Ol Profet long Soim Rot long Yumi

Sampela yia i go pinis, mi wok long sindaun insait long rum long Salt Lake Temple we Nambawan Presidensi na ol Koram bilong ol Twelpela Aposol i save bung wanwan taim insait long wanpela wik. Mi lukluk go antap long banis dispela i lukluk ikam long Nambawan Presidensi, na long hap mi lukim gut ol piksa bilong wanwan long ol Presiden bilong Sios.

Taim mi lukluk i stap long ol, ol lain i go pas long mi—stat long Profet Joseph Smith (1805–44) i go long Presiden Gordon B. Hinckley (1910–2008)—mi ting, “Hau mi hamamas na tok tenkyu long kaunsel bilong ol wanwan.”

Dispela em ol impoten man husat no bin surik, na no bin guria, na no bin pundaun. Dispela ol man bilong God. Taim mi tingting long ol profet bilong dispela taim husat mi bin save long ol na lavim ol, mi tingim bek ol laip bilong ol, na ol gutpela pasin bilong ol, na ol tising bilong ol dispela i save litimapim tingting.

Presiden Heber J. Grant (1856–1945) bin Presiden bilong Sios taim mi bin bon. Taim mi lukluk gut tru long laip bilong em na long ol tising bilong em, mi bilip long wanpela strongpela gutpela pasin Presiden Grant i save soim em dispela pasin bilong strongim tingting—pasin bilong strongim tingting long ol dispela samting i gutpela na nobel.

Presiden George Albert Smith (1870–1951) bin Presiden bilong Sios long taim mi bin sev olsem bisop long wod bilong mi long Salt Lake City. Em i bin lukim gut olsem i gat istap wanpela bikpela pait bilong pulim igo ikam wok long kamap namel long Bikpela na enimi. “Sapos yu bai stap long sait bilong Bikpela,” em i bin tis, “yu bai stap ananit long pawa bilong em na bai yu nogat laik long wokim rong.”¹

Long yia 1963 Presiden David O. McKay (1873–1970) bin singautim mi long sev olsem memba bilong Koram bilong ol Twelpela. Em i bin tisim tingting long ol narapela lain long wei em i bin stap long laip bilong em. Em tok, “Trupela Pasin bilong kamap Kristen, em long soim lav olgeta taim.”²

Presiden Joseph Fielding Smith (1876–1972), wanpela bilong ol man insait long Sios husat i save raitim planti samting, ibin gat skul bilong gospel olsem wanpela strongpela tok bilong soim rot long laip bilong em. Em i save ridim ol skripsa olgeta taim na em i save stret long ol tising na doktrin istap insait long ol olsem tasol sampela lain mi save tu long ol.

Presiden Harold B. Lee (1899–1973) ibin sev olsem stek presiden bilong mi taim mi liklik mangi. Wanpela tok em ibin save gat bikpela laik long em “Yu mas sanap long ol holi ples, na noken muv.”³ Em ibin save strongim bel bilong ol Sen long stap klostu, na harim stap, ol toktok isi bilong Holi Gos.

Mi bilip olsem wanpela strongpela tok long soim rot insait long laip bilong Presiden Spencer W. Kimball (1895–1985) em bai mas dedikesen. Em ibin dediketim em yet wantaim olgeta bel bilong em long Bikpela. Em ibin detiketim em yet tu long stap insait long gospel.

Taim Presiden Ezra Taft Benson (1899–1994) ibin kamap Presiden bilong Sios, em ibin singautim mi long sev olsem Nambatu Kaunsela bilong em insait long Nambawan Presidensi. Lav ibin wanpela strongpela tok long soim rot bilong em, dispela i stap insait long tok em i save laikim tru, Sevia yet ibin tokaut: “Yu bai mas stap olsem man wantaim wanem kain pasin? Tru Mi tokim yu, olsem tasol Mi i stap.”⁴

Presiden Howard W. Hunter (1907–95) ibin wanpela man husat i save painim ol gutpela samting tasol long ol narapela lain. Olgeta taim em i save gutpela long ol narapela lain; olgeta taim em i save gat daun pasin. Em ibin privilis bilong mi long sev olsem Nambatu Kaunsela bilong em.

Presiden Gordon B. Hinckley ibin tisim yumi long wokim olgeta taim best bilong yumi. Em ibin tokaut wantaim pawa testimoni bilong em long Sevia na misin bilong Em. Em ibin tisim yumi wantaim lav. Em ibin wanpela ona na blesing bilong mi long sev olsem Nambawan Kaunsela bilong em.

Sevia i save salim ol profet bikos Em i lavim yumi. Long jenerol konferens dispela mun Oktoba, ol Jenerol Atoriti bilong Sios bai gat gen dispela privilis long sharim tok bilong Em. Yumi kam long dispela risponsibiliti wantaim pasin bilong soim olsem dispela em i impoten na daun pasin.

Yumi bles stret olsem dispela Sios bilong Jisas Krais dispela em i kambek pinis i stap nau antap long dispela graun na dispela Sios i kamap antap long ston bilong revelesen. Dispela revelesen i wok long kamap yet em i blut i givim laip long gospel bilong Jisas Krais.

Inap long yumi redi long kisim revelesen bilong yumi wanwan olsem bai kam planti moa long jenerol konferens. Inap long lewa bilong yumi bai pulap wantaim strongpela tingting tru taim yumi putim han bilong yumi go antap long sasteinim ol profet na aposol bilong yumi husat i stap nau. Inap long yumi kisim klia tingting, kisim tingting bilong litimapim yumi, kisim kamfort, na kisim strong taim yumi harim toktok bilong ol. Na inap yumi redi long promisim yumi yet gen long Bikpela Jisas Krais gospel bilong Em na wok bilong Em na stap wantaim nupela desisen long holim pas ol komanmen bilong Em na wokim laik bilong Em.