2013
Kev pab tib neeg
August 2013

Cov Mus Saib Xyuas Tom Tsev tsab Xov, Yim Hli Ntuj 2013

Kev pab tib neeg

Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej. Kom tau ntaub ntawv xov xwm ntxiv, cia li txuas rau reliefsociety.lds.org.

Kev Ntseeg, Tsev Neeg, Kev Pab

Lub hom phiaj ntawm lub Koom Txoos txoj kev pab tib neeg yog kom pab cov mej zeej vam tau lawv tus kheej, saib xyuas cov pluag thiab cov txom nyem, thiab pab lwm tus. Kev pab tib neeg yog ib txoj hauj lwm tseem ceeb hauv lub Koom Haum Niam Tsev. Thawj Tswj Hwm Henry B. Eyring, tus Pab Cuam thib Ib hauv Thawj Pawg Thawj Tswj Hwm, qhia hais tias:

“[Tus Tswv] txij thaum chiv keeb ib txwm npaj ib txoj kev rau Nws cov thwj tim pab lwm tus neeg. Vajtswv tau caw Nws cov me nyuam kom muab lawv lub sij hawm, lawv tej ntiag tug, thiab lawv tus kheej tshwj tseg thiab nrog Nws koom pab lwm tus neeg. …

“Vajtswv caw thiab txib kom peb koom Nws tej hauj lwm pab cov neeg uas xav tau kev pab. Peb khi lus hais tias peb yuav ua li ntawd thaum peb ua kev cai raus dej thiab nyob hauv Vajtswv tej tuam tsev dawb huv. Peb rov qab cog lus li qub thaum tej hnub Caiv thaum peb noj lub cim nco txog.”1

Raws li tus npisov los yog ceg ntseeg tus thawj tswj hwm txoj kev coj, cov thawj coj hauv zej zog pab tib neeg ntawm sab ntsuj plig thiab sab cev nqaij daim tawv. Feem ntau tej cib fim pab pib ntawm cov mus saib xyuas tom tsev uas nrhiav kev tshoov siab kom paub pab txhua tus viv ncaus uas lawv mus xyuas.

Los ntawm cov Vaj Lug Kub

Lukas 10:25–37; Yakaunpaus 1:27; Mauxiyas 4:26; 18:8–11; Lus Qhuab Qhia thiab Kev Khi Lus 104:18

Los ntawm Peb zaj Keeb Kwm

Thaum lub Rau Hli Ntuj hnub tim 9, xyoo 1842, tus Yaj Saub Yauxej Xamiv txib cov viv ncaus hauv lub Koom Haum Niam Tsev kom lawv “pab cov pluag” thiab “cawm tib neeg tej ntsuj plig.”2 Lub Koom Haum Niam Tsev tseem muaj ob lub hom phiaj no thiab peb zaj ntsiab lus hais li ntawd hais tias, “Txoj kev siab hlub yeej tsis plam ib zaug li” (1 Kauleethaus 13:8).

Peb lub Koom Haum Niam Tsev tus tuam thawj tswj hwm thib tsib, Emmeline B. Wells thiab nws ob tug pab cuam pib siv zaj ntsiab lus no thaum xyoo 1913 kom peb nco txog tej ntsiab cai uas muaj thaum xub thawj: “Peb tshaj tawm hais tias peb lub hom phiaj yog kom … ua raws nraim li tus Yaj Saub Yauxej Xamiv tej lus qhia thaum nws tshwm sim qhia txoj hau kev uas pab cov poj niam muaj hwj chim los ntawm kev hu ntawm lub pov thawj hwj thiab ua pab ua pawg kom saib xyuas cov neeg mob, pab cov neeg txom nyem, nplij cov neeg laus lub siab, ceeb toom cov uas tsis xyuam xim, thiab tsom kwm cov me nyuam ntsuag.”3

Niaj hnub no, lub Koom Haum Niam Tsev pab tau tib neeg nyob thoob plaws lub ntiaj teb thaum cov viv ncaus muaj siab hlub, uas yog Khetos txoj kev hlub dawb paug, hlub lawv cov neeg zej zog (saib Maulaunais 7:46–47).

Lus Cim

  1. Henry B. Eyring, “Opportunities to Do Good,” Liahona thiab Ensign, Tsib Hlis Ntuj 2011, 22.

  2. Joseph Smith, hauv Daughters in My Kingdom: The History and Work of Relief Society (2011), 63.

  3. Daughters in My Kingdom, 63.

Kuv Yuav Pab Li Cas?

  1. Kuv ua dab tsi kom npaj saib xyuas kuv tus kheej thiab kuv tsev neeg sab ntsuj plig thiab sab cev nqaij daim tawv?

  2. Kuv yuav ua dab tsi kom ua raws li tus Cawm Seej tus yam ntxwv thaum kuv pab cov viv ncaus uas kuv saib xyuas?