Pure nō te mau tuahine tāta’itahi ma te fa’ahiti i tōna iho i’oa

Te Fa’aro’o, Te ’Utuāfare, Te Tōtauturu

ʼUa fa’a’ite mai te mau pāpaʼiraʼa moʼa e rave rahi mau hi’ora’a o te mau tāne ’e te mau vahine tei pure nō vetahi ’ē ma te fa’ahiti i tō rātou i’oa. I roto i te mea fifi mau o te metua tāne ïa o Alama tamaiti. ’Ua paraparau te hō’ē melahi ia Alama tamaiti, ma te parau ē « ’ua pure ho’i [tōna metua tāne] ia ’oe ma te fa’aro’o rahi… ’e nō reira i haere mai ai au e fa’a’ite atu ia ’oe na i te mana ’e te pūai o te Atua ra, ’ia fa’ati’ahia te pure a tōna ra mau tāvini mai te au i tō rātou ra fa’aro’o » (Mosia 27:14).

Te purera’a nō te tahi ’e te tahi, e ’īriti ïa i tō tātou ’ā’au nō te fāri’i i te mau ha’amaita’ira’a o tā te Fatu e hina’aro ra e hōro’a mai nō tātou. « Te fā o te pure e ’ere ïa i te tauira’a i te hina’aro o te Atua, o te fāri’ira’a rā nō tātou iho ’e nō vetahi ’ē i te mau ha’amaita’ira’a tā te Atua i ineine i te hōro’a mai, e tītauhia rā ia tātou ’ia ani nō te fāri’i ».¹

’Ua fa’ati’a mai te hō’ē tuahine ē, i roto i te hō’ē tau fifi o tōna orara’a, e tae pinepine mai te hō’ē niuniu ’aore rā te hō’ē parau poro’i ’ōhie nā roto mai i tōna mau tuahine hāhaere, i « te mau mahana hepohepo mau iho ā rā ». E au ra ē, ’ua ’ite maita’i rāua i te taime e hina’aro ai ’oia i te tauturu. ’Ua ’ite ’oia ē, tē pure nei rāua nōna, ’oia ho’i i te mau taime e fārerei ai rātou ’e i te mau taime o rāua ana’e iho.

« ’A feruri na i tō tātou pūai ’ia ’āmuihia, mai te peu e pure te tuahine tāta’itahi ma te ’ā’au tae i te mau po’ipo’i ’e i te mau pō ato’a, hau atu ā, ’ia pure tu’utu’u ’ore mai tā te Fatu i fa’aue mai », ’ua parau ’o Julie B. Beck, peresideni rahi tahito nō te Sōtaiete Tauturu.² E ha’apūai te purera’a nō te feiā tā tātou e hāhaere ra, ia tātou ’ei ta’ata iho ’e ’ei mau vahine feiā mo’a i te mau mahana hope’a nei

’Ua parau te peresideni Henry B. Eyring, tauturu hō’ē i roto i te Peresidenira’a Mātāmua ē : « E pure atu ’outou nō te rāve’a ’ia ’ite i tō rātou ’ā’au… Tītauhia ’ia ’ite mai ’outou i te mea tā te Atua e hina’aro ’ia rave ’outou nō te tauturu ia rātou ’e ’ia rave pauroa i te reira, i te fāito maita’i roa a’e e roa’a ia ’outou, ma te putapū i tō te Atua here nō rātou ».³