Tangira—te Boto n Iango n te Euangkerio

Tariu ma mwaaneu aika kam tangiraki, ngke e mwakuri ara Tia Kamaiu ibuakoia aomata, E titirakinaki iroun te rooia bwa e kan ataia, “Te Tia Reirei, tera te tua ae korakora i buakon taian tua?”

E koroia Mataio ana kaeka Iesu:

“Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea.”

“Aio te Moa n tua ae e korakora.

“Ao ai aron naba are te kauoua, are e kangai, Ko na tangira raom n ai aron tangiram i bon i roum.”¹

E motika te rongorongo Mareko ma ana rongorongo te Tia Kamaiu: “Akea riki tua aika a korakora riki nakon aikai.”²

Ti aki kona n tangira te Atua ngkana ti aki tangiria aomata aika a rinanon naba te maiu aei ma ngaira. N aron aei, ti aki kona n tangira raoi raora ngkana ti aki tangira te Atua, te Tama ibukira ni kabane. Te Abotoro Ioane e tuangiira, “Ti anganaki te tua aei mai Rouna, bwa ane tangira te Atua ao e na tangira naba tarina.”³ Ngaira bon natin Tamara are i Karawa aika tamnei ao, n aei, bon tarira ao mwanera. Ngkana ti uringa te koaua aei, tangiraia natin te Atua ni kabane a na bebete.

Ni bon arona, te tangira bon mwakoron te euangkerio ae kakawaki ao Iesu Kristo bon ara Katoto. Maiuna bon, kaotan te tangira. E kamaiua te aoraki; E tabeka ae bwara nanona; E kamaiua te tia bure. N tokina aomata ake a un a anaa Maiuna. Ma a tang mai tabukin Korokota taeka aika: “Tamau, ko na kabara aia bure; ba a aki ata ae a karaoia”⁴—te katoto ae tamaroa ni kaotan te nanoanga ao te tangira.

A mwaiti katei aika a kaota te tangira, n aron te akoi, te taotaonannano, te nanoanga, te atatai, ao te kabwarabure. Inanon ara reitaki nako, aikai ao aekaki ni katei tabeua a na buoka ni kamataata nakoia tabeman te tangira are inanora.

Ae tataneiai te aba iai e na kaotaki ara tangira n ara reitaki ni katoa bong ma tabeman. Te kabanea ni kakawaki ni kawai ae na kaotaki bon ara konabwai ni kinaa kainnanon temanna ao ni buokia. I a tia n taainako n tangira te nano ae e kaotaki n te boem ae uarereke:

I a tibwa tia ni kaongoaki taekan katooton te tangira n akoi aika riinga te nano—teuana ae iai mwiia aika aki nooraki. Te ririki bon 1933, ngke ibukin te kangaanga are e riki ni kaubwain te United States, reken mwakuri a kangaanga. Te tabo bon mwakoron te United States ae mainiku. Arlene Biesecker e a tibwa karekebeeba man te kuura ae rietata. Imwiin kakaean ana mwakuri n te tai ae e maan, n tokina e a reke ana mwakuri n te tabo ni karao kunnikai bwa te tia itutu. Taani mwakuri ikai a tii kaboaki ibukin aia bwai ake a tia raoi man tabwanin ni katoabong. Mwaitin aia kunnikai aika itui, ai bon mwaitin naba booia.

Teuana te bong n te tai ae aki maan imwiin teirakena n te tabo ni mwakuri aio, e kaitara Arlene ma te mwakuri are e kaminoa ao ni kabwarananona. E tekateka n ana mitiin n itutu ni kataia ni kabwaraa karain te bwai are e aki nakoraoi ana mwakuri iaona. E taraa n ae akea ae e na buokiia, bwa ni kabane taan itutu a katawe ni katiai aia i tutu aika bati n aron are a kona. Arlene e namakina ae akea korakorana ao n akea ana kantaninga. E a moana n aki karongoa, e a moanna n tang.

Are e tekateka ni kaitara ma Arlene bon Bernice Rock. E ikawai riki ao man maatai riki n aron te itutu. N noora ana kangaanga Arlene, Bernice e teirake ao n nakon rarikin Arlene, ma te akoi e anganna karauan nanona ao ni buokiia. E tiku ni karokoa are e a bwaati Arlene ao e a kona ni katia te mwakuri. Imwiina e okira ana mitiin Bernice, e a tia ni kabuaa ana tai ni katiai ana itutu ae mwaiti riki, ngke arona bwa e aki ibuobuoki.

Aio bon teuana te mwakuri n akoi ao n tangira, Bernice ao Arlene a riki bwa raao inanon maiuia. Akea bwa a iein ao a reke natiia. N te taina inanon te 1950, Bernice, are bon kaain te Ekaretia, e angan Arlene ao ana utu kaobiin ana Boki Moomon. I nanon 1960, Arlene ao buuna ao natiia a bwabetitoaki bwa membwa n te Ekaretia. Imwiina a kabaeaki inanon ana tembora te Atua ae tabu.

