Ennaan eo an Būreejtōnji eo Kein Kajuon, Jeptōm̧ba 2016
Ālkin Iakwe Innām Ta?
Jān Būreejtōn Dieter F. Uchtdorf
Rikakpilōklōk eo Kein Karuo ilo Būreejtōnji eo Kein Kajuon
Rikanaan eo ad ejitenbōro, Būreejtōn Thomas S. Monson, eaar kwaļo̧k bwe “iakwe ej lukkuun pedped in katak ko an ko̧jpeļ.”1
Iakwe elukkuun in aorōk bwe Jisōs eaar ba “ej kien eo m̧oktata im eļap” im kar ba bwe m̧ōttan ko jet ilo kien in im naan ko an rikanaan ro rej ekkejel ie.2
Iakwe ej jibadbad eo im̧aantata ilo aolep ta ko jej kōm̧m̧ani ilo Kabun̄ in. Aolep būrokūraam̧, aolep kweilo̧k, aolep em̧akūt jej pād ie jej āinwōt ro rikaļoraņ Jisōs Kraist eaikuj waļo̧k m̧wil jab in—bwe n̄e ejjeļo̧k iakwe em̧ool, “iakwe eo erreeo an Kraist,” innām kom̧ jekdo̧o̧n.3
N̄e jenaaj meļeļe menin ilo ļōmnak ko ad im būruwōd, n̄e jenaaj kwaļo̧k ad iakwe n̄an Anij im armej ro m̧ōttad—innām ta?
En̄jake tiriam̧o im iakwe n̄an ro jet ebwe ke? Ad iakwe n̄an Anij im ro riturur ej ke kam̧ōņōņōik jerbal eo ad n̄an Anij?
Būrabōļ eo kōn Ļaddik ro Ruo
Ilo tampeļ eo ilo Jerusalem, pris ro routiej im elder ro an RiJew ro raar itok ippān Jisōs n̄an kapo E kōn naan ko An. Rilo̧mo̧o̧r eo, ijoke, eaar oktak ļo̧k n̄an er ilo tabōļ eo im jiron̄ er kōn juon bwebwenato.
“Juon em̧m̧aan jim̧we eaar wōr ruo nejin ļaddik,” Eaar ba. Jemān eaar ba n̄an eo nejin m̧oktata im kar jiron̄ļo̧k bwe en ilo̧k im jerbal ilo jikin kallib eo. Ak ļaddik eo eaar m̧akoko. Tokālik ļaddik eo eaar, “ukeļo̧k, im ilo̧k.”
Innām jemān eaar ilo̧k n̄an ippān ļaddik eo nejin kein karuo im kar jiron̄ļo̧k bwe en ilo̧k im jerbal ilo jikin kallib eo. Ļaddik eo kein karuo eaar jiron̄ļo̧k ke enaaj etal, ak eaar jab etal.
Innām Rilo̧mo̧o̧r eaar oktakļo̧k n̄an pris ro im elder ro im kar ba, “Wōn iaan ļaddik rein ruo eaar kōm̧anm̧an ankilaan jemāer?
Raar kwaļo̧k ke ļaddik eo m̧oktata—eo eaar ba eban etal ak tok ālik eaar ukeļo̧k im kar etal im jerbal ilo jikin kallib eo.4
Rilo̧mo̧o̧r eaar kōjerbal bwebwenato in n̄an kwaļo̧k juon pedped in katak eaorōk—ej er ro rej pokake kien ko er ro rej iakwe Anij.
Bōlen en̄in unin an Jisōs ba bwe armej ro ren ron̄jake im ļoor naan ko an Parisi ro im Saddusi ro im jab ļoor waanjon̄ok ko aer.5 Rūkaki in kabun̄ ro rejjab mour kake ta eo rej ba. Em̧m̧an wōt ippāer kōnono kōn kabun̄, ak ekabūrom̧ōjm̧ōj bwe ejako aorōk in katak eo ippāer.
Kōm̧m̧an ko im Ad Lo̧mo̧o̧r
Ilo juon iaan katak ko an Rilo̧mo̧o̧r āliktata n̄an rijjilōk ro An, Eaar kōnono n̄an er kōn ekajet eo āliktata. Rijerawiwi im rim̧m̧an renaaj jeno̧lok. Ro rim̧m̧an renaaj jolete mour indeeo; im ro rijerawiwi renaaj ieokļo̧k kaje indeeo.
Ta kar oktak eo kōtaan kūrub kein ruo?
Ro raar kwaļo̧k aer iakwe kōn kōm̧m̧an ko aer kar lo̧mo̧o̧ren er. Ro raar jab raar jako.6 Oktak eo em̧ool n̄an gospel eo an Jisōs Kraist im aorōk in pedped ko ie naaj waļo̧k ilo kōm̧m̧an ko ad kajjojo raan in ad mour.
Ilo jem̧ļo̧kin, baj kwaļo̧k iakwe n̄an Anij im armej ro eban kōkarbōb kōj n̄an mour ijo eutiejtata. Bwe, āinwōt an kar Jisōs kwaļo̧k, “jab jabdewōt ej ba n̄an Eō, Irooj, Irooj, enaaj deļo̧n̄ ilo aelōn̄ in lan̄; a eo ej kōm̧anm̧an ankilaan Jema eo ej pād ilo lan̄.”7
Ta eo ej Itok ālkin Iakwe?
Uwaake eo n̄an kajjitōk in “Ālkin iakwe, innām ta?” emaron̄ in pidodo im kajju uwaake. Eļan̄n̄e jej lukkuun iakwe Rilo̧mo̧o̧r, jej leļo̧k būruwōd n̄an E innām jej etetal ilo iaļen rikaļooraņ. N̄e jej iakwe Anij, jej kajjeon̄ kōjparok kien ko An.8
Eļan̄n̄e jej lukkuun iakwe armej ro ad, jej leļo̧k jipan̄ eo ad “n̄an rijeram̧ōl im riaikuj ro, rinan̄inmej im ro rej liājļoļ.”9 Bwe ro rej kōm̧m̧an kain in ilo tūriam̧o im jipan̄,10 ejja in wōt rej rikaļooraņ Jisōs Kraist.
En̄in ej ta eo ej itok ālkin iakwe.
En̄in ej pedped in katak eo an Jisōs Kraist.
© 2016 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/16. Kōmālim an ukook: 6/16. Ukook eo an First Presidency Message, September 2016. Marshallese. 12869 874
Katak jān Ennaan In
Būreejtōn Uchtdorf eaar kōmeļeļeik ro rikaļooraņ rem̧ool an Jisōs Kraist ro rej kwaļo̧k aer iakwe n̄an Anij im ro jet ilo kōm̧m̧an ko aer. Eaar katakin kōj bwe “eļan̄n̄e jej lukkuun iakwe ad Rilo̧mo̧o̧r, jej leļo̧k būruwōd n̄an E innām jej etetal ilo iaļen rikaļooraņ.” Ļōmņak in kajjitōk ippān ro kwoj katakin ilo wāween iakwe eo eaar lōn̄aj er n̄an etetal ilo iaļen rikaļooran. Kwomaron̄ kwaļo̧k en̄jake ko am̧ ippāer barāinwōt. Kwōn ba ren jar kōn iakwe im kōm̧m̧an bwe iakwe en kajoorļo̧k.