Sanap Tru long Feit bilong Ol

Presiden Monson i tokaut long wanpela stori bilong wanpela ol dispela ol lain igo pas famili na bihain em i kolim toktok bilong Presiden George Albert Smith husat ibin tok: “Baimbai yu stap tru long dispela feit bilong ol tumbuna bilong yu? … Traim hat long stap tru long olgeta sakripais [ol] ibin mekim bilong yu.” Sapos yu igat wanpela long ol dispela ol lain igo pas olsem tumbuna bilong yu o yu yet wanpela nambawan generesen memba bilong dispela Sios, yu save lukluk long ol dispela eksampol bilong feit long soim yu rot na long kisim strong? Long hia mi soim yu wanpela gutpela wei long yu ken stat:

1. Mekim wanpela lis long ol lain yu save laikim tumas. Ol iken memba bilong famili bilong yu yet tu (bipo na nau), ol poroman bilong yu, ol lida long Sios, o ol lain insait long skripsa.

2. Raitim go daun ol gutpela pasin ol igat em yu laikim. Mama bilong yu em wanpela meri blong gat isi isi pasin? Ating ol poroman bilong yu isave gutpela tru long ol narapela lain. Ating yu laikim tru bun bilong Kepten Moroni?

3. Makim wanpela gutpela pasin ikam long lis bilong yu na askim yu yet, “Hau bai mi kisim dispela gutpela pasin? Wanem samting bai mi mas wokim long kamapim dispela insait long laip bilong mi?”

4. Raitim go daun plen bilong yu long kamapim dispela gutpela pasin na putim long wanpela hap we yu inap long lukim olgeta taim, long tokim yu gen long gol bilong yu. Prei long halivim bilong Papa long Heven na skelim gohet bilong yu klostu klostu. Taim yu pilim olsem yu kamapim gut tru dispela gutpela pasin, yu iken makim wanpela nupela gutpela pasin long wok gen long en.

Tingim olsem taim yumi kamapim ol dispela nambawan gutpela pasin insait long yumi yet, yumi ino onaim tasol feit bilong ol tumbuna bilong yumi na ol sakripais ol ibin mekim, tasol yumi tu iken kamap olsem wanpela manmeri bilong tanim bel long kamapim gutpela long ol lain stap raun long yumi.