Idorenyin eke Ima Nsinsi Ufokemana

Kotu mme eno emi edima Ete nnyin ke Enyong okonode esok ndito Esie, andikpon-nkan edi nsinsi uwem (se ke D&C 14:7). Eno oro edi ndidung k’iso Abasi Ete ye Edima Eyen Esie ke nsinsi nte mme ufokemana. Ke nkong-nkan kotu mme obio-ubong eke Abasi, eke celestial, ke ebuana ima eke uwem ufokemana edika-iso idu.

Ofuri nnyin imedot-enyin ke idara ndidung ye ndima ufokemana. Eke ubak nnyin, oro edi ekikere emi nnyin mifiokke akpa—ekikere emi nnyin idiongoke ite ke ekeme ndida-itie edi nnyin ifiokke kanga. Nnyin imekeme ndikut oro ke edu-uwem eke mbon efen. Eke mbon nnyin eken, ima eke ufokemana esitim ada-itie onyung osong-urua kini emi mkpa ama adiangare nnyin okpong eyen, eka, ete, eyen-eka eren, eyen-eka nnwan, mme edima ete-ete ye eka-eka emi nnyin iketimde ima.

Ofuri nnyin imenyene idorenyin ite ke usen-kiet ke nnyin imekeme ndifiak nkop mfut ima eke owo ufokemana oro emi nnyin iketimde ima ndien idahaemi iyom ndifiak mfat-nwanga enye.

Edima Ete nnyin ke Enyong omodiongo esit nnyin. Utom Esie edi ndino nnyin inemesit (se ke 2 Nephi 2:25). Ndien ke nrte Enye ama ono nnyin eno eke Eyen Esie emi edinamde idara eke ebuana ufokemana ndika-iso ndu ke nsinsi. Koro Andinyanga ama obung eduat mkpa, nnyin iyeset ke mkpa. Koro Andinyanga ama osio-isop ke mme idioknkpo nnyin, nnyin imekeme oto ke mbuotidem ye editua-mkpofiok nnyin ndikabare ndot ndiduk obio-ubong celestial, ebiet emi ediande mme ufokemana otokiet ke ima nsinsi.

Andinyanga ama odong Prophet Elijah ebine Joseph Smith man akayak mme ukpohore itie-oku ono (se ke D&C 110). Odudu edidian kiet akasanga ye mme ukpohore oro edi, ndino mkpon-nkan kotu eno eke Abasi esok ndito Esie—nsinsi uwem emi mme ufokemana eyiride otokiet ke nsinsi.

Oro edi eno emi ofuri eyen Abasi ekedukde edi ke ererimbot ekemede ndibo. Oyoho mbak-ita kotu ndito Esie ema esin eno Esie ke ererimbot eke spirit. Oto ke unana oyoho mbuotidem dian ye ata edikokoi nsongibuot, mmo emek nditre ndidiongo idara emi otode eno eke Ete ke Enyong kabanga mme nsinsi ufokemana.

Eke nnyin emi ikebede akwa udomo oro ke ererimbot eke spirit ndien nko idot ndibo eno ndinyene ikpokidem, akwa mbumek eke nsinsi uwem osuk edi eke nnyin ndinam. Edieke nnyin ifonde iso ndikut mfiak-nda-ndi iko Abasi emi, nnyin imekeme ndimek man inam inyung inim mme ediomo ye Abasi ekedinamde nnyin idot ndibo nsinsi uwem. Nte nnyin iyode ye mbuotidem oro, Edisana Spirit eyesongo idorenyin ye uko nnyin ete ke nnyin idu ke mkpafaha-usung emi akade nsinsi uwem, man ikodu ke nsinsi ufokemana ke obio-ubong celestial.

Eke ubak owo, nsinsi idara oro ekeme ndibiet nte ufon iduhe mme kpa nte idorenyin eke okpude. Mme ete ye eka, ndito-owong, ndito-eka irenowo, ye iban ekeme ndinam mbumek ekebietde nte ekpenam mmo etre ndidot ndika nsinsi uwem. Ekeme ndikpa mbufo idem mme mbufo ndien emedot oto ke Uwa-usio-isop Jesus Christ.

Inikiet prophet Abasi kiet ama ono mi item emi okonode mi emem. Ami mma nkere nte ke mbumek mbon efen ekeme ndinam ufokemana nnyin etre ndidu otokiet ke nsinsi. Enye okodoho ete, “Afo emefina-idem fo abanga idiok mfina. Afo enyene ndidu-uwem ndot ndiduk obio-ubong celestial, ndien ndutum ufokemana eyekabare ofon akan nte afo ekekerede.”

Nting nno ofuri mbon eke mfina idem-mmo mme ndo ye ndito mmo—mme unana ekededi—abiatde idorenyin mmo, ami nno iko ntiense mi nte ke: Ete ke Enyong omodiongo onyung amama mbufo nte Eyen Esie eke spirit. Kini mbufo ekedude ye Enye ye Edima Eyen Esie mbemiso edi ke uwem isong emi, Mmo ema ewuk ke esit mbufo idorenyin emi mbufo edinyenede eno nsinsi uwem. Ye odudu eke Uwa-usio-isop Jesus Christ ndinam utom ndien ye Edisana Spirit ndida-usung, mbufo emekop idahaemi ndien eyekop ke ererimbot ekedidide ima eke ufokemana emi Ete mbufo ye Edima Eye Esie etimde eyom man mbufo edibo.

Ami nsongo ke nte mbufo edude uwem edot ndiduk obio-ubong celestial, enwongo prophet kabanga “ndutum ufokemana nditim nnem nkan nte mbufo ekekerede” eyedi eke mbufo.