Ngai Dria mai Biribin

Kateimatoa!*

Man te intawiu iroun Amie Jane Leavitt

Ko a tia ni miia ae ko maeka iaon te abamakoro? Aio bon Alejandria, ma ana utu ao raoraona a weteia bwa Dria ni kauarerekea. E maeka iaon te abamakoro ae Cebu i Biribin ma tinana, tamana, ao uoman tarina. Iai mwanena ae ikawai riki nakoina, ma e mate imwaain ae bungiaki Dria. “I ataia bwa e teimatoa n riki bwa kaain ara utu, ao N na nooria n te bong teuana ibukina bwa utu bon akea tokiia,” e taku.

Teuana mai ibuakon te bwai ae I tatangiria ni karaoia bon te taenti. Ngai te tia taenti n te baereete (ballet). N te ririki ae na roko ao I kantaningaia bwa N na kerake riki nakon are iaona, ae te bointe (pointe). Nanon aio bwa N na kauni kaun te baereete aika onoti ni buokai n taenti iaon tabon waeu.

Abamakoron Biribin e raka iaon 7,000, ai ngaia are e rangi ni bati taabo aika tikiraoi ake ko kona ni kawari. Mweengara e kaan ma te bike, ao I tangiria n takakaro i taari. Teuana mamaten nanou bon te uaua. I bon reireinai bwa e na kanga arou ni uaua!

I tangiria n nako ma au utu ni kawari biike aika kakaoro. N te taina ao ti nako Palawan—te abamakoro are te kabanea ni bubura ni karanga n te aonaaba are e mena iaan tano. I nako n tebo ikekei ma au bwai n tebo ao n tarai iika aika toka karaia.

N tebong teuana n te reirei, tabeman kaain au kiraati a taku bwa kaain te Moomon aki kakoaua te Atua. I tuangiia bwa ti kakoaua. Te bong are imwiina I uotii tabeua kaati are a kona ni kabutaki ae iai tamnein Iesu imoan baana ao Taekan te Onimaki ibukina. Ngke kaain au kiraati a noora te tamnei ao ni wareki tabeua are koaua, a kukurei n ataia bwa ti kakoaua te Atua.

I Tangiria n Noora te Tembora

Ti tekeraoi bwa ti maeka ni uakaan mate Cebu City Biribin Tembora. E reke au tai n neweaba te tembora ma au utu imwaain ae katabuaki. Bon te tabo ae tikiraoi, ao man rau. I bon kakaitau bwa man tembora, au utu a kona ni bootaki n aki toki.