Ebusua na Anyɛnkofo Afebɔɔ

Bea biara a itse no, ewɔ anyɛnkofo a wɔrohwehwɛ ahomka kɛsenara no a enya ɔnam Jesus Christ asɛmpa nsanananmu a edze rebɔ bra no. Bia a wonnkotum dze nsɛmfua akyerɛ dɛm ahomka no, mbom wotum hu ber a wɔhwɛ hu wɔ w’abrabɔ mu no. Wɔbɛper dɛ wobosũa dɛm ahomka no ne fibea, nkanka dɛ woehu nsɔhwɛ horow a ehyia a ɔtse dɛ dza wohyia no.

Enya ahomka ber a isiee Nyame Ne mbrasɛm no. Ɔno nye edze asɛmpa no roebɔ bra no, aba no a wɔabɔ ho anohoba no (hwɛ Mosiah 2:41). Nnsie Nyame Ne mbrasɛm no nokwar mu ama nkorɔfo eehu wo, mbom Ewuradze risiesie hɔn a wɔhwɛ w’ahomka a enya no, ma wɔatse Nsanananmu asɛmpa mu nsɛmpa no.

Nhyira no a wɔdze ama wo no dze asɛdze na akwanya nwanwa binom abrɛ wo. Dɛ eyɛ Jesus Christ ahyɛmu osũanyi no, ewɔ asɛdze dɛ etserɛw akwanya no ma binom benya ahomka kɛsenara, nkanka w’anyɛnkofo na w’ebusua mu mba.

Ewuradze hun w’akwanya no na Ɔdze mbrasɛm yi kyerɛkyerɛɛ w’asɛdze mu: “Obiara a [ɔ]abɔ no kɔkɔ no, no so bɔbɔ no nua kɔkɔ” (N & A 88:81).

Ewuradze nam nsesã a ɔba w’akoma mu ber a egye to mu dɛ edze Jesus Christ asɛmpa no bɔbɔ bra no do, ma dɛm mbrasɛm yi yɛ mberɛw dɛ ibedzi do. No nsunsuando no, wo dɔ ma nkaafo nyin, dɛmara na wo pɛ ma hɔn dɛ wobenya ahomka kor noara no a enya no.

Dɛm nsesã no ho mfataho kor nye mbrɛ egyee too mu dɛ ebɔboa Ewuradze N’asɛmpasomafo edwuma no. Ɔnnkyɛr na etuhoakyɛ asɛmpasomafo ehu dɛ wobotum enya enyidado mbuae pa efi nyia a ɔasakyer nokwar mu a ɔfa nhwehwɛmunyi ebisadze ho. Onyia a ɔasakyer no pɛ dɛ n’anyɛnkofo na ebusua mu mba nye hɔn kyɛ hɔn enyigye no.

Sɛ wo ward asɛmpakã banodzinyi anaa asɛmpasomafo bisa wo nkorɔfo a wɔbɛkyerɛkyerɛ hɔn edzin a, ɔyɛ ayeyi kɛse ma wo. Wonyim dɛ anyɛnkofo ehu w’enyigye no na, dɛm ntsi, dɛm anyɛnkofo no ayɛ ahoboa dɛ wobetsie na wɔasan mu agye asɛmpa no ato mu. Na wɔwɔ awerɛhyɛmu dɛ ebɛyɛ nyɛnko no a wobehia no ber a wɔba ahenman no mu no.

Onnyi dɛ isuro dɛ wobegyaa nyɛnkoyɛ sɛ ito nsa frɛ anyɛnkofo no dɛ wonhyia asɛmpasomafo no a. Mowɔ anyɛnkofo a wɔpoow asɛmpasomafo no na mbom wɔada me ase mfe pii mu dɛ memaa hɔn biribi a wonyim dɛ ɔsom me bo. Hom botum ayɛ anyɛnkofo afebɔɔ ber hom dze asɛmpa no a woehu dɛ ɔdze enyigye abrɛ hom no, ma. Mma akwanya bi mmpa wo ho dɛ ibɔoto nsa afrɛ nyɛnko bi na nkanka ebusua mu ba bi dɛ ɔnsan mu mfa enyigye nhyehyɛɛ no.

Akwanya kɛse biara nnkyɛn dɛm nsato no a wɔdze kɔ Asɔr ne temple horow mu no. Hɔ no na Ewuradze botum ama hɛn ewuakɔr no nkwagye ayɛdze horow no a woenntum anngye no wɔ hɔn nkwaber mu no. Wɔdze ɔdɔ na enyidado hwɛ ase hwɛ wo. Ewuradze abɔ anohoba dɛ wobenya kwan aba N’ahenman mu (hwɛ N & A 137:7–8), na Ɔdze hɔn ho dɔ ahyɛ w’akoma mu.

Hom mu dodow enya ahomkã ber a hom yɛ ayɛdze wɔ temple mu ma binom, tse dɛ ber a edze nkorɔfo edzin ma asɛmpasomafo. Hom enya ahomkã kɛse mpo ber a hom reyɛ ayɛdze ama hom ewuakɔr no. Woyii kyerɛɛ Joseph Smith Nkɔnhyɛnyi no dɛ hɛn onnyiewiei enyigye botum aba mu a nna gyedɛ yedua temple ayɛdze a yegyina ananmu yɛ no do ebuei dɛm nhyira no kwan no ama hɛn ewuakɔr (hwɛ D&C 128:18).

Borɔnyaber dan hɛn akoma kɔ Agyenkwa no do na dɛwdzi a N’asɛmpa no dze abrɛ hɛn. Yɛkyerɛ hɛn enyisɔ ma No yie mu ber a yɛma binom dɛm enyigye no. Enyisɔ bɛdan abɛyɛ ehurusi ber a yɛdze edzin ma asɛmpasomafo nye ber a yɛdze hɛn ewuakɔr edzin kɔ temple. Hɛn enyisɔ ho adanse no botum ayɛ anyɛnkofa na ebusua ebusua a wobetsim afebɔɔ.