Unsay Nakapaanhi Ninyo sa Rexburg?

Human sa daghang mga dekada nga pagpuyo diin ang mga miyembro sa Simbahan mga minoriya, ang akong bana ug ako mibalhin sa Rexburg, Idaho, USA, nga adunay duha lang ka pamilya nga dili miyembro sa simbahan. Swerte nga among nasilingan ang usa kanila.

Ang amahan nanghagbas sa sagbut sa iyang nataran sa unang higayon nga migrahe mi sa among parkingan. Ang akong bana ug ako mitabok sa among nataran aron makig-ila-ila. Ako nangutana, samtang nakiglamano, “Unsa ang nakapaanhi sa inyong pamilya dinhi sa Rexburg?”

Siya mitubag, “Akong trabaho—ug nangita gyud mi og pihong lungsod nga kinahanglang ipaila-ila kang Kristo.”

Akong gibati nga daw usa ka baldi sa bugnaw nga tubig gibu-bu sa akong nawong, apan mipahiyum ko. Determinado ko nianang higayona nga bisan unsa ang gisulti o gibuhat sa among bag-ong silingan, kami gyud ang mahimong pinakamaayong silingan sa pamilya. Kami maningkamot sa pagtubag sa matag interaksyon uban nila sa kamabination, kamahigugmaon, ug kamapuslanon, sama sa buhaton sa Manluluwas.

Adunay daghang komon nga mga kalihokan tali sa among mga pamilya sa misunod nga walo ka tuig. Ang inahan gidapit ug mitambong sa mga kalihokan sa Relief Society. Siya midapit kanako ug sa daghan namong mga silingan nga mga Santos sa Ulahing mga Adlaw sa usa ka Kristiyano nga retreat alang sa mga babaye nga gipasiugdahan sa ilang simbahan. Ang akong bana ug ako gidapit sa mga sayaw ug piano recital sa ilang mga anak. Apil ang ilang pamilya sa mga luto-luto ug salo-salo sa kasilinganan. Ug tawagan mi sa dagko na nilang mga anak kon sila kinahanglan nga mosakay gikan sa trabaho ug dili makakontak sa ilang mga ginikanan.

Ang mga ginikanan nabalaka nga ang ilang mga anak maganahan na unya sa Santos sa Ulahing mga Adlaw, mao nga wala na nila tuguti ang ilang anak nga mga lalaki nga moapil sa programa sa Scouting sa among ward. Apan ilang gikonsiderar ang among panimalay nga luwas nga lugar, diin tugutan nila ilang mga anak nga makigdula sa among mga apo kon mobisita.

Sa matag higayon nga ipakita sa among silingan ang “among mga sayop,” among ipahinumdum kanila nga kami adunay dakong pagtahud sa ilang gituohan ug sa pamaagi sa ilang pagpakabuhi ug sa pag-amuma sa ilang mga anak. Among dugangan nga kami naglaum og sama nga pagtahud sa among pagtuo, nga nakasentro usab sa mga pagtulun-an sa Manluluwas.

Sa dihang ang inahan misulay sa paggamit sa kalainan sa pagtuo aron mapalayo sa amoa pinaagi sa pagpangangkon nga ang mga Santos sa Ulahing mga Adlaw mituo sa “lahi nga Jesus”, ako siyang pahinumduman nga kaming duha nagtuo nga Siya balaan ug ang bugtong Anak sa Dios. Sa katapusan siya ug ako nakasinati og mainiton ug mahigalaon nga relasyon.

Mibalhin ang ilang pamilya nga wala magpamiyembro sa Simbahan. Apan kon sila makaingon, “Kami nakapuyo uban sa mga Mormon; sila mga maayo ug matinahuron nga mga tawo nga adunay sinsero nga kasingkasing,” mobati ko nga nagmalampuson mi nga nahimong mga maayong silingan ug sa pagtabang kanila nga mas bukas ug patas diha sa ilang pagtimbang-timbang sa mga Santos sa Ulahing mga Adlaw.