Iren Mahsen en Presidensi Keieu, Mahs 2017
Perehrehkihda Mour Pwung
Sang President Henry B. Eyring
Sounsawas Keieu nan Presidensi Keieu
Sapwellimen Koht Soukohp pohn sampah, President Thomas S. Monson, kalohkihdahr me: Rahn wet, dihp laud kapel kitail penehr, kitail pelipelian dihp, oh wiewia suwed me kin wiewiawi mwohn masatail kan.1
Kumwail sou pahn pwuriamweiki ma kumwail esehda me President Monson masanih ier mahsen pwuko sounpar 50 samwalahro? Ma soangen dihp suwed pwukat kapil kitailpenehr mahs me kitail sohte kak pelian, ia pahn uwen kehlail en ah pahn song kitail rahn pwukat? Kitail paiamwahu, pwehki Kauno pein kasalehiong kitail me nan atail mwehi. “Kitail en kilang, pwe doadoahk en me suwedo pahn udahn kehlail” (D&C 38:12).
Mahwin me “kitail ieiiang ansouwet”2 tepdahr mwohn atail ipwidi pohn sampah. E tepdahr mwohn sampah wet eh kepikpikda. E tepdahr sounpar kid kei mwhon atail kohdo nan mour wet, wasa me Sehdan uhiengada oh song kasohrala saledek en pilipil en aramas (Moses 4:3).
Sehdano lohdi nan mahwino oh “pisikendiongehr sampah” (Kaudial 12:9), wasa e mahmahwin ie rahn wet. Pohn sampah wet “e kin mahwinieng souleng en Koht kan, oh e kapelekinrailpenehr” (D&C 76:29) likamw kan, widing, oh kasongosong kan.
E kin mahwinieng soukohp kan oh wahnparon kan. E kin pelian kosonned en mwakelekel oh wiewia mwahu en nan pwopwoud. E kin pelian peneinei oh tehnpas sarawi. E kin pelian dahme mwahu, sarawi, oh sarawi.
Ia duwen atail kak pelian imwintihti menet? Ia mwomwen atail pahn peieng wiewia suwed me miehier me ikiparpesengehr nan sampah? Dahme atail mehn perehre? Ihs me kak seweseikitail?
Manaman en Simpwuhlo
Soukohp Joseph Smith padahngki me Sehdan kak kaloweikitaildi ihte ma kitail mweidehng.3
Ni eh wehwehki kahpwal pwukat, Nephi eri kilangada manaman en Simpwuhl en Koht, ni eh mwerediheng pohn souleng en mwomwohdiso en Simpwuhlo, oh pohn seri en inou kan en Kauno, me ikiparpesengehr pohn sampah, oh irail kapwatkidahr mour pwung oh manaman en Koht ni lingan kouahlap (1 Nephi 14:14; lipw tohrohr kapatapatehng).
Ia mwomwen atail pahn pererehkihda mour pwung oh manaman? Kitail kin kesempwaliki Rahnsarawi oh wauneki prihsduhd. Kitail kin wiahda oh kolokol inou sarawi kan, koadoakehda poadepen atail peneinei, oh kohla nan tehnpas sarawi. Kitail kin nantiheng koluhla ansou koaros oh peki Kauno en ketin “doadoahngki tomwpen ntahn Sises Krais pwe kitail en kak alehda mahkpen dipatail akan” (Mosiah 4:2). Kitail kin kapakap oh papah oh kadehde oh doadoahngki atail pwoson Sises Krais.
Kitail pil kin pererehkihda mour pwung oh manamano ni atail kin “kesempwaliki mahsen en mour kan” ansou koaros nan atail madamadau kan (D&C 84:85). Kitail kin kesempwalki mahsen pwukat ni atail kin douloale iren pwuhk sarawi kan oh mahsen kan en sapwellimen Kauno soun papah pilipil kan, me pahn ehukiong kitail Kupwure, Sapwelllime madmadau, oh kepitie (tehk D&C 68:4) nan kapokon lap en sounpwong kohkohdoh.
Nan atail mahmahwinieng tepelo, kitail anahne tamataman ansou koaros me mie sawaspatail sang pali koaros en kahdeng me irei kitail pesengo. Sawaspatail kan iei Koht Sahm, Kauno Sises Krais, oh Ngehn Sarawio.
Me pil kin seweseikitail iei sounpein nanleng kan me kitail sohte kin kilang. Elihsa masanihong sapwellime laduo me masakadahr pwihn en sounpei suwedo,“Dehr masak,” “pwe iangata kan tohtohsang iangarail kan” (tehk 2 Nanmwarki kan 6:15–16).
Kitail sohte anahne masak. Koht kin ketin poakohng Sapwellime Souleng kan. E sohte pahn ketin likidmehliei kitailla.
I ese me Koht, ni Eh kin ketin sapeng kapakap, E kin ketin karonge atail pekipek kan oh doareikitail sang me suwedo. I kadehde me sang ni sawas en Koht Sahm, Sounkomour en sampah, oh Ngehn Sarawi, kitail kak kamehlele me kitail pahn alehdi manaman me laudsang dahme kitail anahne pwehn powehdi kasongsong kan en tepelo me kitail kin sohsohpai.
Kitail en kin perehkin kitailda ansou koaros mour pwung pwe kitail en ahneki likilik me kitail kak powehdi.
© 2017 by Intellectual Reserve, Inc. Kolokol pwuhng koaros. Ntingdahr nan USA. Kamanaman ong lokaiahn wai: 6/16. Kamanaman ong kawehwe: 6/16. Kawehwehpen First Presidency Message, March 2017. Pohnpeian. 97923 885