Pagkahimong Misyonaryo sa Isangyaw ang Akong Ebanghelyo

Ang mga misyonaryo sa Isangyaw ang Akong Ebanghelyo nasayud ug nakasabut kinsa ang ilang girepresentaran, ngano nga sila nagserbisyo, ug unsa ang ilang buhaton. Ang full-time nga mga misyonaryo gitawag sa pagserbisyo ug gi-set apart sa tukmang paagi isip mga sulugoon ug mga representante ni Ginoong Jesukristo. Nagsaksi kita sa Iyang ngalan ug sa katinuod, kabalaan, ug misyon ni Jesukristo ngadto sa matag kanasuran, kaliwatan, pinulongan ug katawhan (tan-awa sa D&P 133:37).

Gihigugma nato ang Ginoo. Nagserbisyo kita Kaniya. Nagsunod kita Kaniya. Nagrepresentar kita Kaniya.

Ang Iyang mga katuyoan kinahanglan mao usab ang atong katuyoan. Ang Iyang interes kinahanglan mao usab ang atong interes. Ang Iyang buhat kinahanglan mao usab ang atong buhat. Ang Iyang mga paagi kinahanglan mao usab ang atong mga paagi Ang Iyang kabubut-on kinahanglang mamahimong atong kabubut-on.

Isip mga representante sa Manunubos, kita nagsangyaw sa sukaranang mga doktrina ug mga baruganan sa Iyang gipahiuli nga ebanghelyo sa yano ug klaro nga paagi. Wala kita maghatag og personal nga mga opinyon o pangagpas. Kita nagpahayag ug nagpamatuod sa yano nga gipahiuli nga kamatuoran sa pamaagi sa Ginoo ug pinaagi sa gahum sa Iyang Espiritu.

Ang mga misyonaryo sa Isangyaw ang Akong Ebanghelyo nakasabut nga ang responsibilidad sa pagrepresentar sa Manluluwas ug sa pagpamatuod mahitungod Kaniya dili gayud matapos. Palihug hinumdumi Siya diha sa tanan ninyong paghunahuna, sa tanan ninyong buhaton, ug sa tanan ninyong gipaningkamutan nga mahimo, ug pagrepresentar Kaniya sa husto nga paagi ngadto sa tanang mga anak sa Langitnong Amahan nga inyong ikahimamat karon ug sa kanunay.

Usa ka importante nga kinahanglanon aron mahimong misyonaryo sa Isangyaw ang Akong Ebanghelyo mao ang personal nga katakus atubangan sa Manluluwas.

Tuguti ko nga mosulti og pipila ka yanong mga kamatuoran sa pinakaklarong paagi nga akong mahimo.

• Kita ang gitugutan nga mga representante sa Manunubos ug Manluluwas sa kalibutan.

• Gitawag kita sa pagpahayag sa Iyang gipahiuli ug walay katapusan nga ebanghelyo.

• Kinahanglang dili kita mamansahan sa kahugaw sa kalibutan ug magrepresentar Kaniya nga may pagtugot ug molihok uban sa gahum sa Iyang balaan nga ngalan.

• Dili kita makatabang sa uban sa pagbuntog sa pagkaulipon sa sala kon kita mismo nalambigit sa sala (tan-awa sa D&P 88:86).

• Dili kita makatabang sa uban nga makat-on sa paghinulsol kon kita wala makat-on sa paghinulsol sa eksakto ug tukmang paagi.

• Kita makapahayag ug makasangyaw lamang uban sa gahum nianang atong gipaningkamutan.

• Manubag kita sa Dios alang sa atong matarung nga mga tinguha ug katakus sa paglihok isip Iyang mga tinugyanan.

Wala kinahanglana nga kita mahimong hingpit karon. Apan gimandoan kita nga magmalimpyo ug sa paglakaw nga matarung atubangan sa Manunubos sa Israel. “Paglimpyo kamo nga nagdala sa mga butang sa Ginoo” (D&P 38:42).

Ang paghinulsol mao ang usa ka baruganan sa paglaum ug pagkaayo—dili sa kahigawad ug kawalay paglaum. Ang paghinulsol sa tinuod makapaubos—apan dili makahadlok. Ang paghinulsol makahasol ug makahupay, masakit ug makakalma. Ang paghinulsol maoy bililhong gasa nga nahimong posible pinaagi sa Pag-ula Kaniya nga atong gihigugma, giserbisyuhan, ug gisunod.