Mai imwiin te mwakuri n nanoanga are e kaotaki iroun Bernice ngke e nako ni buoka temanna ae e aki ataia are e mena n te kangaanga ao e kainnanoa te buoka, a rangi ni bati aomata, aika maiu ma ni mate, aika ngkai a kimwareirei n otenanti ni kamaiu man te euangkerio.

Ni katoa bongin maiura ti anganaki taai aika angaraoi ni kaota te tangira ao te akoi nakoia ake irarikira. E taku Beretitenti Spencer W. Kimball: “Ti riai n uringnga bwa te koraki ake ti kaitibo ma ngaia n taabo ake a tei iai kaa, aobiti, ereweita, ao taabo riki tabeua bon mwakoron te botanaomata are e a tia n anganiira te Atua bwa ti na tangiriia ao ni buokiia. E na uarereke mwiina nakoira n taekina te itaritari n te botanaomata ngkana ti aki taraia ake irarikira bwa tarira ao mwaanera.”⁶

N taainako ara tai ni kaota ara tangira a roko n te tai ae e aki kantaningaaki. Te katooto ibukin te aekaki aio e kaotaki n te rongorongo n te niutibeeba inanon Okitobwa 1981. I rangi n rootaki ma te tangira ao te nanoanga ake a kaotaki inanona n te aro are I a kawakinna inanon au bwaaire ae raka iaon 30 te ririki.

Te rongorongo e kaotia bwa kiban te Alaska Airlines ae e aki tokitoki mai Anchorage, Alaska, nako Seattle, Washington—te kiba ae e uotia 150 bwatintia—e kabwakeaki kawaia nakon kaawan Alaska ae raroanako ike a aonga ni uota te ataei ae kaakaiaki ikoakina. Te ataeinimwaane ae uoua ana ririki e mwakoroua angana ngke e bwaka iaon mwakoron te kiraati ngke e takakaro irarikin mweengana. Te kaawa bon 450 te maire (725 km) i maiakin Anchorage ao n teretere e bon aki mena ni kawain te kiba. E ngae n anne, taan bwain aoraki n te tabo arei a kanakoa te bubuti ae rangi ni kainnanoaki ibukin te buoka, ao ai ngaia are e a kabwakeeaki kawain te kiba n anaa te ataei ao ni uotia nako Seattle bwa e aonga ni bwainaorakiaki n te onaoraki.

Ngke e a tiku te wanikiba irarikin te kaawa are raroanako, taani kuakua a tuanga te bwairati bwa te ataeinimwaane e rangi ni korakora tinakon raraana ao e na aki maiu ngkana e kiba nako Seattle. E karaoaki te babaire bwa e na kiba n te abwabwaki ae 200 te maire (320 km) iaon ae bon tiaki kawaina nako Juneau, Alaska, te kabanea ni kaan ni kaawa ae iai ana onaoraki.

Imwiin uotakin te ataeinimwaane nako Juneau, te kiba e a nako Seattle, ngkai e a rangi n rimwiin ana tai. Akea mai ibuakoia bwatintia ae ngurengure, e ngae ngke angiia a na aki roko n aia tai ao reitan kibaia. Ni koauana, ngke te miniti ao te aoa a nako, a ikoikota aia mwane, ni karekea te mwaiti ae bubura ibukin te ataeinimwaane ao ana utu.

Ngke e nang tiku te wanikiba i Seattle, bwatintia a moanna n takarua ni kukurei ngke te bwairati e katanoata bwa e a tia ni karekea te rongorongo man ana rerio bwa te ataeinimwaane e na marurung.⁷

I iangoi taekan booki aika tabu: “Te tangira ae kororaoi bon ana tangira Kristo ae itiaki, … ao ane e kuneaki irouna n te kabanea ni bong, ao e na bon nakoraoi ibukina.”⁸

Taariu ao mwaaneu, tabeua man ara tai aika angaraoi aika korakora ni kaota ara tangira bon inanon oin mweengara. Te Tangira e riai n riki bwa te bwai ae e rangi ni kakawaki ni maiun te utu, ao n tabetai e tuai n roko n anne. E kona n ae e rangi ni bati te aki taotaonannano, e rangi ni bati te kauntaeka, e rangi ni bati te un, e rangi bati te rannimata. E titiraki Beretitenti Gordon B. Hinckley ma te nanokawaki: “Bukin tera bwa [naake] ti tangiriia n ae [moan te bati] a riki n taai tabetai bwa a na butimwaea ara taeka aika aki kakukurei? Bukin tera bwa [ngaira] n tabetai ti taetae ma te nano ni kaikoaki ae korakora n roota te iango?”⁹ Kaeka nakon titiraki aikai a kona ni kakaokoro ibukira n tatabemaniira nako, ao te koaua are e aki tarai bwa e aera ao bukin tera a bon aki kakawaki. Ngkana ti na kawakina te tua bwa ti na itangitangiri, ti riai n karaoira ma te akoi ao te karinerine.

