Iren Mahsen en Presidensi Keieu, Suhn 2012
Malipilipda Sang Koht oh Alehdi Utuht Sang Rehn Aramas Akan
Ni atail wia tohn Mwomwohdiso, kitail kin kalapw lukohng en utung aramas kan nan arail pwukoa malipilip kan en papah. Pahr kei samwalahro, serihn sukuhl men me sounpar 18 kasalehiong ie ia wehwehn ei pahn utung sapwellimen Koht sounpapah kan. Leledo met I paikihda ah karasaras karakarahko.
E apwtehn tapiada ah keieun pahr en sukuhl nan college. Sohte lel sounpar ehu mwuri, e pepdaisla mwohn eh kohkohsang ah wasahn kousoan pwe en tapiada ah sukuhl ni university laud ehu. Wasahu I papah nin duwen ahi wia ah pisop.
Ni pahr en sukuhlo eh tepida, I kapeidekih ni mwotomwot nan ohpis en pisop. I sohte nohn taman dahme se tepin koasoaia likin eh ndinda me mie kahpwal e diar sang ni eh mihmi wasa kapw, ahpw I sohte pahn kak manokehla keriau en aht koasoaipene.
E peki ma e kak tuhweng ie nan ahi ohpiso. I pwuriamweikihla ah nda, “Kita kak kapakappene, oh ngehi me pahn kapakap?” I ahpwtehn pahn nda me I kapakapehr oh I kasik me e pil kapakapehr. Ahpw I pwungkihda sen patpene kapakap.
E tapiada ah kapakapo ni eh kadehde me E ese me Koht me malipe pisopo. Eh peki rehn Koht en mahsanihong ie dahme E konehng wia me pid mehkot kesemwpwal ong pali ngehn. Mwahnakapwo patohwenohng Koht me E koapwoaroapwoarki me pisopo wehwehkihier ah anahn akan oh me E pahn alehdi kaweid me E anahne rong.
Ni ah wie kosokoasoai, kahpwal kan me e pahn lelohg ahpw pwarada nan ahi madamadau. Kaweido me mengei ahpw e kohda ni sansal mehlel: kapakap ansou koaros, peikiong kosonned akan, oh ahniki soupeikasal.
Mwahnakapwo, me pahr ehute nan Mwomwohdiso, padahk sang ni karasaras dahme Koht kak ketkihiong emen kaun ni eh kin ale utuht sang ni pwoson oh kapakap en irail akan me E malipilipiongehr en kaweid. Mwahnakapwo kasalehiong ie manaman en utuhtpene nan Mwomwohdiso (tehk D&C 26:2). Mendahte ma Koht me kin ketin malipe Sapwellime sounpapah kan sang ni kaudiahl, arail doadoahk pahn pweida ihte mwurin arail pahn alehdi utuht en irail akan me re malipilipda en papah.
Sang ni atail kin usuhs en utuht, kitail kin wiahda inou mehlel kei. Kitail kin inouki me kitail pahn kapakapki sapwellimen Kauno sounpapah kan oh me E pahn ketin kahlua oh kakehlailih irail (tehk D&C 93:51). Kitail kin inouki me kitail pahn rapahki oh kasik kitail en ale kamarain sang rehn Koht sang ni arail kaweid oh ni ansou me irail kin mwekidki arail pwukoa kan (tehk D&C 1:38).
Kitail anahne kalapw weliakapw inouo nan mohngiongitail kan. Omwi sounpadahk en Santi Sukuhl pahn song en padahk sang ni Ngehn Sarawi, ahpw duwehte me komw pahn kakete wia, omwi sounpadahko kakete sapwungala mwohn pwihn en sukuhlo. Ahpw komwihte me kak pilada en rong oh kilang ansou kan me komw kak kehn kamarain ni eh lel rehmwi. Kedekedeo komw pahn sohla nohn tehk sapwung kan ahpw pahn uhd tehk diren kadehdepen me Koht ketin utuhtuhng sounpadahko.
Ni atail kin kauwada pehtailkan pwehn utungada aramas emen, kitail kin inouki en sewese sohte lipilipil pwukoa en Kauno me aramaso malipilipdahr en kapwaiada. Ni ansou me nait serihko tikitik, ahi pwoudo alehdi pwukoa en padahkih seri tikitik nan aht ward-o. Ih sohte kawadahte pehie I en utung ih, ahpw I pil kapakapki ih oh peki mweimwei en sewese ih. Padahk kan me I alehdi me pid kalahnganiki dahme lih kin wia oh duwen sapwellimen Kauno limpoak ong serihkan kin wie kapkapaiadahte ahi peneinei oh ahi mour.
Me keren I koasoaieng mwahnakapw me utung ah pisopo sounpar kei mwowe. I esehda me Kauno oh sapwellime aramas akan utungadahr ih nan ah pwukoa nin duwen misineri, nin duwen president en stake, oh nin duwen pahpa men. E nda ni aht koasoaio eh imwsekla, “I kin wie kapakapkinuhkete rahn koaros.”
Kitail kak koasoanehdi kitail en kapakapki rahn koaros aramas emen me Koht ketin malipe en papah kitail. Kitail kak kalahngankihong aramas emen me kapaikitailda pwehki ah sawas en papah. Kitail kak pilada kitail en sokala mwowe ni ansou me aramas emen me kitail utung eh kin peki sawas en tohnmetei.1
Irail akan me kin utungada sapwellimen Kauno sounpapah kan nan Sapwellime wehio pahn utuhtkihda Sapwellime manaman me sohte karasepe. Kitail koaros anahne kapai wo.
© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen First Presidency Message, June 2012. Pohnpeian. 10366 885
Padapadahk sang Iren Mahsen Wet
Mwurin omw pahn ehukihda iren mahsen wet, medewe wadek lepin mahsen wet: “Kauno pahn ketin wiahda pwe komwi en wia dipwisoun doadoahk Ninlimehkan ma komw pahn karakarahk, pwoson, oh pwerisek. … Komw pahn alehdi kehlail kapatapat ni ansou me komw pahn alehdi utuht sang rehn towe kan en mwomwohdiso oh kasarawi ong pwukoa malipilip” (Teaching, No Greater Call [1999], 20). Kihpene tohn peneineio en kapilpene mehkot toutou oh peki rehn emen irail en song pwokada. Ni omw pahn wad emen kapatahieng emen aramas, luke towe teikan en peneineio en iang sawas pwokada mehkoto. Koasoaia dahme kin wiawi ni ansou me koaros kin sawas. Medewe en kasalehda kesempwalpen ahn President Eyring kaweid me pid wiepe kan me kitail kak en utung mehteikan nan arail pwukoa malipilip kan.