Emem ke Uwem Emi

Andinyanga odoho ofuri nnyin emi ikedide uwem isong emi ete ke, “Mbufo eyekut ukut ke ererimbot”.(John 16:33) Edi Enye okono mme mbet Esie eti enwongo emi kini utom ukworo-iko Esie ke isong ete: “Nkpong emem ye mbufo, nyak emem Mi nno mbufo: idige nte ererimbot enode, ke ami nno mbufo” (John 14:27). Edi nkpo ndongesit ndidiongo ete ke emem emi ekenwongode ke akaka-iso odu ono kpukpru mbet Esie mfin emi.

Ubak nnyin idung ke mme ndiye ye nti ebietidung, edi nnyin isuk ikukut akwa ndutime. Mbon efen enyene emem ye edinem ebiet-idung ke ufot akwa unana, ndiokiso, ye mme idomo ndikaka-iso ntibe.

Mbufo emekeme ndikut utibe-nkpo eke emem ke okpo-iso eke owo-anditiene Christ mme ndikop oro oto ke mme iko esie. Ami mmekut oro ke ediwak ini. Ubakini oro ekedi ke ubet ufokibok emi ufokemana kiet ebohode ekanare isungutom Abasi kiet emi ekekperede ndikpa.

Ami mmeti nte nkade nkese nnwan kiet ke ufokibok ke esisit usen-ifang mbemiso enye akakpa oto udongo cancer. Ami mma nda mkpri ndito iban mi iba man esanga ye ami koro ediye eyeneka nnwan ama edi andikpeb mmo nkpo ke Primary.

Mbon ufokemana esie ema eboho ekanare bed esie, eyom ndidu ye enye ke mme akpatre ini esie ke isong. Ami nkedu ke mkpaidem nte enye akadahade etie-tie ke bed. Enye ama anyan ubok omum ndito iban mi onyung asian mmo mbiba, owo ke owo, ono mbon ufokemana esie kiet kiet. Enye eketing iko nte ke ndito iban mi ekedi mbon ubong emi emende ewut ke ebekpo obonganwan. Enye ama oyom usung man eting nkpo abanga nte owo kiet kiet emi odude ke ubet ufok oro ete kedi mbet eke Andinyanga. Ami nsuk nteti osongo, inem, ye ima emi okodude ke uyo esie. Ndien ami mfiak nti nte akakpade mi idem ke ediye inua-imam esie kpa nte enye okodiongode ete ke ini uwem esie ke isong edi esisit.

Enye ama obo mme ndongesit edidiong eke itie-oku, edi enye ama ono kpukpru nnyin eti iko ntiense ete ke enwongo emem eke Abasi edi akpaniko ete: “Nting mme nkpo emi nno mbufo, man mbufo enyene emem ke idem Mi. Mbufo eyekut ukut ke ererimbot: edi esong esit; Ami nkakan ererimbot” (John 16:33).

Enye ama enyime ikoot Esie, nte kpukpru nnyin idinyimede, ke suto ndaha idomo ye mfina ekpedide ete:

“Etiene mi, kpukpru mbufo emi ekpade mba enyung ebiomde edidobi mbiomo, ndien Ami nyeno mbufo nduok odudu.

“Emen okpono Mi ekongo ke itong mbufo, enyung ekpebe Mi; koro mme-nyene ifure-ifure ido, nnyung nsuhore-idem ke esit: ndien mbufo eyekut nduok-odudu eno ukpong mbufo” (Matthew 11:28–29).

Oto ke nditiene Andinyanga kpot ke owo nnyin kiet ekededi edikeme edikut emem ye uboho ke mme idomo emi edisimde ofuri nnyin.

Akam udia-Obong anwam nnyin ndidiongo usung man nnyin ikut emem oro ke ufot mme ndutuho eke uwem. Nte nyin idiade udia-Obong, nnyin imekeme ndibiere ke ndinim mme ediomo nnyin man itiene Enye.

Nnyin kiet kiet ima inwongo ete ke iyeti Andinyanga. Mbufo emekeme ndimek nditi Enye ke usung emi editimde ida esit mbufo isok Enye. Ubakini eke mi, edi ndikut Enye ke ekikere mi nte okotongode-edong ke Inwang Gethsemane mme ndikut Enye nte okokotde Lazarus ete oworo ke udi edi. Nte ami nnamde, ami mmekop nte mkperede Enye ye ekom emi adade emem esin ke esi tmi.

Mbufo nko emenwongo ndinim mme mbet Esie. Mbufo emenwongo ndida enying Esie ndori ke idem mbufo nnyung ndi ntiense Esie. Enye omonwongo ete kini mbufo enamde mme ediomo mbufo ye Enye, ke Spirit Esie eyedu ye mbufo. (Se ke D&C 20:77, 79.)

Emi ada emem esisit edi ke usung iba. Edisana Spirit eyeyet nnyin osio ke idioknkpo oto ke ntak Uwa-usio-isop Jesus Christ. Ndien Edisana Spirit ekeme ndino nnyin emem emi otode ndibo unyime eke Abasi ye idorenyin eke nsisnsi uwem.

Apostle Paul eketing abanga inem edidiong emi ete: “Edi mbunwum Spirit edi ima, idaresit, ye emem, ye ime, ye mfon-ido, ye eti-ido, ye erinam akpaniko” (Galatians 5:22).

Ini emi mme isungutom heaven ekedarake emana Andinyanga, mmo ekefiori ete, “Ubong enyene Abasi ke ata enyong emem” (Luke 2:14; efiak eyiri eting). Ami nno iko ntiense mi nte ntiense Jesus Christ nte ke Ete ye Edima Eyen Esie ekeme ndino Spirit oro edi man anwam nnyin ndikut emem ke uwem emi, ke suto idomo emi ekpebinede nnyin ye mbon emi nnyin imade.