Emekot Mbufo esin ke Utom

Ini emi Prpphet Joseph Smith okokotde Elder Heber C. Kimball (1801–68) ete “okokpohore usung erinyanga-ukpong’’ nte okworo-iko Abasi ke England, Elder Kimball ekekere-ke-esit ete ke imo idikemeke.

Enye ekewet ete, “O, Abasi, ami ndi owo ekek, ndien ke ofuri ndaha ndotke ndinam oruk utom emi.’’

Elder Kimball ama enyime ikoot oro nte ededi, edi eting ete: ‘’Mme ekikere emi ikakpanke mi ndinam ubiong-utom oro; inikiet eke ami nkofiokde uduak Ete mi ke Enyong, ami mma nnam ubiere ndinwana ye kpukpru nkpo-idomo, nnim-ke-akpaniko nte ke Enye eyeda akwa odudu Esie osongo mi idem, onyung anam mi ndot ndibo ofuri odudu eke ami nyomde.’’¹

Mme mkpri ndito-eka mi irenowo ye iban emi ekekotde mbufo esin ke oyoho-ini utom ukworo-iko Abasi, ekekot mbufo esin ke utom koro mbufo, ukem nte Elder Kimball ‘’emenyene udong ndinam utom nno Abasi’’ (D&C 4:3) ndien ke mbufo emebenge-idem enyung edot.

Mme ikpo couples, ekekot mbufo esin ke utom eno ukem ntak oro. Nte ededi, mbufo ididaha udong ndinam utom kpot esin ke utom edi eyeda ifiok emi enyenedeeto ke mme ediwak-isua nwaidem, ima, ye ifiok emi Ete mbufo ke Enyong edinode etuuk esit ndito Esie irenowo ye iban eke eyomde akpaniko. Nyikke koro mbufo emefiok ete ke nnyin idikemeke nditim mma Abasi ofon ke nnyin minamke utom ino Enye oto ke ndinwam mbon efen.

Ke udong mbufo ndinam utom nte mme okworo-iko Abasi, mbufo eyeda mbuotidem ye isongesit, uko ye osongo, ubiere ye iwuk, nsinifik ye nwaidem enam utom. Mme obuotidem okworo-iko Abasi ekeme ndinam mme utibe-nkpo ke inwang utom.

President John Taylor (1808–87) edimen mme akpan edu eke mme okworo-iko Abasi owut ke usung emi ete: “Oruk irenowo [ye iban ye couples] emi nnyin iyomde nte mme andikpeb etop iko Abasi edi irenowo emi enyenede mbuotidem ke Abasi; irenowo emi ekponode itie oku mmo, irenowo emi … Abasi enemde-esit abanga. … Nnyin iyom irenowo emi eyohode ye Edisana Spirit ye odudu Abasi[,] … irenowo ukpono, akpaniko, nti-ido ye edisana-uwem.’’²

Jehovah okofiori ete:

“Koro sese inwang adat koyom ukpenge; ke ntre, owo eke ebengede-idem ada nkpo-utom esie ke ukeme esie, enye nko editum nkpo onim ke ubet mbak enye okutak, edi ada erinyanga ono ukpong esie;

“Ndien mbuotidem, idorenyin, ima, ye ndiwuk enyin nse ubong Abasi, eyenam enye odot ke utom oro’’ (D&C 4:4–5).

Ikoot mbufo ekedi oto ke uduak Abasi. Ami nting-iko ntiense nte ke owo emi Abasi okotde, ke Abasi eyenam enye odot ke utom. Mbufo eyebo unwam Abasi ke nte mbufo edade-akam enam utom ke inwang-utom Jehovah.

Ndiye enwongo emi Jehovah okonode mme ebe-iso okworo-iko Abasi ke eyo emi, nte odude ke Nwed Doctrine ye Covenants, eyedi okuo ete: “Ami nyebem mbufo iso nka. Ami nyedu ke ubok nnasia ye ubok ufien mbufo, ndien Spirit mi eyedu ke esit mbufo, ndien mme angels mi ekanare mbufo ekuk, ndikpeme mbufo” (DC 84:88).

Nte mbufo enamde utom, mbufo eyenyene mme inem editi-nkpo ye ufan ke nsinsi. Ami mfiokke inwang-utom efen emi ekpengede uyoho nti idok eke inemesit odude akan inwang-utom eke mission.

Idahaemi, item eke mme elders, sisters, ye couples emi, ke suto ntak ekededi, eke midikemeke ndikure uyoho-ini emi ekenimde eno mmo ke inwang utom: Jehovah ama mbufo. Enye obo nwaidem mbufo. Enye ofiok se ikpude mbufo. Diongo ete ke Enye osuk enyenyene utom ono mbufo ndinam. Ku yak Satan eting nkpo efen ono mbufo. Ku kpa mba; ku kop mmemidem; ku duok idorenyin.

Nte ami nkekutde ke akwa mboho ibighike ke ema ekekot mi ete ndaibuot ke Ufok Abasi: “Ku kop ndik. Esong esit. Ini iso ayama ukem nte mbuotidem mbufo.’’³ Enwongo oro osuk edi akapaniko ono mbufo. Ntre ku duok idorenyin mbufo, koro Jehovah iduokke idorenyin ke idem mbufo. Enim mme ediomo mbufo enyung eka iso.

Ererimbot eyom iko Abasi Jesus Christ. Yak Jehovah odiong kpukpru Ndisana Ikot Esie—ke ebiet ekededi emi nnyin inamde utom—ye esit okworo-iko Abasi.