E Iasadahr

Kadehdepen Iasadahn Sises Krais wia irehn koapwoaroapwoar oh poadidi kehlail. Oh e pil kak wia soahngen ireohte ong seri en Koht, sohte lipilipil. E wia soahngen irehote ong ie rahn me ahi nohno mehla nan Suhn 1969, oh e wiewiahte soahngo ong ie sang rahno lel met, oh e pahn wiewiahte soahngo lao I pahn pwurehng kilang ahi nohnou.

Peren mwadangete wiliandi ahi pahtoukihla aht katohrohrpeseng. Ahi peren wia mehkoht laudsang ahi koapwoaroapwoarki aht pahn tuhpene ehu rahn. Pwehki Kauno ketin kasalehdahr soahng tohto sang rehn Sapwellime soukohp akan oh pwehki Ngehn Sarawi kamehlelohngiehier mehlel en Iasadao, I kak kilang nan ahi madamadau dahme pahn wiawi ni atail pahn pwurpene rehn kempoakapatail kan me kamwakelekeldahsangehr dihp oh iasadahr:

Aramas pwukat me pahn iang iasadahn irail me pwungko. …

Aramas pwukat iei me ederail kan ntingdier nanleng, wasa me Koht oh Krais wia sounkadeik en aramas koaros.

Aramas pwukat me wia aramas pwung me unsekla sang rehn Sises me sountenek en inou kapwo, me ketkihda tomwpen dihp unsek wet sang ni eh kakerehdi pein nta (tehk D&C 76:65, 68–69).

Pwehki en Sises Krais ah powehdi mehla, sapwellimen Sahm Nanleng koaros me ipwidi pohn sampah pahn iasada ong paliwar ehu me sohte kak mehla. Eri, ahi oh amwail kadehdepen mehlel unseko kak kihsang pahtou ni ansou me emen tohn atail peneinei de kempoakapahtail kin mehla oh wiliankihdi peren mehlel oh pwoson.

Kauno ketkihongehr kitail koaros kisakis en iasada, oh pwehki met pali ngenitail pahn mihla nan paliwar kan me unsek douluhl (tehk Alma 11:42–44). Ahi nohnohu pahn pwurehng mesen pwulopwul oh pwukapwuk, lihpwen mah oh lokolok en sounpar tohto pahn sohrasang. E pahn wia kisakis ong ahi nohnohu oh pil ong kihtail.

Ahpw kitail kan me men mih rehn liho kokohlahte anahne wia pilipil mwahu pwehn warohng mih reh, oh mih wasa me Sahm oh Sapwellime Pwutahk Kempoake iasadahro kin ketiket ie. Wasao te me atail mour en peneinei kak wie momour kokohlahte. Kadehdepen padahk mehlelo kalaudehla ahi ineng ien warohng, oh sewese kempoakapahi kan ren pil warohng iang mih wasa me keieu ileile nan wehin celestial sang ni Tomwpen Dihp en Sises Krais ni eh kin wie doadoahk nan atail mour kan (tehk D&C 76:70).

Kauno kin ketin kaweid kitail nan atail kin rapahki mour soutuk sang ni mahsen en kapakap kan en kamadipw sarawi me kin seweseie oh kak sewesei kumwail. Kitail lukehng en kin kaweliakapw atail inou en pepdais nan ehuehu mihting en kamadipw sarawi.

Kitail inouki me kitail pahn tamataman Sounkomouro ansou koaros. Wiliepen Sapwellime meiroango kin sewese kitail en wewehkihla uwen laud en Sapwellime lokolok pwehn powehdi mehla, kihong kitail kalahngan, oh kihda mahkpen dihpatail koaros ma kitail pilada kitail en koluhla.

Kitail inouki me kitail en kapwaiada Sapwellime kosonned akan. Ni atail kin wadek pwuhk sarawi kan oh mahsen kan sang soukohp ieias akan oh pil rong tohn kapahrek kamaraindahr kan nan atail mihting en kamadipw sarawi kan kitail kin tamanda atail inou en kapwaiada kosonned akan. Ngehn Sarawi kin katamandohng nan atail madamadau oh nan mohngiongitail kosonned pwuko me keieu kesempwal ong kitail en kapwaiada rahno.

Nan kapakap kan en kamadipw sarawi, Koht ketin inouki en ketkihdo Ngehn Sarawi en mihmi rehtail (tehk Moroni 4:3; 5:2; D&C 20:77, 79). I diaradahr me nan ansouo Koht kak ketkihongie mehkoht me rasehng kapeidek. E kin katamanongie dahme I wia me E kupwurki, ahi kin anahne koluhla oh ale mahk, oh mwaren oh mesen aramas akan me E kupwurki me I pahn papah pwehki Ih.

Erein sounpar tohto, irairo kin wiawi oh e kawikila ahi koapwoaroapwoar ong pepehm en limpoak unsek oh kamehlelongie me I kak diar kalahngan sang ni Tomwpen Dihp en Sounkomouro oh Sapwellime Iasadao.

I kadehdeh me Sises iei Krais me iasadahr, atail Sounkomour, oh atail mehn kahlmengih unsek oh sounkaweid ong mour soutuk.