E Mwaiti Bwai ae I Kan Tibwauai

N tainako ao I aki toki n iangoa te kakatauraoi ae karina ni kaineti ma tararuakiia au utu ao boni ngai. Ma I reireinaki bwa N na iangoa te katauraoi ae kaokoro n te Tabati teuana i maiakin Florida n 1992. Te angibuaka ae Andrew, bon teuana mai buakon kabanea n urubwai ao ni bobuaka n angibuaka are e orea te aba ae te United States, are e kamangaoa aon te tabo n tain te tiamwa ae koro tamaroana i Miami, Florida.

I maeka n tii ngai n te tai ae aki maan n te auti ae uarereke ae kaan ma te bike, bwa I kaea te burokuraem ni kataneiai ae manna teniua namwakaina ibukin au mwakuri. Ngke e a roko te kauring ibukin te angibuaka ae nang roko I reiakinaki bwa ti riai ni kitana autin te kateitei imwain te bwakantaai, temanna ae I kinaa e katauraoi ruun te outero i nukan te aba ibukia raora ni mwakuri ao ai boni ngai. I kamatoai n neerani kairababan au winto ao ni kawakin au bwai.

Ni kantaningan kawarau n te maan ae teuana te wiiki iroun kainnabau ao natiu, I a kaman kaboa te amwarake ae tau ao te ran ibukin au utu ae onoman mwaitia. I ataia raoi bwa ai akea raraomau n te tabo are N na nako iai bwa a bon bane n tau amarake ake N na uoti are a na bane iai inanon tabeua te wiiki.

Ngke I katauraoi bwa N nang nako n 10:30 n te ingabong, I namakina te nakoraoi—a bane n tauraoi bwai ni kabane. I katorobubua n tataro, ni kaitaua te Tama are i Karawa ibukin kakabwaiakiu ao ni bubutia ibukin Ana buoka n tain te angibuaka ae e na roko. Ngke N nang motika au tataro, e kaunga nanou te Tamnei bwa N na taekina, “Ngkana iai temanna ae kainnanoa buokana, taiaoka buokai ni kakaea teuanne ke neienne.”

Inanon tabeua te miniti, te aine ae e a tia ni mate buuna ae wanibwi tabun ana ririki e karebwerebwe iaon au mataroa. “I kabwara au bure,” e taku neierei. “E bure te ruu ae I kawaria. I kakaea raoraou.”

E tara n ae e rangi n nako nanona. Ngke I titiraki ngkana I kona ni buokia, e bon rawawata ao e taku bwa e aki ataia bwa tera ae e na karaoia ke e na nakea. I titirakinna bwa e maeka ia, ao ti a kaai n rianna nakon ana auti ni maeka, n iangoa ana kaangaanga, ao n tarai baike e kainnanoi.

I tuangnga bwa e bae n iai te mwaawa n teuana ruun ara outero n au kambwana, ao I kaoia bwa e kona n tiku irarikira n ara kurubu. E ikenrawa ma te bebete n nano. Ti kawaekoaira ni booti ao ni kamanoa ana auti ao ana bwai, ao I katauraoa temanna ae e na kona ni kabuta ana kaa nakon te outero.

Ngke I a katauraoi bwa N nang nako, uoman riki aine aika a tia ni mate buia a bubuti buokaia. I buokia ni karau nanoia n te aro bwa aonga n itiaki aia iango ao n ataia bwa a na kunea ia kamanoaia. Ngke I tabeki n katokai bwai mairoun temanna raou ni mwakuri, temanna te aine ae e a tia ni mate naba buna ae e a unaine e bubuti buokana. Ti katikui ana bwai aika a kai uruaki n taabo aika mano ao ti buokia ni katauroia n nako.

Ni marenan tai, tabeman tani mwakuri a kaoia uoman ataein te kuura ake a maeka n te atimwakoro bwa a na tiku irarikia kaain ara kurubu n te outero inanon te aba. Kanaia ae inanon baia bon ti te abutana te tinaeki ao te kuata (95 Riita) n ran. N aron tekeraoira, e mwaiti ae N na tibwauaia, tiaki n tii nakoia ma nakoia naba aomata ni kabane.

Bon te kakabwaia n aron te tatauraoi ao te kairaki mairoun te Uea. Aei e anganai te katauraoi ae rau inanon taai ni karawawata ao ni kabanea raoi angin au tai ni buokia tabeman n aki raraomaeakina arou. I karekea aron te kakaitau ae boou ibukin aia reirei au tia kairiri n te nakoanibonga ni bwaina te tatauraoi.