Thawj Pawg Thawj Tswj Hwm tsab Xov, Ib Hlis Ntuj 2018
Lub Txiaj Ntsim uas Yog Kev Hloov Siab Lees Txim
Los ntawm Thawj Tswj Hwm Thomas S. Monson
Thawj Tswj Hwm Thomas S. Monson tau qhia tias, “Peb txoj kev lav ris yog qhov uas peb yuav tsum muab peb txoj kev ua dog dig hloov kom txawj ua, hloov qhov uas peb ua tsis taus kom thiaj li ua taus. Peb lub luag hauj lwm yog kho peb tus kheej kom zoo tshaj. Vajtswv ib lub txiaj ntsim zoo tshaj plaws yog kev xyiv fab thaum peb rov qab sim ua dua, vim qhov uas peb ua tsis taus yeej tsis yog qhov kawg.”1
Feem ntau peb xav tias peb yuav cuab hom phiaj thiab kho peb tus kheej thaum txog xyoo tshiab. Peb cog lus tias peb yuav hloov, ua zoo dua, thiab rov qab sim ua. Tej zaum txoj kev tseem ceeb tshaj plaws uas peb yuav rov qab sim ua yog qhov uas Thawj Tswj Hwm Monson hu ua “lub txiaj ntsim uas yog kev hloov siab lees txim.”2
Nyob hauv tej zaj lus los ntawm nws tej lus qhia txij thaum nws los ua tus Thawj Tswj Hwm ntawm lub Koom Txoos, Thawj Tswj Hwm Monson ntuas peb kom “muab Khetos cov ntshav theej txhoj xwv kom peb yuav tau txais txoj kev zam txim rau peb tej kev txhaum, thiab kom peb tej siab yuav dawb huv.”3
Txuj Ci Tseem Ceeb uas yog Kev Zam Txim
“Peb txhua tus twb xaiv ua yuam kev. Yog tias peb tseem tsis tau kho tej ntawd lawm, kuv cog lus rau nej tias muaj ib txoj kev rau nej kho tau. Kev txheej txheem no hu ua kev hloov siab lees txim. Kuv thov kom nej kho tej yam uas nej tau ua yuam kev. Peb tus Cawm Seej twb tuag kom nej thiab kuv txais tau lub txiaj ntsim zoo no. Txawm yog txoj kev no tsis yooj yim, cov lus cog tseg no muaj tseeb tiag: ‘Txawm yog nej tej kev txhaum yauv liab cuag ntshav los kuv yuav ua kom dawb pawg li daus’ [Yaxayas 1:18]. Thiab tus Tswv yuav tsis nco ntsoov txog tej ntawd ntxiv lawm [Q&K 58:42]. Tsis txhob ua tej yam kom tso nej txoj sia nyob mus ib txhis tseg. Yog tias nej tau ua txhaum, yim sai nej rov qab los, yim sai nej yuav nrhiav tau kev kaj siab lug thiab kev xyiv fab uas los ntawm txuj ci tseem ceeb uas yog kev hloov siab lees txim.”4
Rov Qab Los txog txoj Kev Yog
“Txawm tias peb yuav tsum ua tib zoo xaiv, tseem muaj tej lub sij hawm thaum peb xaiv yuam kev. Lub txiaj ntsim ntawm kev hloov siab lees txim, uas peb tus Cawm Seej muab rau peb, cia peb kho peb txoj hau kev, xwv kom peb thiaj yuav rov qab mus taug txoj kev uas coj peb mus rau lub yeeb koob xilethi-aus uas peb xav tau.”5
Txoj Kev Rov Qab Los
“Yog nej leej twg ua yuam kev, kuv qhia rau nej tias muaj ib txoj kev rov qab los. Kev txheej txheem no hu ua kev hloov siab lees txim. Txawm txoj kev hloov siab lees txim yog ib txoj kev nyuaj, nej txoj kev cawm seej nyob mus ib txhis nyob ntawm seb nej puas ua. Puas muaj dab tsi ntxiv uas tsim nyog nej ua? Kuv thov kom nej txiav txim siab tam sim no hais tias nej yuav ua txhua yam nej yuav tsum ua kom hloov siab lees txim tag nrho. Yim sai nej yim yuav muaj kev kaj siab lug thiab kev thaj yeeb zoo li Yaxayas hais [saib Yaxayas 1:18].”6
Tib Neeg Yeej Muaj Peev Xwm Hloov Siab
“Peb yuav tsum nco ntsoov tias tib neeg muaj peev xwm hloov siab. Lawv muab lawv tej cwj pwm tsis zoo tso tseg los tau. Lawv hloov siab lees txim rau lawv tej kev txhaum los tau. Lawv tsim nyog tuav lub pov thawj hwj los tau thiab. Thiab lawv rau siab pab ua tus Tswv txoj hauj lwm los tau thiab.”7
Rov Qab Hloov Los Ua Neeg Huv
“Yog tias muaj dab tsi tsis zoo hauv nej lub neej, yeej muaj ib txoj kev uas nej tawm tau. Tsum tsis txhob ua kev tsis ncaj ncees ntxiv. Nrog nej tus npisov tham. Muaj teeb meem dab tsi los nej yeej kho tau los ntawm kev hloov siab lees txim. Nej rov qab ua tau neeg huv dua.”8
Tus Cawm Seej lub Luag Hauj Lwm Tseem Ceeb
“Lub hauv paus rau txoj hau kev [cawm seej] no yog peb tus Cawm Seej, Yexus Khetos. Yog tsis muaj Nws txoj kev theej txhoj, ces txhua yam tsav yuav plam mus. Tiam sis, txoj kev ntseeg Nws thiab Nws tej hauj lwm, yeej yuav tsis txaus. Peb yuav tsum ua hauj lwm thiab kawm, tshawb nrhiav thiab thov Vajtswv, hloov siab lees txim thiab ua neeg zoo dua. Peb yuav tsum paub Vajtswv tej kev cai thiab ua raws li tej ntawd. Peb yuav tsum txais Nws tej kab ke uas cawm tau neeg. Tsuas yog thaum peb ua tej no peb thiaj yuav tau kev zoo siab tiag tiag, uas kav mus ib txhis.”9
© 2018 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv: 6/17. Pub txhais ua lus Hmoob: 6/17. Kev txhais First Presidency Message, January 2018. Hmong 15045 295