Etop eke First Presidency, Ofiong Inang ke isua 2016
Prophecy ye Eriyarare eke Idem-nnyin
Otode President Henry B. Eyring
Akpa Ono-item First Presidency
Ema efiak eyak Ufok Abasi akpaniko eke Jesus Christ eno edi ndien oro odu ke isong mfin emi. Ke ofuri ini mme odu-uwem prophet ye isungutom esida Ufok Abasi eke mme Ndisana-owo ke Ukpere Edem Ini usung, emi esibode eti ndausung eto heaven.
Edisana usung oro ekedi akpaniko nko totongo ke eset. Nnyin ikpeb ke Bible ete: “Koro Jehovah Abasi midinamke baba nkpo kiet, ke mibohoke ini enye ayarade uduak esie ono isungutom esie mme prophet” (Amos 3:7).
Abasi ama afiak eting iko ke ini nnyin, oto ke Prophet Joseph Smith. Enye ama ayarade oto ke Prophet Joseph iko Abasi eke Jesus Christ ke uyoho ndaha esie. Enye ama ayak edisana itie-oku Esie dian ye mme ukpohore esie ye mme ofuri unen, odudu ye utom eke edisana odudu eke itie-oku.
Ke ini nnyin emi, mme prophet ye isungutom ebo odudu man eting-iko, ekpeb-nkpo enyung eda-usung ye odudu eto Abasi Ete ye Obong Jesus Christ. Andinyanga odoho Prophet ete, “Se Ami Jehovah nketing, Ami mma nting, ndien Ami nsioho idem-mi mfeb, ndien ekpedi nte mme enyong ye isong ebede efeb, iko Mi idibehe ifeb, edi kpukpru eyeworo osu, mme okpoto uyo Mi mme okpoto uyo eke mme isungutom Mi, edi ukem-ukem” (D&C 1:38).
Ke akwa mboho eke akang mbiba ke isua, nnyin imefon-iso ndinyene ufang ndikop iko Abasi eketode mme isungutom Esie nno idem nnyin. Oro edi unen kiet eke akande ekom-urua. Edi ufon unen oro okongo mme nnyin iyebo iko oro ke idak ukem odudu Spirit emi ekenode mmo esok mme isungutom oro (se ke D&C 50:19–22). Ukem nte mmo ebode ndausung eto heaven, nnyin iyebo ntre. Ndien oro oyom ukem nsinifik eke spirit oro oto nnyin.
“Nam Ubiongutom Mbufo”
Ediwak isua emi ekebede kiet kotu owo Eboho eke mme Apostle Duopeba ama odoho mi ete nkot etop mboho emi enye ekewetde onim ono akwa mboho. Ami nkedi ekpri owo eke eboho oro. Ami mma nkop inem oto ke mbuotidem esie man ami nkeme ndinwam enye nyom mme iko eke Abasi ediyomde ete enye eting. Enye asasak odoho mi ete, Sese, emi edi oyoho ikpa-nwed Edip-ye-iba eke etop emi.
Ami nditi item eke edima ye ofonido President Harold B. Lee (1899–1973) ekebemde iso ono mi ye akwa nsongo ete, “Hal, edieke afo oyomde ndibo eriyarare, nam ubiongutom fo.”
Ami mma nkot, nkere-ke-esit, ndien mbong-akam mbanga oyoho ikpa-nwed Edip-ye-iba oro. Ami mma mkpeb ke ofuri usung nte ami nkekemede ke idak odudu Edisana Spirit. Ke ini owo eboho oro okonode etop esie ami mma nam ubiongutom mi. Ami nkereke nte ke ami mma nno unwam, edi ami mma ndiongo nte ke ami mma mkpuho kini ami nkekopde nte enode etop oro. Mme etop ama edisim mi akan mme iko eke ami nkekopde ye eke enye eketingde. Mme iko oro ama enyene ufon akan mmo oro eke ami nkekotde ke ikpa-nwed oro. Ndien ekebiet nte ekewet etop oro eno mi, emi ekekemde ye mme unana mi.
Mme isungutom Abasi etre-udia enyung ebong-akam man ebo etop emi Enye enyenede ono mmo man eno mbon-owo eke eyomde eriyarare ye ndausung. Se ami nkekpeb nto ifiok oro, ye ediwak eke etiede ntre, edi ndibo akwa ufon ekedude oto ndikop nto mme odu-uwem prophet ye apostle, nnyin inyene ndikpe ekom-urua ke idem-nnyin man idibo eriyarare.
Jehovah amama kpukpru owo eke edikopde etop Esie, ndien Enye odiongo esit ye ndaha owo kiet-kiet. Enye odiongo oruk ntuni, osongo ye iko Abasi akpaniko eke editimde inwam owo kiet-kiet ndimek usung esie man aka nsinsi uwem.
Nnyin eke ikopde inyung isede mme etop eke akwa mboho ke ubak ini idikere ete, “Nso ke ami ntim nti ofon?” Se Abasi oyom oto nnyin kiet-kiet edi yak iboro ekpedi: “Ami ndifreke mme ini eke ami nkekopde uyo eke Spirit ke ekikere ye ke esit mi etingde ono mi se ami mkpekeme ndinam man nnem Ete mi ke Enyong ye Andinyanga esit.”
Nnyin imekeme ndibo eriyarare eke idem-nnyin oro kini emi nnyin ikopde uyo eke mme prophet ye apostle ye nte nnyin inamde utom ke mbuotidem man ibo oro, ukem nte President Lee odohode ete ke nnyin iyekeme. Ami mmediongo ke oro edi akpaniko oto ifiok-ukpeb ye ke ntiense eke Spirit.
© 2016 eketode I ntellectual Reserve Inc. Ekpan kpukpru unen ndiming nwed emi. Ekeming ke USA. Enyime ediming ke Iko Mbakara 6/15. Enyime edikabare 6/15. Edikabare Etop eke First Presidency Message, April 2016. Efik. 12864 553
Ukpebnkpo eketode Etop Emi
Kere-banga ndikot ke okposong uyo mbuk eke President Eyring kabanga ndikpeb-nkot ikpa-nwed eke etop mboho owo eboho esie. Mbufo emekeme ndibup ete, “Nsi idi ekom-urua ke ndibo eriyarare?” Ke nneme mbufo okurede, mbufo emekeme ndikot mbon-owo emi mbufo ekesede ete ekere-ke-esit enyung enam uduak man ebo mme etop akwa mboho eke edidide ke idak ukem odudu Spirit emi ekenode esok mme isungutom [Abasi].