Bisan kon kamo nakasala og grabe, pinaagi sa Pag-ula ni Jesukristo ug sinsero nga paghinulsol, kamo mahimong limpyo ug takus.

Adunay kabatan-onan kinsa kinahanglan nga maghinulsol pa sa hingpit. Karon ang panahon. Palihug, palihug, palihug ayaw langaya ang adlaw sa inyong paghinulsol.

Adunay kabatan-onan kinsa naghinulsol ug padayon nga naghinulsol ug naghunahuna kon nahimo ba nila ang tanan nga gikinahanglan aron madawat sa Ginoo (tan-awa sa D&P 97:8). Palihug hinumdumi, ang Ginoo nagkinahanglan kaninyo nga malimpyo apan dili hingpit. Ang Espiritu Santo nga naglihok pag-usab sa inyong kinabuhi mao ang labing siguro nga timailhan sa kapasayloan sa Ginoo tungod kay “ang Espiritu sa Ginoo dili mopuyo sa dili balaan nga mga templo” (Helaman 4:24). Ug hibaloi nga ang sugo nga “mopasaylo sa tanan nga mga tawo” (D&P 64:10) naglakip sa pagpasaylo sa inyong kaugalingon.

Ang mga misyonaryo sa Isangyaw ang Akong Ebanghelyo mao ang mga disipulo nga nagtuman sa pakigsaad ug mga sugo ni Ginoong Jesukristo. Palihug hinumdumi Siya kanunay ug magmaputli ug magpakatakus sa pagrepresentar Kaniya.

Dapiton ko kamo nga “mahala sa kanunay diha sa inyong mga hunahuna ang mga pulong sa kinabuhi” (D&P 84: 85). Ang pagmahal sa mga pulong sa kinabuhing dayon labaw pa sa pagtuon o pagmemorya lamang, sama nga ang “pagbusog sa (mga) pulong ni Kristo” (2 Nephi 31: 20; tan-awa usab 2 Nephi 32: 3) mas labaw pa sa pagtilaw o pag-snack lamang. Ang pagmahal nagsugyot nako sa pag-focus ug pagpaningkamot, pagsiksik ug paghangup, pagpamalandong ug pag-ampo, paggamit ug pagkat-on, paghatag og bili ug pagpasalamat, ug pagtagamtam.

Hinumdumi kon sa unsa nga paagi ang mga anak nga lalaki ni Mosiah—upat ka tinud-anay nga talagsaong mga misyonaryo nga ginganlan og si Ammon, Aaron, Omner, ug Himni—“nag-anam kalig-on diha sa kasayuran sa kamatuoran; kay sila mga tawo nga mabuot og salabutan ug sila misiksik sa mga kasulatan sa kakugi” (Alma 17:2).

Kining walay kahadlok nga mga misyonaryo sa tinud-anay nagmahal kanunay sa mga pulong sa kinabuhing dayon.Wala nila ibaliwala o naghimo lang sa naandan nga indibidwal ug kompanyon nga pagtuon sa kasulatan. Ang espirituhanong kahibalo ug panabut midulot sa ilang kaugalingong mga kalag, ug ang doktrina ug mga baruganan sa ebanghelyo nakumpirma sa ilang mga kasingkasing nga tinuod pinaagi sa gahum sa Espiritu Santo.

Isip mga representante sa Manluluwas, kamo ug ako adunay nagpadayon nga responsibilidad sa pagkugi ug pagtanom diha sa atong mga kasingkasing ug hunahuna sa sukaranang mga doktrina ug mga baruganan sa gipahiuli nga ebanghelyo, ilabi na gikan sa Basahon ni Mormon. Kon atong buhaton, ang gisaad nga panalangin mao nga ang Espiritu Santo “magpahinumdom [kanato] sa tanang butang” (Juan 14:26) ug mohatag nato og gahum samtang kita motudlo ug mopamatuod. Apan ang Espiritu makalihok uban ug pinaagi nato lamang kon kita mohatag Kaniya og usa ka butang nga lihukon. Dili Siya makatabang nato sa paghinumdom sa mga butang nga wala nato makat-uni (tan-awa sa Alma 31: 5).