E koaua e na iai taai ngkana boaakira e kainnanoa anganakira inanon mwakoro. Ti na uringa, bwa, te reirei are e kuneaki inanon te Doctrine ao Covenants—n arana, bwa ngkana e riai ibukira bwa kam na boaaki imarenami, ngaira imwiina ti na kaota te rikirake n tangira.¹⁰

I kantaningaia bwa ti na kataia n taainako n riki ni karinerine ao n atai aia iango ao namakin ao aroia naake irarikira. Ti na aki kamamaa ke ni kabuakaka. Ma, ti na riki n nanoanga ao ni kaungaunga. Ti riai n taratara raoi bwa ti na aki uruaka ana aki nanououa te aomata rinanon taeka ao mwakuri aika aki iangoaki raoi.

Te kabwarabure e riai n raona te tangira. Inanon ara utu, n ikotaki naba ma raoraora, e kona n iai te ikoaki n namakin ao n aki boraraoi. Riki, e aki kakawaki bwa uarerekera te bwai anne. Riki, e aki kakawaki bwa uarerekera te bwai anne. E aki kona ao n riai n aki uruaka, ni kabuakaka, ao n tokina ni uruakia. Bukinaia tabeman ibukin bwaai aika bure ake a tia ni karaoi e tukiira man kamaiuakira man te iango. Tii te kabwarabure ae na kamarurung.

Te aine ae tamaroa are e a tia ni mate e kawarai n teuana te bong ao n aki kantaningaaki e tuangai tabeua nanokawakina. E taekina te bwai teuana ae riki n ririki aika bati n nako are e a irekereke ma te tia ununiki ae kaain rarikina, n te taina bon te rao ae tamaroa ma are ngaia ao buuna te mwaane a tia n aki boraraoi iaon bwaai aika bati. N te bong teuana te tia ununiki e titiraki ngkana e kona n toua te kawai ae uarereke n toua abara nakon abana. N te tai aio e toki taetaena nakoiu ao, ma rurun bwanaana, e taku, “Te Tari Monson, I aki kariaia bwa e na riaon abau tao n te tai anne ke n taai riki rimwi ma e riai n nakonkao n toua te kawai ae abwaabaki n ritinaniku ni kawara abana. I bon kaairua, ao I nanokawaki iai. Ai akea ngkai, ma o, I tangiria bwa N na kona n taekinna nakoina, I rangi n nanokawaki.’ I rangi n tangiria bwa e na reke au kauoua n tai n akoi riki.”

Ngke I kakauongo nakoina, I uringa ana maroro ae kanokawaki John Greenleaf Whittier: “Man taeka ni kabane aika kananokawaki aika a kona n taekinaki ke ni koreaki, te kabanea n nanokawaki bon aikai: ‘Bwa ngke ti a tia ni karaoi bwaai n aroia aika a kaokoro riki maiura a na kona n rangi n tamaroa riki!¹¹ Taariu ao mwaaneu, ngkai ti karaoia tabeman ma te iango n te tangira ao te akoi, ti na totokoi aekaki n nanokawaki akanne.

Te tangira e kaotaki ni kawai aika bati aika a kinaaki: te moangare, katean te bai, te taeka n akoi, te karinerine. Tabeua kaotakina a kona n ae a motoatoa riki kinakiia, n aron kaotakin ae iai nanom n ana mwakuri temanna, n anga te reirei ma te akoi ao te taotaonannano, ni kawara temanna ae e aoraki ke n rokanaki ni mweengana. Taeka aikai ao mwakuri ao a bati riki a kona n taekina te tangira.

Dale Carnegie, te I-America ae rangi ni kinaaki ae te tia koro karaki ao te tia reirei, kakoaua bwa ngaira n tatabemaniira nako iai inanon teuaane ke neienne te “mwaaka ni karikirakea mwaitin kukurein te aonaaba … man atongan taeka tabeua ni kakaitau aika nano nakoia tabeman aika maroaa ke ni bwarannano.” E taku, “Tao kam na mwaninga ningabong taeka n akoi ake kam taekin te bong aio, ma te aomata are e karekei taeka akanne e na kona ni kawakinna inanon maiuna.”¹²

I kantaningaia bwa ti na moanna ngkai, te bong raoi aio, ni kaota te tangira nakoia natin te Atua ni kabane, bwa tao ngaia kaain ara utu, raoraora, tii te reitaki ae memeere, ke aomata aika ko aki kinaia. Ngkana ti teirake ni katoa ingabong, ti riai ni baireia ni karaoa te tangira ao te akoi nakon are e na kona n riki.

Tariu am mwaaneu, ana tangira te Atua are e namakinna ibukira e raka iaon are e kona n iangoia temanna. Ibukin te tangira aio, E kanakoa Natina, are e tangiriira n ae tau n anga Maiuna ibukira, bwa ti aonga ni karekea te maiu are akea tokina. Ngkai ti ataia riki ao riki te bwaintituaraoi ae akea kabotauana, nanora a kaonaki ma te tangira ibukin Tamara are Akea tokina, ibukin ara Tia Kamaiu, ao aomata ni kabane. I tataro mwaaka bwa bwaai aika a na riki n aran Iesu Kristo ae tabu, amen.