m̧ool ko jān en̄jake ko an Rikanaan Josep eo ej bōktok loļo̧kjeņ n̄an ad bōk revelesōn ko ad make. N̄an waanjon̄ok:

  • Jej jerbal ium̧win men ko reppen.

  • Jej ālōkļo̧k n̄an jeje ko rekwojarjar n̄an bōk māletlet n̄an kōm̧m̧an ekkar n̄ani.

  • Jej kwaļo̧k tōmak eo ad im lōke Anij.

  • Jej kōjerbal kajoor eo ad n̄an akweļap ippān Anij n̄an jipan̄ kōj kadikļo̧k kareel ko an rikapo eo.

  • Jej leļo̧k kōņaan ko an būruwōd n̄an Anij.

  • Jej mijōk wōt meram eo An n̄an tōl kālet ko ad ilo mour im aenōm̧m̧an n̄e jej oktakļo̧k n̄an E.

  • Jej kile bwe Ejeļā kōj kajjojo kōn etad im eddo ko ad kajjojo n̄an ad kakūrm̧ooli. 7

N̄an kakobaba, Josep Smith ekar kōjepļaaktok jeļāļo̧kjeņ eo bwe en wōr jibadbad ekwojarjar im aorōk indeeo. Kōnke jem̧jerā in ippān Jemedwōj Ilan̄, ij tōmak bwe E ej kōtmene ad bōk revelesōn jān E.

Kōmeļeļe eo an Irooj n̄an Emma Smith ej n̄an “bōk Jetōb Kwojarjar eo,” katak eļap, “likūtļo̧k men ko an laļ in, … pukot men ko rem̧m̧anļo̧k,” im “eddāp n̄an bujen ko” [an] ippān Anij. 8 Ekkatak ej m̧ōttan eo eaorōk n̄an eddōkļo̧k, eļaptata āinwōt m̧ōttā eo emakijkij an Jetōb Kwojarjar eo ej katakin kōj ta eo jej aikuji n̄an kōj kajjojo n̄an ad likūtiļo̧k—meļeļein men eo emaron̄ kōm̧ad kōj ak karūm̧ijļo̧k ad eddōkļo̧k.

Būreejtōn Nelson ekar ba, “Ij akweļap ippāmi n̄an kōļapļo̧k maron̄ in jetōb eo ami n̄an bōk revelesōn.” 9 Naan ko an rikanaan eo ad rej wōnm̧aanļo̧k wōt ippā ilo aō kōļmenļo̧kjeņ kōn kōrā ro im n̄an bun̄ m̧aanļo̧k. Ej akweļape kōj, eo me ej kwaļo̧k ta eo eaorōktata. E ej katakin kōj wāween ad pukot mour ilo juon laļ eobrak kōn jerawiwi ilo ad bōk im m̧akūtkūt ioon revelesōn. 10 Ilo ad kōm̧m̧an āindein, kautiej im mour kōn kien ko an Irooj, jej kallim̧ur, aaet āinwōt Emma Smith kar, “juon kūrawūn in weepān.” 11 Rikanaan Josep ekar katakin kōn aorōk in jeļā bwe iaļ eo jej kōttōpare ilo mour in Anij ekar kōwāppene. N̄e ejjeļo̧k jeļāļo̧kjeņ, jenaaj “jenaaj kajjinōk ilo ad eddōkļo̧k ilo [ļōmņak] ko, im parōk.” 12

Ilo kweilo̧k in, jenaaj ron̄jake m̧ool ko me rej im̧we kōj n̄an oktak, em̧m̧anļo̧k, im karreoikļo̧k mour ko ad. Kōn revelesōn eo ad make, jemaron̄ bōbrae ta eo jet rej ņaetan “tarjen jon̄an kweilo̧k eo eļap”—n̄e jej kapene n̄an kōm̧m̧ane aolepān kiiō. Kōrā ro rej kōņak elōn̄ at ko, ak epen, im ejjab menin aikuj, n̄an kōņake aolepāer ilo juon wōt iien. Jetōb eo ej jipan̄ kōj ļam̧ļame ewi jerbal eo jen mijōke rainin. 13

Iakwe eo an Irooj kōn Jetōb Kwojarjar ej jipan̄ kōj jeļā kāālet eo an eaorōktata n̄an eddōkļo̧k eo ad. Eo̧ron̄ revelesōn ej tōlļo̧k n̄an eddōkļo̧k eo ad make. 14 Jej ron̄jake im jerbale. 15 Irooj ekar ba: “Kajjitōk ippān Jema ilo Eta ilo tōmak im lōke bwe kom̧ naaj bōk, im kom̧ naaj bōk Jetōb Kwōjarjar, eo ej kaalikkar men otemjeļo̧k ko rej mennin aikuj.” 16 Eddo eo ad ej wōnm̧aanļo̧k ej n̄an bōk revelesōn ejjeļo̧k jem̧ļo̧kin.

