Rongorongodo Kemwekid Kapehm Kan

Ehu nihpwongo emen serepein me I pahn rianiki tangasang nihmweo, eri I mwadangala pwe I en rapahki. Ni ahi tangatang kohla, I kapakapki Ngehno en sewese ie. I ese me Koht pahn ketin sapeng oh kaweid ie, oh I song en rongorongodo kemwekid kapehm kan en Ngehno. Ahpw ni ahi sohte kak rong mehkot, I tepida tihwohla oh pehm me Ngehno sohte kihkihong ie kemwekid kapehm kan.

Mendahte ahi men kohla ekis wasa dohsang pwe en rapahki, I pehm me I konehng mihmihte wasa me karanih imweo. Eri I koasoanehdi en pwurehngete tang kapil wasao. Ni ahi uhdi nan ahlo wasa me e wetpeseng, I kilangada mwomwen peinakapw men alialu. I diarada serepein me I pahn rianikio!

Ni ahi pidohisang nan sidohsao oh tangalahng ih, I kasawiada me Ngehno wie kaukaweid ie nihpwongo pwon ni eh kin sewese ie pehm me I anahne mihmihte nan wasao. Pwehki ahi wie rongorongodo ngihl tikitik, I kerenieng pohnsehsehla kemwekid kapehm kan en Ngehno. I eri wehwehkihla me pak tohto kitail sohte pahn rong ngihl ieu, ahpw kitail pahn pehm kapehm kan nan mohngiongitail.

I uhdahn kapingki kaweid en Ngehno. Uhdahn E kin ket rehtail! Pwuhk sarawihkan mahsanih me Ngehn Sarawi pahn wia atail sounkaweid ansou koaros (tehk D&C 121:46).

Ma kitail warohng en alehdi kaweid sang Ngehno oh kitail idawehn, kitail kak wia mehn doadoahk nin limen Koht pwehn wia me mwahu ong dir en aramas. Ni Ngehno eh pahn ketiket rehtail, kitail pahn ese ahl me kitail konehng idawehn.