Ang Balaan nga Misyon ni Jesukristo: Tiglalang

Tun-i kini nga materyal sa mainampuon nga paagi ug, hunahunaa unsay inyong ipakigbahin sa mga sister nga inyong gibisitahan. Sa unsa nga paagi nga ang pagsabut sa kinabuhi ug misyon sa Manluluwas makapadugang sa inyong hugot nga pagtuo Kaniya ug mopanalangin niadtong inyong gibantayan? Alang sa dugang nga impormasyon, adto sa reliefsociety.lds.org.

Hugot nga Pagtuo, Pamilya, Kahupayan

Si Jesukristo “naglalang sa mga langit ug sa yuta” (3 Nephi 9:15). Gibuhat Niya kini pinaagi sa gahum sa priesthood, ubos sa pagdumala sa atong Langitnong Amahan (tan-awa sa Moises 1:33).

“Magpasalamat kita nga usa ka maalamon nga Tiglalang mibuhat sa kalibutan,” miingon si Presidente Thomas S. Monson, … aron makasinati kita og panahon sa pagsulay, oportunidad sa pagmatuod sa atong kaugalingon aron mokwalipay sa tanan nga giandam sa Dios nga atong dawaton.”¹ Kon atong gamiton ang atong kabubut-on sa pagsunod sa mga sugo sa Dios ug maghinulsol, kita mahimong takus sa pagbalik og puyo uban Kaniya.

Kabahin sa Paglalang, si Presidente Dieter F. Uchtdorf, Ikaduhang Magtatambag sa Unang Kapangulohan, miingon:

“Kita ang hinungdan nga Iyang gilalang ang universe! …

“Kini ang kalainan sa tawo: itandi ngadto sa Dios, ang tawo walay bili; apan kita ang tanan alang sa Dios.”² Ang pagkasayud nga gilalang ni Jesukristo ang kalibutan para nato tungod kay kita gimahal pag-ayo sa Langitnong Amahan makatabang nato nga kita mas mohigugma Kanila.

Gikan sa mga Kasulatan

Juan 1:3; Mga Hebreohanon 1:1–2; Mosiah 3:8; Moises 1:30–33, 35–39; Abraham 3:24–25

Gikan sa Atong Kasaysayan

Kita gilalang sa panagway sa Dios (tan-awa sa Moises 2: 26–27), ug kita adunay balaanong potensyal. Si Propeta Joseph Smith mipahimangno sa mga sister sa Relief Society sa “pagpakabuhi subay sa [ilang] pribilehiyo.”³ Uban niana nga pag-awhag isip pundasyon, ang mga sister sa Ang Simbahan ni Jesukristo sa mga Santos sa Ulahing mga Adlaw gitudloan sa pagpakabuhi subay sa ilang balaan nga potensyal pinaagi sa pagtuman sa mga katuyoan sa Dios alang kanila. “Kon sila makasabut na kon si kinsa gayud sila—anak nga mga babaye sa Dios, uban sa dala sa pagkatawo nga tiunay nga katakus sa paghigugma ug pag-alima—sila makakab-ot sa ilang potensyal isip balaang mga babaye.”⁴

“Kamo karon nahimutang sa sitwasyon diin kamo makalihok pinasubay niadtong mga maloloy-ong pagbati nga gitanom sa Dios diha sa inyong mga dughan,” miingon si Propeta Joseph Smith. “Kon kamo mopuyo sumala niini nga mga baruganan, unsa ka dako og kamahimayaon!—kon kamo mopuyo sumala sa inyong mga pribilehiyo, ang mga anghel dili mapugngan nga mahimo ninyong mga kauban.”⁵

Litrato sa Christus ni David Nystul; background pinaagi ni Hemera/Thinkstock