Ilo ad bōk juon jekjek eļapļo̧k kōn jeļā kōm̧m̧an āindein, jemaron̄ bōk eļapļo̧k kajoor ilo eddo ko ad kajjojo n̄an jerbal in karejar im kōttōbrak jerbal in lo̧mo̧o̧r eo im ijo eutiejtata—n̄an lukkuun “likūtļo̧k men ko an laļ in, pukot men ko rem̧m̧anļo̧k.” 17 Innām jemaron̄ wājabdikļo̧k ilo ad im̧we diktak in epepen eo n̄an kōm̧m̧ane ejja jerbal in wōt.

Ro jeiū im jatū, jej aolep pukot kajoor eo an Anij ilo mour ko ad. 18 Ewōr ippān doon eo eaiboojoj ikōtaan kōrā ro im em̧m̧aan ro ilo aer jipan̄ kadedeikļo̧k jerbal eo an Anij rainin. Jej bōk kajoor eo an priesthood eo kōn bujen ko, kar kōm̧m̧ani m̧oktata ilo dān in peptaij im innām ilowaan tampeļ ko rekwojarjar. 19 Būreejtōn Nelson ekar katakin kōj, “Aolep kōrā ro im aolep em̧m̧aan ro me rej kōm̧m̧ani bujen ko ippān Anij im kōjparok bujen kein, im ro rej bōk kain̄i ko an priesthood eo ilo erreo, ewōr aer maron̄ in deļo̧n̄e kajoor eo an Anij.” 20

Aō make deļo̧n̄e rainin ej bwe ikar jab kile m̧oktaļo̧k ilo mour e aō, me ikar tōpare, kōn bujen ko aō, n̄an kajoor eo an priesthood eo. 21 Kōrā ro jeiū im jatū, ij jar bwe jenaaj kile im kaorōk kajoor in priesthood eo ilo ad “eddāp n̄an bujen ko [ad],” 22 ej kautiej m̧ool ko an jeje ko rekwojarjar, im eo̧ron̄ naan ko an rikanaan ro remour.

Jen kajoor ilo ad kwaļo̧k ad kijejeto n̄an Jemedwōj Ilan̄ im ad Rilo̧mo̧o̧r, “kōn tōmak edim ilo E, atartar wōt ioon tōllo̧ke ko an Eo ekajoor n̄an lo̧mo̧o̧ren.” 23 Jen lan̄lōn̄ im wōnm̧aanļo̧k ilo iaļ in m̧ae jibadbad eo eutiejtata an jetōb eo ad im jipan̄ ro ipeļaakid kōm̧m̧ane ejja wāween in wōt kōn iakwe, jerbal in jipan̄, im tūriamo̧.

Elder James E. Talmage ekar kakeememej kōj, “Jampieon eo eļaptata an kōrā ro im ro repād ilo taitōļ in kōrā ilo laļ in ej Jisōs Kraist.” 24 Ilo etale ko āliktata ikkijeen eddo ko an kōrā me rej wōnm̧aanļo̧k wōt ilo Jepļaaktok eo, im n̄an kōj aolep, ta eddo eo ej aorōkļo̧k? Ij kam̧ool bwe ej n̄an ron̄jake E, 25 n̄an ļoor E, 26 n̄an lōke E, 27 im n̄an erom̧ juon eo ej kadepakpakļo̧k iakwe eo An. 28 Ijeļā Ej mour. 29 Ilo āt eo ekwojarjar etan Jisōs Kraist, amen.

