Ho an’ny ankizy madinika
Ny voatavon’i Paul
Monina any Utah Etazonia ny mpanoratra.
Nanampy an’i Dada namboly zaridaina i Paul. Naniry izy mba ho teo i Eric rahalahiny mba hanampy. Saingy tany lavitra tany nanao asa fitoriana i Eric.
“Tsy mba ho lehibe tahaka an’i Eric mihitsy aho,” hoy i Paul. “Ahoana no ahafahako mandeha manao asa fitoriana tahaka azy?”
“Aza matahotra!” hoy i Dada. “Mbola hitombo ianao.”
Nanolotra voam-boatavo vitsivitsy an’i Paul i Dada. Nanampy an’i Paul namboly izany izy.
“Hitombo ka ho lasa voatavo lehibe ve ireto voa madinika ireto?” Hoy i Paul nanontany.
“Raha karakarainao tsara izany,” hoy i Dada.
Nandeha nivoaka foana i Paul isan’andro mba hijery ny zaridaina. Notondrahany izany ary tsy ela dia nanomboka nisy tsimoka kely nipoitra. Nihalehibe ny raviny. Nesorin’i Paul tamim-pitandremana tsara ireo ahi-dratsy.
Tamin’ny fararano dia efa naniry be ny voly voatavony. Ary nisy voatavo lehibe miloko volomboasary!
Notaritaritin’i Paul i Dada mba hijery izany. “Nokarakarainao tsara ny voly voatavonao!” Hoy i Dada.
“Ie! Ary hokarakaraiko tsara ny tenako amin’izay mba ho lehibe koa aho.” Hoy i Paul sady nitsiky. “Ary rehefa lehibe aho dia afaka mandeha manao asa fitoriana toa an’i Eric!”
Sary nataon’i Amy Wummer