Te Rongorongo ni Kakawari n Reirei, Maati 2014
Ana Mition Iesu Kristo ae Mairoun te Atua: Ootan te Aonaaba
Tataro mwaaka ni kamatebwaia te bwai n reirei aei ao ukoukoria bwa ko na ata te bwai ae ko na tibwauaia. E na kanga ataakin maiun ao mwiokoan te Tia Kamaiu ni kakorakora am onimaki Irouna ao ni kakabwaiaia naake ko tararuaia rinanon te kakawari n reirei? Ibukin rongorongona riki tabeua, nakon reliefsociety.lds.org.
Ngkai ti a matata riki bwa Iesu Kristo bon Ootan te Aonaaba, ti na karikirakea ara onimaki irouna ao n riki bwa te oota nakoia tabeman. Kristo e kaota ana mwakuri bwa te oota ni koaua are e kaotaia mwaane ao aine ake a roko nakon te aonaaba” (tara D&C 93:2) ao ni bubuti bwa ti na taua i eta [Ana] taura bwa e na oota nakon te aonaaba” (3 Nibwaai 18:24).
Ara burabeti a kaota naba Ootan Kristo. Beretitenti Henry B. Eyring, te Moan Kauntira n te Moan Beretitentii, e taku: “Ni katoa tai are ko rineia bwa ko na kataia n maiu n ai aron riki te Tia Kamaiu, e na kakorakoraki am koaua. Ko na ataia raoi i bon iroum bwa bon Ngaia Ootan te Aonaaba. … Ko na kaota nakoia aomata Ootan Kristo inanon maium.”
Unimwaane Quentin L. Cook man te Kooram n Abotoro n te Tengaun ma Uoman e taekina arora n riki bwa te oota nakon te aonaaba: “Ti kainnanoa kamanoakin ara utu ao ni kabanei riki nanora n te bwai ae kakawaki n ikotaki ma aomata ni kabane ake a nanoanga ni karaoan bwai ni kabane are ti kona ni kawakina iai te oota, kantaninga, ao te aro ae riai inanon ara kaawa.”
Man Koroboki aika Tabu
Ioane 8:12; Doctrine ao Covenants 50:24; 115:5
Man Rongorongora
Aine Aika Itiaki n te bong aei a teimatoa n taui ieta ootaia
N te ka 80 ni burooa ae raka rietatana iaon Hong Kong, Tiaina, temanna te tari te aine ae iai mwaukin rabwatana—bon tii ngaia te Aomata ae Itiaki n ana utu—e karaoa mweengana bwa te tabo ae tabu ike ngaia ma ana iruwa a kona n namakina korakoran te Tamnei. E kawakin booki aika tabu, ana boki n reirei n te Bootaki n Aine, ao ana boki n anene ni kaan irarikina. E mwananga nakon te tembora bwa e na karaoi otenanti ibukia ana bakatibu.
Iaon Brazil te tina ae raoiroi e kaikawaiiarake natina n ootan te euangkerio. Anenen te Moanrinan e kaona te eea inanon mweenga ae te buriki ae uraura, ao tamnei man te Riaona ibukin taian tembora, ana burabeti te Atua, ao te Tia Kamaiu ni kaona aon te oo. Ngaia ma kainnabana te mwaane a anganano bwa a na kabaeaki n te tembora bwa aonga ni bungiaki natiia inanon te berita. Ana tataro ae teimatoa bwa te Uea e na buokia ni kaikawaiiarake natina n ootan, koauan, ao korakoran te euangkerio.
© 2014 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA Kariaiakaki n te Ingiriti: 6/13. Kariaiakaki rairana: 6/13. Rairan te Visiting Teaching Message, March 2014. Kiribati. 10863 859