Vahe ‘o e Kau Taki Faka-ʻēlia Foʻoú

Kuo fanongonongo ʻe he kau Palesitenisī ʻUluakí ha ngaahi liliu ki hono vahe e tuʻunga fakatakimuʻa fakaʻēliá, ʻo kamata ʻi he ʻaho 1 ʻo ʻAokosi 2014. Ko e Kau mēmipa kotoa ʻo e Palesitenisī Fakaʻēliá ko e mēmipa kinautolu ʻo e Kōlomu ʻUluakí pe Kōlomu hono Ua ʻo e Kau Fitungofulú.

ʻOku ui ʻa e kau Fitungofulú ʻi he fakahā, ʻi he fakahinohino ʻa e kau Palesitenisī ʻUluakí, ke tokoni ki he Kōlomu ʻo e Kau ʻAposetolo ʻe Toko Hongofulu Mā Uá ʻi heʻenau ngāue ʻi he funga ʻo e māmaní.

Naʻe pehē ʻe Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá “Ko e hisitōlia ʻo e Kau Fitungofulú ʻoku aʻu moʻoni ki he Fuakava Motuʻá.¹ ʻOku maʻu ʻa e ʻuluaki fakamoʻoni ki he kau Fitungofulú ʻi he ʻEkesōtosi 24:1, pea ʻoku toe lau ʻi he Nōmipa 11:16–17, 25, ʻi he taimi ne tānaki mai ai kinautolu ke tokoni kia Mōsesé.

ʻI he lolotonga ngāue ʻa Kalaisi he matelié, naʻá Ne ui ʻa e Kau Fitungofulú, ʻo fakahinohinoʻi kinautolu ʻi ha founga tatau pē mo e kau ʻAposetolo ʻe Toko Hongofulu Mā Uá, ʻo ʻoatu kiate kinautolu “ʻi he ʻao ʻo hono fofongá,” ʻo fakamatalaʻi ko kinautolu ʻoku nau fanongo ki honau leʻó te nau fanongo ki Hono leʻó (vakai, Mātiu 10:1, 16–17; Luke 10).

Naʻe pehē ʻe Palesiteni Peeka “ʻOku mau tui ki he ngaahi lakanga tatau ko ia naʻe fokotuʻu ʻi he Siasí ʻi he kuonga muá.” “Pea naʻe kau ai ʻa e kau Fitungofulú.” (Vakai Ngaahi Tefito ʻo e Tuí 1:6.) ʻI he tupu vave ʻa e Siasí ʻi he ngaahi ʻahó ní, ʻoku ʻi ai e fatongia mahuʻinga ʻo e Kau Fitungofulú ʻi hono tokoniʻi ʻo e Toko Hongofulu Mā Uá. Naʻe pehē ʻe Palesiteni Peeka “ʻE lava ʻa e Kau Fitungofulú ʻi hono vahe kinautolú ke fai ha meʻa pē ʻe fakahā ʻe he Toko Hongofulu Mā Uá kiate kinautolu ke faí.²