Mamahimong usa ka Malinawon nga Tawo

Ni Matthew D. Flitton

Mga Magasin sa Simbahan

Ang templo, misyon, ug pagserbisyo nakatabang ni Roger ug sa iyang pamilya nga mahimong mahangturong pamilya.

Si Roger Randrianarison nasayud nga adunay kulang sa kinabuhi sa iyang pamilya.

“Nag-ampo ko sa Dios sa pagtabang kanako nga makakita og usa ka butang nga mogiya sa akong pamilya,” siya miingon. “Ako adunay tinguha sa paggiya sa akong pamilya ngadto sa maayo, usa ka butang nga modala ngadto sa eksakto nga dalan.”

Siya nabalaka kon unsaon sa pagpadako sa iyang tulo ka anak—mga lalaki, sila si Randrianandry ug Sedinirina, ug ang babaye, si Nirina. Siya nagguol nga ang iyang mubo nga pasensya nahimong hagit sa pamilya. Gusto niya nga mahimong mas mabination nga ginikanan.

“Nakahukom ko nga ako ang kinahanglang mag-usab tungod kay akong nakita kon unsa ko,” siya miingon.

Nawala ang contruction business ni Roger mga pipila pa lang ka tuig ang milabay ug siya nagtrabaho isip drayber sa taxi sa Antananarivo, Madagascar. Usa ka adlaw misakay sa iyang taxi ang duha ka sister nga mga misyonaryo.

“Sa dihang nakasakay na sila, nangutana sila sa akong ngalan ug kon ako aduna bay pamilya,” siya miingon. “Sila nangutana kon kaila ba ko sa Dios ug kon mag-ampo ba ko Niya.”

Ang mga misyonaryo nanganta ni Roger samtang nagsakay ug midapit kaniya sa simbahan. Misulay siya sa pagsimba sa pipila ka higayon apan dili mohaum ang iskedyul tungod sa iyang trabaho, ug wala na siya makontak sa mga misyonaryo.

Mga lima ka bulan ang milabay may gitrabaho si Roger sa balay sa dihang nakadungog siya sa duha ka misyonaryo nga nakig-istorya sa usa ka tawo gawas sa iyang koral. Si Roger nasayud nga sila makig-istorya kaniya. Mibati siya nga kinahanglan niyang motubag og oo sa tanan nilang ipangutana kaniya.

Human sa pagpaila sa ilang mga kaugalingon, ang mga misyonaryo nangutana kaniya kon siya nakaila ba sa Dios. Oo. Gusto ba siyang mag-ampo sa Dios? Oo. Gusto ba niya nga makig-istorya sa mga misyonaryo? Oo. Kanus-a? Karon. Ang mga misyonaryo miingon nga mobalik sila sa 20 ka minutos. Sa dihang mibalik na sila, sila adunay kauban nga miyembro nga nagpuyo sa duol.

Ang mga misyonaryo mitudlo ni Roger kadaghan sa usa ka bulan diha sa iyang panimalay. Tungod sa ilang nadungog kabahin sa Simbahan, ang ubang sakop sa iyang pamilya dili gusto nga magtuon uban sa mga misyonaryo. Human sa usa ka bulan nga pagkat-on sa ebanghelyo, si Roger misimba uban sa mga misyonaryo. Ganahan kaayo siya sa matang sa pag-abi-abi nga iyang nasinati. “Ang mga miyembro midawat kanako nga mora og dugay nako nilang kaila,” siya miingon.

Si Roger miuli gikan sa simbahan ug misulti sa iyang pamilya nga magpabunyag siya sulod sa usa ka bulan ug sila gawasnon sa pagpili nga magpamiyembro sa Simbahan o dili. Sila mihangyo kaniya nga maghulat aron modungan niya. Sila misugod sa pagsimba ug malipayong nasurprisa usab.

Naganahan pag-ayo ang kinamagulangang anak ni Roger, si Randrianandry, sa iyang unang higayon sa pagsimba. “Sa unang higayon nga misimba ko nasurprisa ko og maayo tungod ang mga tawo mapainubsanon kaayo,” siya miingon. “Una, sila tarung nga magsinina alang sa pagsimba. Human niana nasayran nako nga ila kining gibuhat tungod kay adunay katuyoan, dili sa pagpaibug sa ubang mga tawo.”

Ang Randrianarison nabunyagan isip usa ka pamilya niadtong Pebrero 20, 2003. Nianang panahona si Nirina 8 anyos, si Sedinirina 17 anyos, ug si Randrianandry 19 anyos. Dili na magtrabaho ang pamilya ma-Dominggo ug giprayoridad ang pagsunod sa ebanghelyo.

Mga Kausaban

“Human ko mabunyagi, daghan kong nakita nga mga kausaban sa among panimalay,” miingon si Arelina, ang asawa ni Roger. “Kini nahimong usa ka espirituhanon nga panimalay, ug daghang mga panalangin, sa temporal ug espiritwal, miabut tungod sa pagsunod sa ebanghelyo.”

