Kuh Fokoko luhn Jisus Kraist ac Iwaclah Lal

“Oasr ku luk in oru ma nukewa ke ku su Christ el ase nu sik” (Philippi 4:13). “Kuht nohfohn finne oasr mwe muhnahs la, kuht kuh in kuhtanguhloslac,” Prestuhn Dieter F. Uchtdorf, Mwet in Kahsruh Ahkluo ke Prestuhnsi Se Met el fahk. “Pwacyena lah ke luhng kuhlwacng luhn God oruh, kuht fin ahkpuhsisaclye kuht sifacna ac oasr luhlahlfongi la, mwe muhnahs uh kuh in eklac fokoko.”¹

Mwet Lahngo lasr El fahk ke Doctrine and Covenants lah El fah som ye muhtahsr. El fah oasr ke lacpoh lacyot ac lacsac lowos, ac Nguhn Lal fah oan insiyacsr, ac lihpufacn Lal fah raunikuhtlac, in sruhk kuhtyak (liye D&C 84:88).

“Nephi el sie srihkasrak ke sie mwet suc etuh, kahlwem, ac luhlahlfongi ke kuh fokoko luhn Mwet Lahngo,” Elder David A. Bednar ke U luhn Mwet Sap Singucul Luo ah fahk. “Tamuhlwel wiyacl Nephi ah kaprilyac ke mwe kapihr ac plwacnwelah in kuhnahsosuhllah. Nuhnak muhnahs liye pruhe lal Nephi: ‘O Leum, in oacna nuh ke luhlahlfongi luhk ma oasr in Kom, yac Kom kuh in moliyuclac liki poum tamuhlwel wiyuck; ahok, finne in use nuh sihk kuh tuh nga in kuh in kuhnahoslah mwe kapihr inge ma nga kapriyucki kac’ (1 Nephi 7:17; ahkuhtweyac wo ituckyang).

“… Nephi el tiacna pruhe tuh ohiyac el oasr kac uh in eklac. Sahyacna, el pruhe nuh ke kuh in ekuhllah ohiyac el oasr kac uh. Ac nga luhlahlfongi lah el pruhe ke ohiyac sena inge ke srihpen el etuh, kahlwem, ac tuh puhlakihn kuh fokoko ke Iwaclah uh.

“Nga tiacna pahngon sucl ma kaprilyac Nephi ac ke usrnguck tuh puhtatlac likina pahol. Sahyacna, nga luhmahack lah el ahkinsewowoyeyuck ke kwewana kuh kalweniyuck ac kuh lal sifacna ahluhkwelah kuh fal lal, lah ke pacl sacn el oasr ‘ke kuh luhn Leum’ (Mosiah 9:17) orekma ac tuhlahlah ac ollah na sucl ah, ac sahflahiyac ac pwacyelah kuh in otwelah kapihr an.”²