Nam-akpaniko nno Mbuotidem eke mme Etebom Nnyin

John Linford ekedi isua Aba-ye-ita kini nnwan esie, Maria, ye ndito irenowo ita mmo ekenamde ubiere ndikpong ufok mmo ke Gravely, England, esanga mme itiat tosin anyan ikpat-isang man ekebuana ye ikot Abasi ke unaisong eke Akwa Salt Lake. Mmo ema edaha ekpong oyoho eyeneren inang mmo , emi okodude ke mission, enyam se mmo enyenede, ndien eduk usung Liverpool ke ubom-nsungikang eke Thornton.

Mmo ekesanga ke akpa-mmong-inyang ekesim Obio New York, ndien edisanga ke isong nkesim Iowa, ikoworoke ke nte mmo ekekerede. Afanikong ama otongo, nte ededi, ibighike-bighi ke nte mme Linfords ye mbon Latter-day Saints efen emi ekesangade ke Thornton ekekpong Obio Iowa ke July 15, 1856, nte ubak kotu mbon ndiok-iso oku-isang ukpat-nkpo eke James G. Willie.

Mfiomo ndaha-ini ye ufen usung-isang ama edisim ediwak owo ke oku-isang oro, John ekesine do. Ke akpatre enye ama odongo onyung okop mmem-idem eti-eti ndien edikabare emen enye esin enuk ke ukpat-nkpo. Kini oku-isang oro esimde Wyoming, ndaha idem esie ama odiok eti-eti. Nka unyanga emi okotode Obio Salt Lake ama edisim ke October 21, ke esisit ini ke uwem isong John ama okokure. Enye ama akpa ke ndang-nsiere usenubok oro ke mben Inyang eke Sweetwater.

Nte John ama eseme kabanga enye ndikpuho inemesit ye emem ono ndinwana, ndinana, ye ufen ke ndida ufokemena esie nka Zion?

Enye okodoho nnwan esie mbemiso enye akpa ete, Ihn-ihn, Maria ami nsemeke-o. Ami mmekop inemesit ke nnyin ima idi. Ami ndiduhe uwem nkesim Salt Lake, edi afo ye ndito-irenowo eyesim, ndien ami nsemeke ke ofuri afanikong eke nnyin ikutde edieke ndito irenowo nnyin emi edikemede ndikori enyung ekama mme ufokemana mmo ke Zion.¹

Maria ye ndito irenowo esie ema esanga isang mmo ekure. Ke nkpo nte isua Edip-ye-duop kiso kini Maria akpade, John ye enye ema enim osongo uwutnkpo eke mbuotidem, utom-unwam, nsinifik ye nwaidem eno ndito mmo.

Ndidi owo Latter-day Saint edi ndidi ebemiso, koro se ekabare ebemiso edi owo eke ebemde-iso aka ekebenge mme edibere usung nnim nno mbon efen nditiene.² Ndien ndidi ebemiso edi ndikabare mfiok mbanga nwaidem. Okposukedi nte minaha nte mbon ufok Abasi ekpong ufok mmo enam isang eka Zion, ediwak ini mmo enyene ndikpong nkani edu-uwem, edu eke idung, ye mme ufan-ima nyak. Ubak esinam okposong ubiere ndikpong mbon ufokemana mmo emi enwanade-efanga ke mmo ndiduk ufok Abasi emi. Mbon Latter-day Saints ekaka-iso, nte ededi, ebenge ete yak mme ndima-owo mmo ekpedifiok enyung enyime.

Usung ndidi ebemiso imemke, edi nnyin itiene ke mme ikpatisang eke akpatre Ebemiso—kpa eke Andinyanga—emi ebede-iso aka, man owut nnyin usung nte nnyin ikpetienede.

“Enye ke okot ete,”³ Di, tiene Mi

“Enye okofiori ete, Ami ndi usung, ye akpaniko,”⁴ ye uwem.

“Enye okokot ete,”⁵ Di, bine Mi

Idomo ekeme ndidu ke usung oro. Osong mme ubak owo ndikop nte mme ndisime esakde mmo nsahi enyung etingde idiok iko ebanga mfara ke idem, akpaniko, ye ndinim mbet Abasi Edi edisanga ke eti usung edi nkpo eke ererimbot esede ke ndek. Kini ekedohode Noah ete obop ubom mme ndisime owo ewuk eyen ese afia ikpa enyong etongo ndisak nyung nting idiok iko —tutu edim otongo ndidep.

Ke ata ediwak mme isua ko ke edem ke akpa-idung eke America, mme owo ema eyik, etoho-utok, enyung emiom-uyo tutu ikang edita Zarahemla, isong ofuk Moronihah, mmong ofuk-oyoho Moroni. Iko nsahi, iko abianga, iko emiom, ye idioknkpo ikoduhe aba. Akwa ndobo, okposong ekim ama akabare ada itie. Anyanime Abasi ama okure, edikem ini Esie ediworo osu.

Akananam Maria Linford ikoduokke mbuotidem esie ekpedi ke ntak ukut ke England, mme nsongo-nkpo eke usungisang esie man “ekesim ebiet emi Abasi … ekebengede onim,”⁶ ye mme idomo emi enye okoyode ke ntak ufokemana esie ye eke ufok Abasi.

Ke usoro itie-udi eke isua 1937 emi ekenamde nditi Maria, Elder George Albert Smith (1870-1751) okobup mbon-ufokemana esie ete, Nte mbufo eyenam akpaniko eno mbuotidem mbon-ubon mbufo? … Domo nwana ndidot ke ntak ofuri nwaidem emi [mmo] ekenamde eno mbufo.⁷

Nte nnyin iyomde ndibop Zion ke esit, ke ufok, ke mme obio, ye ke mme idut nnyin, yak nnyin iti osongo uko ye akwa mbuotidem eke mbon emi ekeyakde ofuri se mmo ekenyenede man nnyin ikpebo mme edidiong eke mfiak-nda-ndi iko Abasi emi, dian idorenyin ye enwongo esie oto ke Uwa-usio-isop eke Jesus Christ.