Ang mga misyonaryo sa Isangyaw ang Akong Ebanghelyo nagmahal kanunay sa mga pulong sa kinabuhing dayon, nagsalig sila sa mga hiyas sa pulong, ug anaa kanila ang gahum sa pulong. Palihug hinumdumi Siya kanunay, magpakatakus kanunay sa pagrepresentar Kaniya, ug magmahal ug magsalig sa hiyas sa pulong.

Ang Espiritu Santo mao ang ikatulo nga sakop sa Dios nga Kapangulohan, ug Siya ang saksi sa tanang kamatuoran ug ang labing mahinungdanon ug tinuod nga magtutudlo. Ang mga leksyon nga atong gitudlo ug ang mga pagpamatuod nga atong gihatag mao ang nag-andam sa usa ka investigator nga molihok ug mokat-on sa iyang kaugalingon.

Isip mga misyonaryo, usa sa atong labing importante nga mga tahas mao ang pagdapit sa mga investigator sa paggamit sa ilang moral nga kabubut-on ug pagbuhat sumala sa mga pagtulun-an sa Manluluwas. Ang paghimo ug pagtuman sa espiritwal nga mga pasalig, sama sa pag-ampo alang sa usa ka saksi sa kamatuoran, ang pagtuon ug pag-ampo mahitungod sa Basahon ni Mormon, pagtambong sa mga miting sa Simbahan, ug sa pagsunod sa mga sugo, nagkinahanglan nga ang usa ka investigator adunay hugot nga pagtuo, sa paglihok, ug sa pag-usab.

Bisag unsa pa ka sinsero kita nga nagserbisyo, kamo ug ako dili makapugos sa kamatuoran ngadto sa mga kasingkasing sa mga investigator. Ang atong pinakamaayo nga paningkamot mao lang ang pagsangyaw sa mensahe sa kamatuoran ngadto sa kasingkasing (tan-awa sa 2 Nephi 33:1). Sa katapusan, ang investigator kinahanglang molihok subay sa pagkamatarung ug sa ingon modapit sa kamatuoran ngadto sa iyang kaugalingong kasingkasing. Pinaagi lamang niini ang matinud-anong nangita sa kamatuoran ug bag-ong mga kinabig makapalambo sa espirituhanong kapasidad sa pagpangita og mga tubag sa ilang mga kaugalingon.

Tungod kay ang atong responsibilidad mao ang pagtabang sa mga investigator nga makakat-on pinaagi sa hugot nga pagtuo ug sa gahum sa Espiritu Santo, kini nga buhat dili mahitungod kanako ug dili mahitungod kaninyo. Kinahanglang maningkamot kita kutob sa mahimo sa pagtuman sa atong misyonaryo nga mga responsibilidad ug “mopadaplin” aron ang Espiritu Santo makahimo sa Iyang sagradong katuyoan ug buhat. Gani, kon kamo ug ako isip mga representante sa Manluluwas mobuhat og bisan unsa aron mahatagan og atensyon ang kaugalingon—sa mga mensahe nga atong gitudlo, sa pamaagi nga atong gigamit, o sa atong personal nga kinaiya ug panagway—kini usa ka matang sa priestcraft nga makapugong sa epektibo nga pagtudlo sa Espiritu Santo.

“Siya magsangyaw ba niini pinaagi sa Espiritu sa kamatuoran o sa lain nga paagi? “Ug kon kini pinaagi sa uban nga paagi kini dili gikan sa Dios” (D&P 50:17–18).

Palihug hinumdumi Siya kanunay, magpakatakus nga magrepresentar Kaniya, magmahal sa Iyang pulong, ug magtugot sa labing mahinungdanon ug tinuod nga magtutudlo, ang Espiritu Santo, sa pagsaksi sa tanang kamatuoran.

Samtang naglingkod ang Manluluwas sa Bukid sa Oliba, Siya mipahayag: “Ayaw ninyo kagul-ing daan kon unsa ang inyong igasulti; apan kinahanglan isulti ninyo ang bisan unsa nga igahatag kaninyo niadtong taknaa, kay dili kamo mao ang magasulti kon dili ang Espiritu Santo” (Marcos 13:11).

