Bag-o nga Deacon

Nagbarug si Benji atubangan sa salamin, mitarung sa iyang kurbata. Ang iyang puti nga polo ug asul nga karsones eksakto gayud. Ang iyang buhok nasudlay na. Andam na gayud siya nga ordinahan nga usa ka deacon. Nganong gikulbaan man siya?

Gikuha ni Benji ang iyang mga kasulatan ug migawas sa kwarto. Naningkamot siyang dili maghunahuna kon unsa ka lahi karon didto sa simbahan. Ug dayon anaa ang bag-ong katungdanan sa priesthood nga nakapaguol kaniya kon siya maghunahuna mahitungod niini: ang pagpaambit sa sakrament. Unsay mahitabo kon masayop siya sa iyang unang higayon sunod semana? Gipaningkamutan niya nga malimtan usab kini sa iyang pagbiya sa balay.

Ang sakrament miting mao ra gihapon sama sa naandan. Apan pagkahuman, miadto si Benji uban sa iyang pamilya sa opisina ni Bishop Salazar. Kini mao ang nakalahi. Sa kasagaran siya atua unta karon sa pangbukas nga tulumanon sa Primary.

Naglingkod si Benji samtang si Papa, ang bishop, presidente sa Young Men, ug ang mga magtatambag sa bishopric mipandong sa ilang mga kamot sa iyang ulo. Gihatagan siya ni Papa sa Aaronic Priesthood. Atol sa panalangin, nawala ang gibati nga kakulba ni Benji. Mibati siya og kakalma ug kamalipayon.

Mibarug si Benji ug milamano sa tanan. Dayon iyang gigakos si Mama ug ang iyang igsoong lalaki, nga si Jay, ug ang iyang manghud nga babaye, si Mirasol.

Pagkahuman, misulod siya sa Sunday School. Bisan og ang bag-ong mga klase dili pareha sa Primary, sa gihapon pamilyar ra kini. Ang leksyon mahitungod sa pag-ampo. Kadaghan na siya kadungog sa mga leksyon sa pag-ampo didto sa Primary. Nahupay si Benji. Tingali dili kaayo lisud nga mahimong usa ka deacon.

“Nindot kini, gisultihan ni Jay si Benji human sa pagsimba. “Ako ang mopanalangin sa sakrament, ug ikaw ang mopaambit niini.”

Ang tanang kakulba mibalik. “Oo, nindot,” hilom siyang misulti. Ang pagpaambit sa sakrament maoy gikabalak-an pag-ayo ni Benji!

Dayon nianang pagkagabii nakita ni Benji si Papa nga nagbasa diha sa sofa. “Unsay mahitabo kon dunay malabyan nako ug dili makaambit sa sakrament? siya nangutana. “Unsay mahitabo kon mapandol ko? Iyang nakita nga klaro kaayo sa iyang hunahuna, ang tray nga nahulog sa salog ug ang kopa sa tubig nangalagpot.

Gipislit ni papa ang abaga ni Benji. “Nakahinumdom ko sa unang higayon nga mipaambit ko sa sakrament. Mas gikuyawan pa ko kay kanimo.”

Nakapamilok si Benji sa katingala. “Ikaw? Ikaw walay gikahadlokan bisan unsa!”

Mikatawa si papa.“Nahadlok ko makadaghang higayon. Gusto ka bang makahibalo unsay nakatabang nako nga mawala ang kakulba?”

Naghunahuna si Benji sa makadiyot. “Pag-ampo?”

Mipahiyom si papa. “Husto kana. Pag-ampo. Ug ang akong amahan mihatag nako og panalangin. Gusto ka bang hatagan nako og panalangin?”

Mitando dayon si Benji. “Oo! Gusto ko niana.”

Ang pamilya nagpundok sa sala. Gipandong ni papa ang iyang mga kamot sa ulo ni Benji. Samtang namulong si Papa, kahilakon si Benji. “Hinumdumi, miingon si Papa sa panalangin, “imong nadawat ang priesthood pinaagi sa sagrado nga ordinansa. Gihatagan kita sa Langitnong Amahan sa priesthood aron kita makaserbisyo sa uban. Kon mahimo nimo kini uban sa hingpit nga katuyoan sa kasingkasing, ikaw panalanginan niini ug sa tanang mga butang.”

Sa tibuok semana nag-ampo si Benji alang sa panabang. Pagkasunod Dominggo, miapil siya sa mga deacon sa atubangan sa chapel. Naminaw siya pag-ayo samtang si Jay misulti sa mga panalangin sa pan.

Sa kalit lang gibati siyag kabalaka pag-usab. Makahimo gayud kaha siya niini? Importante kaayo kini! Dayon nakahinumdom siya sa mga saad gikan sa panalangin ni Papa. Nawala ang gibati nga kabalaka samtang iyang gibati ang Espiritu.

Gikuha niya ang tray ug milakaw nga masaligon sa iyang na-assign nga laray. Mabinantayon, iyang gitunol ang tray ngadto sa usa ka babaye diha sa unang laray.

Mipahiyom siya kaniya. Mibawos og pahiyom si Benji, nasayud nga siya nagserbisyo sa Ginoo.