Mga Tin-edyer ug mga Pakigsaad sa Templo

Ang mga ginikanan makapakita sa ilang mga anak sa kaimportante sa templo pinaagi sa pag-adto sa templo ug pinaagi sa pagpakigbahin sa ilang mga pagpamatuod sa buhat sa templo. Bisan sa mga dapit diin lisud ang kanunay nga pag-adto sa templo, ang mga ginikanan makasilsil sa ilang mga anak og tinguha nga moadto sa templo.

Si Presidente Howard W. Hunter (1907–95) mitudlo sa mga ginikanan: “Atong ipakigbahin sa atong mga anak ang atong espirituhanong mga pagbati diha sa templo. Ug tudloan nato sila sa kinasingkasing ug sa mas komportable nga paagi sa mga butang nga tukma natong masulti mahitungod sa mga katuyoan sa balay sa Ginoo.”¹ Ang atong mga anak kinahanglang masayud nga ang templo usa ka dapit diin kita makadawat og mga tubag sa atong pag-ampo ug mabati ang gugma sa Dios.

Ang mga ginikanan makatudlo usab sa ilang mga anak nga maghinam-hinam ug magpakabuhi nga takus aron sila makaangkon og may kinutuban nga gamit nga rekomend kon moedad na sila og 12 anyos. Kon moabut na ang panahon nga kining mga batan-on motambong, among naobserbaran ang kalipay ug garbo kon ilang ipakita ang ilang mga rekomend sa templo.

Ang mga ginikanan makatabang nga paapilon ang ilang mga anak sa pagsiksik sa family history aron kon mag-12 anyos na sila madala nila ang mga ngalan sa pamilya ngadto sa templo. Sa mga kabatan-onan nga nagbuhat niini, si Elder David A. Bednar sa Korum sa Napulog Duha ka mga Apostoles misaad: “Ang inyong gugma ug pasalamat alang sa inyong mga katigulangan motubo. Ang inyong pagpamatuod ug pagkakabig ngadto sa Manluluwas mahimong lig-on ug malungtaron. Ug ako mosaad nga kamo panalipdan batok sa grabe nga impluwensya sa kaaway.”²

Nakita namo ang daghang mga panig-ingnan nga kining saad natuman. Bag-ohay lang usa ka batan-ong babaye misulti kanamo nga human nga nagsiksik sa pangalan sa iyang lola, miadto siya sa templo sa paghimo sa buhat alang sa iyang lola. Siya miingon nga samtang siya gibunyagan alang sa iyang lola, siya adunay klaro nga mga impresyon nga iyang lola motimbaya niya sa sunod nga kinabuhi. Mga kasinatian nga sama niini makapalig-on sa mga pagpamatuod ug makasilsil og tinguha nga mopahigayon pa sa ubang mga ordinansa sa templo.

Daghan sa mga kabatan-onan nag-atubang sa mga tintasyon sa dili pagtarung og sininaan. Kon ang mga ginikanan ug mga lider magsul-ob og nindot, tarung nga mga sinina, makahunahuna usab ang mga kabatan-onan nga ila usab ning mabuhat. Ang mga batan-on kinahanglang makasabut nga ang paagi sa pagsinina ug unsaon nila pagtratar ang ilang mga lawas nagpakita sa ilang pagkadisipulo.

Ang mga ginikanan makatabang sa mga kabatan-onan sa pag-andam sa pagsulod sa templo pinaagi sa pagtabang nila nga makasabut sa mga pakigsaad nga ilang gihimo didto. Ang mga pakigsaad sa templo naglakip sa mga saad sa “pagsunod sa balaod sa higpit nga mga hiyas ug kaputli, magmanggiloy-on, masinabtanon ug putli; ipahinungod ang talento ug mga materyal nga kapanguhaan sa pagpakatap sa kamatuoran ug sa pagbayaw sa [pamilya]; sa pagpadayon sa debosyon sa kawsa sa kamatuoran; ug sa pagtinguha sa tanang paagi para makatampo sa dakong pagpangandam aron ang yuta maandam sa pagdawat sa iyang Hari—si Ginoong Jesukristo.”³ Ang mga ginikanan makapamatuod nga ang mga batan-on makadawat og personal ug gamhanan nga mga panalangin sa tibuok nilang kinabuhi samtang sila nagsunod niini nga mga pakigsaad, ug kini nga mga pakigsaad nahimong mas makahuluganon alang sa kabatan-onan kon ang ilang mga ginikanan motabang kanila nga makasabut nga ang mga panalangin ug mga pakigsaad nahimong posible tungod sa Pag-ula ni Jesukristo.

Adunay daghang mga paagi nga kita makatabang nga ang atong mga anak ug mga kabatan-onan makadawat sa mga panalangin sa templo. Kon mas andam sila, mas magmalinawon sila ug mobati sa Espiritu ug sa ingon makabaton og dako nga espirituhanong mga kasinatian kon ilang madawat ang ilang endowment. Ang makapabayaw nga kasinatian sa templo makapahimo kanila nga mas mapasaligon nga mga disipulo ni Kristo ug mas maayo nga mga misyonaryo—madasigon sa pagtabang niadtong ilang gitudloan sa pag-andam sa pagdawat sa ilang kaugalingong mga sagrado nga mga ordinansa diha sa templo.