“Nin Duwen Ei Poakehng Kumwail”

Sounpar kei samwalahro emen kempoakepahi me adaneki Louis ndahieng ie soi kempoake pwoat me pid ah nohno limpoako. Ni eh kapelsalehdala, liho sohte kihdiong nah serihkan kiden mwohni ahpw sohsohn karasaras mwahu, nan tohnmetei oh peik.

Mwurin kapahrek kan eh wiawiher oh kapar en aramas pahtouo wiawilahngehr ni sousouko, peneineio eri pwurala oh tehk nan e liho dipwisou malaulau kan dahme nohnohu pwilikihdi. Louis diar kih ehu oh kisin likou kis nan dipwisou ko. Kisinlikouo nda: “Nan keimw en perehn meiro, nan kepin ahi kohpwao, mie kisin kakon ehu. Me audaudkihda audepen ahi mohngiong. Kih wet pahn langahda kakono.”

Irail koaros pwuriamweiki dahme nohn kesempwal me arail nohnou lokehdi oh nekidala.

Kisin kakono eri wisikdo sang wasa e wie nekinek ie oh irail eri pahkada ni keneinei. Ni en Louis oh iengehkan arail dauwih audepen kakono, irail diar kilel en emen emen seri iangahki eden serio oh ah rahn en ipwidi, Louis eri waikada kisin likou en valentine ehu me aramas ntingihdahr. Nting kan duwehte mengin pehn seri, me e kasawihda me mengin peh, e wadek lokaia kan me ntingihdi ele sounpar 60 samwalahr. “Nohno, I poakepoake iuk.”

Mohngiong kan laloid, ngihl kan tikitik, oh mie pilen nan mas akan. Dahme nohnou kesempwaliki iei ah peneinei soutuk. Me pahsonki pahson tengeteng oh kehlail iei “I poakepoake iuk.”

Nan rahn pwukat nin sampa, sohte ehu wasa me anahne pahson en limpoak tengeteng wet likin peneinei. Oh sohte ehu wasa nan sampa me ehu karasaras en limpoak tengeteng wet kin kak dierek ie likin nan peneinei kan en Souleng en Imwin Rahn-akan me pasonkidahr limpoak wet nan mour en arail peneinei.

Ong kitail kan me kin wiahki me kitail wia tohpadahk kei en Sounkomour Sises Krais, E ketkihong kitail kehkehlik wet:

“I pahn kihong kumwail kosonned kapw ehu, kumwail en poakpene nanpwungamwail; duwen ei poakehng kumwail, iei duwen kumwail en poakpene.

“Pwe ihme aramas koaros pahn esehki me kumwail nei tohnpadahk kei, ma kumwail pahn limpoakpene” (Sohn 13:35).¹

Ma kitial pahn kapwaiahda kosonned en poakpene nanpwungatail, kitail anahne poakpene oh wauneki emen emen kitail, kasakasalepene atail poakpene ni atail kin ehupene rahn koaros. Limpoak me kin kapwarehda koasoi mwahu, kanengamah, tohnmetei, wehwe oh mahk pene mehlel. Nan atail ehupene kan koaros, mwohmw pwukat oh me duwehte pahn sawas kasalehda limpoak en nan mohngiongitail kan.

President Gordon B. Hinckley (1910–2008) koasoia: “Limpoak … iei kohpwahn kohl ehu me mihmi ni imwin iahiaho. Ahpw e kin kesempwalasang ni imwin iahiaho. Pwe limpoak me kin pil tapiada, oh me lingan koaros me kin kaperenda rahn kapahtou ehu kin tepsang limpoak. Limpoak me kapikada koapworopwoar me kahrehiong en serihkan sakon, me pwulepwul kan ouraman, katengepe pwopoud, kamatoar oh kauhdi uhpene oh akamai kan nan peneinei; kameleilei me mah kan, oh wia kamarain pen koapworopwoar ehu me powehdi mehla. Ia uwen kapai ong irail kan me pereniki mepwukat ni arail kin ehueng arail peneinei, kempoakparail kan, mwomwohdiso oh mehn mperail kan.”²

Limpoak iei me wia pahson en rongamwahuo, wiewia me keieu kesempwal nan mour en aramas. Limpoak me kin komourla peneinei kan, wasahn kouson kan, oh wehi suwed kan. Limpoak iei pohkomwokomw ehu, oaloahl ehu, koasoi kadek ehu oh kaping mehlel ehu. Limpoak iei meirong, papah oh tohnmetei.

Ohl akan, poakehng amwail pwoud kan. Kin wauneki oh itarki mehkoaros me irail kak wia. Lih akan, poakehng amwail pwoud kan. Kin wauneki oh kakehlailih irail.

Pahpa/nohno kan poakehng noumwail serihkan. Kapakap kin irail, kasukuhli irail, oh kadehde ong irail. Serihkan, poakehng amwail pahpa/nohno kan. Kasalehiong irail wahu, kalahngan, oh peik.

Ma sohte limpoak mehlel en Krais, Mormon kaweidki, “sohte mehkot kitail,”³ Iei ahi kapakap kitail en idawehn en Mormon kaweid en “kapakap ong Sahmo sang ni kehl en amwail mohngiong kan koaros pwe [kitail] en kak audaudkihda limpoak wet; me e ketikihongehr pohn koaros me kin idawehn mehlel sapwellime Ieros, Sises Krais; pwe [kitail] en kak wiahla sapwellimen Koht serihkan; pwe ni ansou me e pahn ketin pwurodo, kitail pahn duwehla ih.”⁴