Kainenehieng nan werenge

Kesik mahs a mwuri kapwonopwonih wasa ke kaskiho kak ekis kemenkouruhr, ahpw ekei pak kitail kin kilang soangen wiewia wo nan ekei mour en ansouwet.

Ni atail wia tohn Mwomwohdiso, kitail ahniki ansou en patehng kemwekid en mwomwohdiso kan, soahng teikan, oh pil padahk kan me mwahu, kesemwpwal, de kaperen ong kitail. Kitail kin ale kasongosong pwehn kilelehdi, pwe kitail en kin kamehlele me ih udahn padahk en rongamwahuo me kitail kin momourki.

Met mengein wia.

Sang mahs kohdo kitailkin ale kaweid kaselel oh kaweid en ngehn sarawi sang rehn sapwellimen Koht soukop kan. Kitail pil kin alehdi kaweid oh kawehwehpe sang soangen pwuhk wiawihda kan, pwuhk en kaweid kan, oh pwuhk en sawas kan en Mwomwohdiso. E mengei kitail en pilada oaralap en rongamwahuo me kitail keieu pwungki, oh kapwonopwoniala, oh wiahda ehu kadehdehpen me kitail diarehr dahme kesempwal me pid rongamwahuo.

Met sohte wia ehu kahpwal me weksang soahng teikan rahn pwukat. Mahs, kaun en mwomwohdiso kan , kin doadoahngkihla pali lauden arail ansou kaikairakidi, kasakasosohngpene, oh akahkamaiki mehnia nan pwungen kosonned epwiki samwa ko me keieu kesemwpwal.

Ehu rahno pwihn en sounkaweweh kosonedoh kei ahpw song lidipieki Sounkomouro sapwellime mahsen kan. Irail idek Reh en ketin kaweid ire ieu me malaulau kak pwungki.

”Maing Sounpadahk,” irail kalelapak Reh, “mehnia kosonned nan pelien Kosonnedo me keieu kesempwal?”

Kitail koaruhsie ese duwen Sises eh ketin sapeng: “Ke pahn poakohng Kauno ahmw Koht sang nan kapehdomw unsek, sang ni ngenomw unsek, oh sang ni omw lamalam koaros unsek.

“Ih met kosonned me keieu lapalap oh kesempwal.

“A me keriaun kesempwal, me rasohngete met, iei, pil duwehte, Ke pahn poakohng mehn mpomw duwen omw kin poakohng pein kowe.”

“Kosoned riau pwukat, iei me poahsoan en pelien kosonned koaros oh padahk en soukohp oko.”¹

Menlao medewe mwahu keimwseklahnsentenso: “Kosonned riau wet me wia poahsoan en koaros pelien kosonned oh padahk en soukohp kan.”

Sounkomouro sohte kasalehiong kitailte ia mwomwe, ahpw E pil ketin wia pwe kitail en kak kilang.

Ni atail wia tohn Mwomwohdiso wet, kitail inoukihda me kitail pahn alehieng kitail mwaren Sises Krais. Kolokol inou wet iei wehwehkihla me kitail pahn nantiheng esehla duwen Koht, poakohng Ih, kalaudehla atail pwoson Ih, wauneki Ih, weid nan Sapwellime ahl, oh uhkihda oh tengetengedi ni atail wia Sapwellime sounkadede.

Uwen laud en atail esehla duwen Koht oh pehm Sapwellime limpoak ong kitail, ih uwen laud en atail pahn esehla me tomw lapalap en Sises Kraiso wia kisakis sarawi ehu sang rehn Koht. Oh Sapwellimen Koht limpoak kiheng kitail ineng en keid nan ahl en koluhla mehlel me pahn kahlwaikitail ong manaman en mahk. Kahk wet pahn kiheng kitail en kak ahnikila limpoak laud oh sewese irail kan me mihmi limwahtail. Kitail pahn esehla kilang koasoandi mwahu kan. Kitail pahn soikala kasongosong kan en kadeikada dipen mehteikan, arail sapwung kan, luwet akan, mour en politic kan, koasoandien mwomwohdiso kan, arail wehi kan, de pohn kilirail.

Kitail pahn kilang emen emen me kitail kin tuhwong ni arail wia seri en Samatail Nanleng oh riatail pwutak de serepein.

Kitail pahn sewese mehteikan ni wewehki oh poakohng—irail kan me apwal en alehda limpoak. Kitail pahn iang irail kan me kin mauk oh kansenamwahu ih irail kan me kin anahne nsenamwahu.²

Oh kitail pahn esehla m sohte anahnepen pwunodiki mehnia padahk en rongamwahuo me pwung.

Kosonned laud riauo me kitail pahn doadoahngki. Pwe kosonned riau wet me poahsoane pelien kosoned koaros oh padahk en soukohp kan.³ Ni atail pahn alehda met, soahng teikan koaros me mwahu pahn kodohng kitail.

Ma dahme kitail esehla nan praimeri, madamadau kan, oh koahiek kan poasoanehda kekeirdahn atail limpoak ong Koht Lapalap oh kalaudehla atail limpoak ong mehteikan, kitail kak ese me kitail diaradahr dahme udahn pwung oh kainenehieng atail mour—en wiahla tohnpadahk mehlel en Sises Krais.