2013
Weliakapw ong Kauno
February 2013

Iren Mahsen en Padahk en Pas, Pepweri 2013

Weliakapw ong Kauno

Onopiki ni kapakap iren mahsen wet oh, ni eh pahn konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn elehieng Pwihn en Sawas en Lih en wiahla pali kesempwal en pein ahmw mour. Pwehn alehdi iren kapehse kapatapat, tehk reliefsociety.lds.org..

Kilel en Pwihn en Sawas en Lih

Pwoson, Peneinei, Sawas

Lih akan me kapw ong nan Mwomwohdiso—iangahki Peinakapw Akan me pahn apwtehn pidolong nan Pwihn en Sawas en Lih, lih akan me apwtehn pwurehng towe, oh towe kapw kan— anahne utuht oh ehupene sang sounpadahk kan en pas. “Dahme inenen kesempwal ong koledi towe kapw kan oh kapwurehdo towe “kan” me solahr kin iang sarawi iei sawas sang tohn Mwomwohdiso, ” mahsanih Elder M. Russell Ballard en Pwihn en Wahnpoaron Ehk-riemeno. “Koledi lamalam me Pwihn en Sawas en Lih … kak wiahla [ehu] pelien sawas me keieu kehlail me kitail ahniki nan Mwomwohdiso en ehuiong aramas.” Tehkada mwadang irail akan me aliale padahk oh tehk ren pwurodo, oh poakohng irail ni arail pahn pidolong oh pwurodo nan Mwomwohdiso sang doadoahk me amwail pwihn kan kin wia.1

Nin duwen tohn Pwihn en Sawas en Lih, kitail kak sewese towe kapw kan esehla tiahk poahsoan kan en Mwomwohdiso, me rasehng:

  • Kihda padahk.

  • Kihda kadehde.

  • Momouriki kosonned en kaisihsol.

  • Pwain meiroang en eisek kis ehu oh meiroang teikan.

  • Towehda doadoahk en poadoapoad en peneinei.

  • Wia doadoahk en wiliandi me melahr akan ni pepdais oh alehda kisakis en Ngehn Sarawi.

“Kompoakapahi mehlel me kin sewese towe kapw kan en nsenamwahu oh kasamwodo mwahu nan mwomwohdiso,” Elder Ballard mahsanih.2 Kitail koaros, aphw ni mehlel sounpadahk kan en pas, ahniki pwukoa kesempwal en ehuong towe kapw kan pwehn sewese irail en poadedi nan arail “weliakapw ong Kauno” (Alma 23:6).

Sang Pwuhk Sarawi Kan

2 Nephi 31:19–20; Moroni 6:4

Sang Atail Poadoapoad

“Pwehki towe kapw kan ahr wie tohtohla,” President Gordon B. Hinckley (1910–2008), “kitail uhdahn anahne kalaudehla atail nantihong sewese irail ni arail pahn diar wasa me re pahn weidie. Emenemen irail anahne soahng siluh: kompoakapah men, pwukoa ieu, oh epwel sang ni ‘mahsen kaselel en Koht’ (Moroni 6:4).”3

Sounpadahk kan en pas ahniki ahnsou mwahu en sewese irail me re kin apwahpwalih. Ehupene nanpwungen aramas me kin kohdo mahs, duwehte me wiawihong emen lih en Pwihn en Sawas en Lih me wia sounpadahk en pas ong emen lih me mahsang. Ira ekis pwand en wiahla kompoakapah lao ira sawaspene wia doadoak en kamwakel ehu. Ira ahpw wiahla kompoakapah, oh ni ara kin koasoaia Iren Mahsen en Padahk en Pas, ira koaros kin epwelikihda “mahsen kaselel en Koht.”

President Joseph Fielding Smith (1876–1972) mahsanih me Pwihn en Sawas en Lih “wia pali kesempwal en Wehin Koht pohn sampah oh … kin sewese towe loaloapwoat kan en alehdi mour soutuk nan wehin Samatailo.”4

© 2013 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/12. Kamanaman ong kawehwe: 6/12. Kawehwehpen Visiting Teaching Message, February 2013. Pohnpeian. 10662 885

Iren sawas akan

  1. M. Russell Ballard, “Members Are the Key,” Liahona, Septempe 2000, 18.

  2. M. Russell Ballard, Liahona, Septempe 2000, 17.

  3. Gordon B. Hinckley, “Every Convert Is Precious,” Liahona, Pepweri 1999, 9.

  4. Joseph Fielding Smith, nan Daughters in My Kingdom: The History and Work of Relief Society (2011), 97.

Dahme I Kak Wia?

  1. I kin kapakapki iengeio oh peki Ngehn Sarawi en kaweid kiht ni aht kin kalohkong riat lih akan?

  2. Ni wiepe dah me kitail kin papah emenemen riatail lih me kitail kin apwahpwalih pwe en kak ese me kitail nsenohki mehlel?