Kakeememej ko

  1. Russell M. Nelson, “Juon kajjitōk n̄an Sister ro Aō,” Liaona, Nob. 2015, 95–96.

  2. Joseph Smith, in “Nauvoo Relief Society Minute Book,” 38, josephsmithpapers.org.

  3. Teachings of Presidents of the Church: Spencer W. Kimball (2006), 217.

  4. Russell M. Nelson, “Juon kajjitōk n̄an Sister ro Aō,” 97.

  5. Lale Katak im Bujen Ko 58:26–28.

  6. Lale Katak im Bujen Ko 6:33.

  7. Lale Josep Smith—Bwebwenato 1:11–17.

  8. Katak im Bujen Ko 25:8, 10, 13.

  9. Russell M. Nelson, “Revelesōn n̄an Kabun̄ in, Revelesōn n̄an Mour ko ad,” Liaona, Māe 2018, 96.

  10. Lale 2 Nipai 9:39.

  11. Katak im Bujen Ko 25:15.

  12. Lectures on Faith (1985), 68.

  13. Lale Katak im Bujen Ko 42:61.

  14. Būreejtōn Henry B. Eyring ekar ba:

    “Kiiō, eļan̄n̄e kwe im n̄a jen kar loļo̧k make iaadro (kōņaan eo aō bwe jen), ijo kwoj en̄jake am̧ jab mijak in kajjitōk jabdewōt men eo kwo kōņaan, imaron̄ pijaikļo̧k am̧ ba menin: ‘O, Bratōr Eyring, em̧ōj aō en̄jake jet iaan men ko kwar kōmeļeļeiki. Jetōb Kwojarjar ekar un̄n̄ūr buruō im ļōmņak e aō jān iien n̄an iien. Ak inaaj aikuj emakijkij eļan̄n̄e ijjab tin luuj ak po ilo m̧oņ. Emaron̄ ke? Emaron̄ ke, im, eļan̄n̄e, ta eo enaaj bōke bwe en maron̄ bōk kōjeraam̧m̧an in.

    “Ekwe, jen jinoe kōn m̧ōttan eo jinoin tata ilo kajjitōk eo am̧. Aet, emaron̄. Jabdewōt iien eo ij aikuj kam̧ool—and Ij aikuj jān iien n̄an iien barāinwōt—I keememej bratōr ro ruo. Nipai im Liai, im rikarijer ro jet an Irooj rej jerbal ippān doon, ej jelm̧ae menin jum̧ae ko reļļap. Rekar jerbal ilo juon laļ eo ej laļ eo me eļapļo̧k wōt jerawiwi ie. Rej aikuj jelm̧ae m̧oņ ko renana. Kōn menin ij peran—im emaron̄ bar kwe—jān naan ko ilo juon iaan eoon ko an Hilamōn Kam̧ool in ekar epād ilo bwebwenato kōn aolepān ta ko rekar waļo̧k ilo aolepān juon iiō, eiten aolepān n̄e enkar rijeje eban kar juon menin kabwulōn̄lōn̄. Ron̄jake:

    “Im ilo kajiljilimjuonn̄oul im ruwatimjuon iiō eo eaar jino wōr eļap akwāālel. A ālikin men kein Nipai im Liai, im elōn̄ iaan ro jeir im jatier ro raar jeļā kōn unin katak ko rem̧ool, kōnke raar bōk elōn̄ revelesōn ko raan otemjej, kōn menin raar kwaļo̧k naan n̄an armej ro, jon̄an raar kōjjem̧ļo̧k e aer akwāālel ilo ejja iiō eo wōt.Hilamōn 11:23.

    “Ekar wōr ippāer ‘elōn̄ revelesōn ko aolep raan.’ Kōn menin, n̄an kwe im n̄an n̄a, menin ej uwaake kajjitōk eo ami jinoin. Aet, jemaron̄ bōk mennin letok eo an Jetōb Kwojarjar ebwe n̄an bōk elōn̄ revelesōn ko aolep raan. Eban pidodo. Ak emaron̄ bōk jikin.” Ta eo enaaj menin aikuj enaaj oktak ok n̄an kajjojo armej kōnke jej jino jān ijo ijo jejeņoļo̧k kake kōn en̄jake ko ad ilo mour in” (“Gifts of the Spirit for Hard Times” [Brigham Young University fireside, Sept. 10, 2006], 3–4, speeches.byu.edu).

  15. Lale 2 Nipai 2:16.

  16. Katak im Bujen ko 18:18.

  17. Katak im Bujen ko 25:10.

  18. Lale Katak im Bujen Ko 121:26, 33, 41, 45–46.

  19. Lale Katak im Bujen ko 84:19-21.

  20. Russell M. Nelson, “Mennin Aorōk ko ilo Jetōb,” Liaona, Nob. 2019, 77.

  21. Lale Russell M. Nelson, “Mennin Aorōk ko ilo Jetōb,” 76–79; Dallin H. Oaks, “Kii ko im Mālim eo an Priesthood,” Liaona, Māe 2014, 49–52; Henry B. Eyring, “Kōrā ro im Ekkatak Gospel eo ilo M̧weo,” Liaona, Nob. 2018, 58–60.

  22. Katak im Bujen Ko 25:13.

  23. 2 Nipai 31:19.

  24. James E. Talmage, Jesus the Christ, 3rd ed. (1916), 475.

  25. Lale Josep Smith—Bwebwenato 1:17.

  26. Lale Matu 4:19–20.

  27. Lale Jabōn Kōnnaan Ko 3:5–6; Katak im Bujen Ko 11:12.

  28. Lale Jon 13:34; Moronai 7:47.

  29. Lale 2 Nipai 33:6; Katak im Bujen Ko 76:22.