Ang Manluluwas sa sayong bahin niini nga dispensasyon misugo sa mga misyonaryo nga “ablihi ang inyong mga ba-ba ug kini makasulti” (D&P 33:8, 10) ug “ipataas ang inyong mga tingog ngadto niini nga mga katawhan; ipamulong ang mga hunahuna diin Ako mobutang sa inyong mga kasingkasing, ug kamo dili pagalibugon sa atubangan sa mga tawo; kay ihatag kini kaninyo sa takna gayud, oo, sa diha gayud nga higayon, unsa ang inyong isulti” (D&P 100:5–6).

Kini nga mga kasulatan mipasabut sa labing malisud ug higpit nga sumbanan sa pagsangyaw ug pagtabang sa mga investigator sa pagkat-on sa kamatuoran. Ang mga misyonaryo sa Isangyaw ang Akong Ebanghelyo nasayud nga kita wala magtudlo sa mga leksyon; kita nagtudlo sa mga tawo. Dili lamang nato i-recite o ipresentar ang gimemorya nga mga mensahe kabahin sa mga hilisgutan sa ebanghelyo. Gidapit nato ang nangita sa kamatuoran nga makasinati og dakong kausaban sa kasingkasing. Nakasabut kita nga ang pag-istorya ug pagsulti lang wala magtudlo.

Ang pagsangyaw sa ebanghelyo sa pamaagi sa Ginoo naglakip sa pag-obserbar ug pagpaminaw ug pag-ila isip kinahanglanon sa pagpakig-istorya. Ang pagkasunod-sunod niining upat ka konektadong mga proseso importante. Palihug hinumdumi nga ang aktibo nga pag-obserbar ug pagpaminaw mag-una sa pag-ila ug nga ang pag-obserbar, pagpaminaw, ug pag-ila mag-una sa dili pa mosulti. Ang paggamit niini nga sumbanan makapahimo sa mga misyonaryo sa pag-ila ug sa pagtudlo sumala sa mga panginahanglan sa mga investigator.

Samtang kita mag-obserbar, maminaw, ug mag-ila, mahatagan kita “niini nga takna kana nga bahin nga igahin ngadto sa matag tawo” (D&P 84:85)—sa mga kamatuoran sa pagpasabut ug sa mga tubag nga makatabang sa piho nga mga panginahanglan sa maong investigator. Pinaagi lamang sa pag-obserbar, pagpaminaw, ug pag-ila nga kita magiyahan sa Espiritu sa pasulti ug sa pagbuhat sa mga butang nga labing makatabang niadtong atong giserbisyohan.

Ang pag-obserbar mao ang usa ka importante nga pagpangandam sa pagdawat sa espirituhanong mga gasa sa pag-ila. Ang pag-ila mao ang pagtan-aw pinaagi sa espirituhanong mga mata ug pagbati uban sa kasingkasing—pagkakita ug pagbati sa ka sayup sa usa ka ideya, sa kamaayo sa laing tawo, o sa sunod nga mga baruganan nga gikinahanglan sa pagtabang sa usa ka investigator. Ang pag-ila mao ang pagpaminaw sa espirituhanong mga dunggan ug pagbati uban sa kasingkasing—ang pagpaminaw ug pagbati sa wala masulti nga kabalaka diha sa komentaryo o pangutana, sa katinuod sa usa ka pagpamatuod o doktrina, o sa kasiguroan ug kalinaw nga moabut pinaagi sa gahum sa Espiritu Santo.

Ang mga misyonaryo sa Isangyaw ang Akong Ebanghelyo maglihok pinaagi sa hugot nga pagtuo ug giniyahan sa Espiritu sa pagtabang sa mga investigator nga makat-on sa kamatuoran. Palihug hinumdumi Siya kanunay; magpakatakus sa pagrepresentar Kaniya; mahala ang Iyang pulong; motugot sa Espiritu Santo sa pagsaksi sa tanang kamatuoran; ug mag-obserbar, maminaw, ug moila samtang kamo nagpamatuod ni Jesukristo ngadto sa matinud-anong nangita sa kamatuoran.