Sa Rawa me Duabau Tawamudu na Matavuvale

Na kaukauwa ni matabete me vauca tawamudu na matavuvale sa dua vei ira na isolisoli cecere ni Kalou. Na tamata yadua e kila vinaka na ituvatuva ni veivakabulai ena gadreva sara na veivakalougatataki tawayalani o ya. Ena soqoni ni veivauci duadua ga e vakayacori ena veivaletabu ni Lotu i Jisu Karisito ni Yalododonu Edaidai e yalataka kina na Kalou ni na laki vauci vata na matavuvale me tawamudu.

Na idola ni matabete e vakayacori rawa kina oqo a vakalesui mai ki vuravura maivua na parofita o Ilaija kivei Josefa Simici ena Valetabu e Kirtland. Na idola ni matabete oqori e sega ni cavuka na kena vakadewataki mai vei ira na parofita bula ni Lotu i Jisu Karisito ni Yalododonu Edaidai me yacova mai na siga nikua.

Mai na Nona cakacaka vakalotu na iVakabula ena vuravura oqo a tukuna kina na kaukauwa me vauca kina na matavuvale kivei Pita, na Nona iApositolo iLiuliu, ka kaya o Koya, “Au sa kaya vakaidina vei kemudou, A ka kecega dou na vauca e vuravura, ena vauci mai lomalagi: ia na ka kecega dou na sereka e vuravura, ena sereki mai lomalagi” (Maciu18:18).

Ena matanitu vakasilesitieli duaduaga era na bula tawamudu kina na matavuvale Eda na tiko kina vakamatavuvale ena itikotiko serau ni Tamada Vakalomalagi kei na iVakabula. E vakamacalataka na Parofita Josefa Simici na gauna totoka oqo ena Vunau kei na Veiyalayalati:

“Raica ni sa lesu tale mai na iVakabula eda na qai raica na vatukana dina. Io eda na raica ni sa tamata ga me vakataki keda.

“Raica ena laki dei tale tu ga mai kea na ivakarau ni noda veimaliwai tu eke, ia sa na uasivi ka lagilagi sara mai kea; oqori na ka e sega ni yaco tiko oqo vei keda” (V&V 130:1–2).

E vakatura tiko na ivolanikalou oqo ni sa rawa ena noda nuidei meda taketetaka e dua na ivakatagedegede vakalomalagi meda veimaliwai kina kei noda matavuvale. Sa rawa meda qarava vinaka sara noda lewe ni matavuvale, ira na bula kei na mate, meda cakava na kena taucoko meda vakarautaka vei ira na cakacaka vakalotu ni matabete ena vauci keda e lomalagi.

E vuqa vei kemuni, gone kei na qase, ko ni sa cakava tiko oqo. Ko ni sa vakasaqara tiko na yacadra na qase e liu era se bera ni ciqoma na cakacaka vakalotu mena vauci kemuni vata.

E voleka ni kemuni taucoko era bula tiko na wekamuni dina era se bera ni vauci vakamatavuvale ena kaukauwa ni matabete. E vuqa e se bula tiko na wekadra era sa ciqoma na cakacaka vakalotu ni matabete ia era sega ni maroroya tiko na nodra veiyalayalati era cakava vua na Kalou. Ena vakalougatataki iko na Kalou mo rawa ni vukei ira taucoko na wekamu oqori ena vakabauta. Sa yalataki talega vei iko na ka a yalataka na Turaga vei iratou na Nona tisaipeli era a gole mera lai kauti ira mai eso ki Vua:

“Ia ko koya sa vakacegui kemudou sa vakacegui au talega, niu sa lako vata tiko kei kemudou. Au na tiko e yasamudou imatau ka tiko talega e yasamudou imawi, ia na noqu Yalo Tabu ena tiko e yalomudou; era na vakavolivoliti kemudou na noqu agilosi ka laveti kemudou cake” (V&V 84:88).

Ena veisiga au raici ira toka mai na tagane kei na yalewa era se qai vakamau ga me ra tabaki ena itaba ena veiloga ni senikau totoka kei na mimira ni wai. E dau keveti watina o tagane, ena vica ga na ikalawa ninini, ni veitaba tiko o dauveitaba baleta na vakamau. Ena veigauna kece au raica oqo, au nanumi ira na veiwatini au kilai ira ni toso tiko na gauna—eso na gauna e lekaleka sara ni oti na siga ni nodrau vakamau—merau veiyabeni yani vakai rau ena sala tale eso ni sa dredre mai na bula. Ena rawa me takali na cakacaka. Era na rawa ni sucu mai na gone ena levu ni ibolebole Ena yaco mai na mate veitauvi. Oti, meda qai vakayacora na veika eso vei ira na tamata ka gadreva mera cakava vakakina kivei keda—ni a se rawarawa—eda na tagane ka yalewa qaqa kina ena gauna veivakatovolei oqori ka na tauri vakalevu cake mai vei keda mai na kena eda nanuma ni a tu vei keda.

Meda na vakayacora sara ki na noda matavuvale na mataqali veimaliwai eda rawa ni kauta ki na itikotiko ni Kalou. Meda saga meda kakua ni veivakacudrui se vakacudrui. Meda sa vakadeitaka meda na veivosoti sara vakatotolo ka vakataucoko. Sa rawa meda vakamarautaki ira vakalevu cake eso maivei keda. Sa rawa me da dauvosa vakayalololoma. Ni da saga meda cakava kece oqo, eda na sureta na Yalo Tabu ki na noda matavuvale vakakina ki na noda bula.

Au vakadeitaka oqo vei kemuni, ena veivuke ni Turaga kei na yalo sa veivutuni, eda na raica rawa ena bula oqo na mataqali bula eda gadreva me tiko tawamudu kei keda. E lomani keda na Tamada Vakalomalagi. E gadreva o Koya meda lesu tale Vua. Na iVakabula, ena kaukauwa ni Nona Veisorovaki, ena rawata me veisautaka na yaloda eda na gadreva me rawa ni da curuma na valetabu savasava, cakava na veiyalayalati meda na qai maroroya, ka yaco na gauna meda bula tawamudu vakamatavuvale ena lagilagi vakasilesitieli—ki na noda itikotiko.