Gikan sa temporal nga panglantaw, giila ni Roger nga ang Langitnong Amahan nagtabang kaniya sa pagtukod og balik sa iyang negosyo. Human sa duha ka tuig nga pagdrayb og taxi ug pagbuhat sa bisan unsa aron lang sa pagsangkap sa iyang pamilya, siya misugod sa pagdawat og mga kontrata sa pag-construct. “Nagtuo ko nga ang Dios kanunay mopanalangin nako sa dihang mihukom ko nga mosunod Kaniya,” siya miingon.

Apan ang iyang mga anak nga lalaki nag-ingon nga ang labing dako nga kausaban makita sa gawi sa ilang amahan. Sila mihulagway kaniya karon isip usa ka ehemplo sa pagkamapainubsanon ug pagkamabination. Si Roger miingon nga nakombinser siya sa ebanghelyo sa pag-usab. Sukad nga nagtuon siya niini, gipaningkamutan ni Roger sa pagpuno sa iyang kinabuhi sa maayong mga butang.

“Tungod sa mga pagtulun-an sa ebanghelyo, mapailubon nako,” siya miingon. “Usahay masuko na unta ko, apan ang ebanghelyo anaa sa akong kasingkasing, akong hunahuna, ug sa akong espiritu. Kini nakatabang kanako nga magmapailubon.”

Kon may sitwasyon nga makapasuko, si Roger ang mohupay sa mga sakop sa pamilya ug magpahinumdom kanila sa pagbuhat kon unsay buhaton sa Manluluwas.

“Ang akong amahan nahimong mapainubsanon ug karon nag-amuma sa among pamilya uban sa gugma,” miingon si Sedinirina. “Sa dihang akong nakita ang iyang kausaban, ako mapasalamaton kaayo sa Langitnong Amahan, alang sa ebanghelyo, ug sa pagkamiyembro sa Simbahan.”

Usa ka Mahangturong Pamilya

Niadtong 2006, uban sa tabang sa General Temple Patron Assistance Fund, sila si Roger ug Arelina miadto sa Johannesburg, South Africa, aron mabugkos diha sa templo.

Gikan 2009 hangtud 2011, sila si Sedinirina ug Randrianandry nag-misyon sa South Africa—si Sedinirina sa Cape Town ug si Randrianandry sa Johannesburg. Lakip sa ilang tinguha nga moserbisyo mao ang pagtabang sa ubang mga pamilya nga mausab, sama sa ilang pamilya.

“Ang milagro nga sama niini mahitabo, ug kini nahitabo tungod kay ang mga misyonaryo miadto sa among balay,” miingon si Randrianandry. “Mao nga ako adunay tinguha sa pagbuhat sa samang butang alang sa usa ka pamilya bisan asa.”

Kana nga desisyon nagdala og laing panalangin sa pamilyang Randrianarison. Adunay siyam ka adlaw diin sila si Sedinirina ug Randrianandry maanaa sa Johannesburg Missionary Training Center. Si Roger nagplano nga mosakay sa eroplano padulong sa South Africa uban ni Arelina ug sa ilang anak nga babaye, si Nirina, aron ang tibuok pamilya mabugkos didto sa templo. Si Nirina, kinsa 14 anyos pa nianang higayona, miingon nga lisud ihulagway ang kasinatian ug ang iyang gibati.

“Kini nakapalig-on sa akong pagtuo ug nakatabang nako nga mobati nga mas duol sa Dios,” siya miingon.

Karon ang mga sakop sa pamilya nagtinabangay sa pagtukod ug paglig-on niadtong naglibut kanila. Si Roger nagserbisyo isip bishop sa ward. Si Arelina nagserbisyo diha sa Primary uban sa programa sa Hugot nga Pagtuo sa Dios. Si Sedinirina mao ang luyo-luyo nga klerk sa stake. Si Randrianandry mao ang luyo-luyo nga klerk sa ward. Si Nirina ang direktor sa musika sa ward.

Ang ebanghelyo mao ang tubag sa mga pag-ampo sa panimalay sa Randrianarison. Kini nag-ayo sa mga kasakit sa una, nagpahiusa kanila, ug naghatag kanila og oportunidad nga mag-uban hangtud sa kahangturan. Kini nagtudlo ni Roger sa paghigugma. “Ang kinabuhi uban sa pamilya,” siya miingon, “usa ka kinabuhi nga puno sa gugma.”

Ang pagpasakay sa mga misyonaryo sa taxi mao ang sinugdanan ni Roger Randrianarison diha sa dalan sa pagkadisipulo.

Mga litrato sa pamilyang Randrianarison pinaagi ni Matthew D. Flitton

Ang pagtuon sa ebanghelyo isip usa ka pamilya nakatabang sa pamilyang Randrianarison nga mas magkasuod.

Ang pagbiyahe ngadto sa South Africa aron mabugkos diha sa Johannesburg Temple nakapalig-on sa pamilyang Randrianarison.