Mesaj Premye Prezidans lan, Avril 2012
”Li resisite”
Temwayaj yon Pwofèt
Prezidan Thomas S. Monson te deklare “Apèl kleron Kretyente a sèke Jezi, nonm Nazarèt la, te leve soti pami mò yo. “Reyalite rezirèksyon an pote pou chak moun ak tout moun lapè ki depase konpreyansyon” gade Filipyen 4:7).1
Nan ekstrè nou pral wè la a yo, Prezidan Monson pataje temwayaj li ak gratitid li pou Rezirèksyon Sovè a epi li deklare ke, poutèt Pitit Gason an te ranpòte laviktwa sou lanmò, tout pitit Papa a ki vini sou tè a ap viv ankò.
Lavi Apre Mòtalite
“Mwen kwè ke okenn nan nou menm pa ka konsevwa tout pòte sa Kris la te fè pou nou nan Jetsemane a, men mwen rekonesan chak jou nan lavi mwen pou sakrifis ekspyatwa Li te fè pou nou an.
“Nan dènye moman an, Li te ka fè bak. Men Li pa t fè sa. Li te pase anba tout bagay pou L te kapab sove tout bagay. Lè L te fè sa, Li te ba nou lavi ki ale pi lwen pase egzistans mòtèl la. Li te rachte nou anba Chit Adan an.
“Nan fon kè mwen, mwen rekonesan anvè Li. Li te anseye nou kijan pou nou viv. Li te anseye nou kijan pou nou mouri. Li te asire sali nou.”2
Chase Tenèb Lanmò
“Nan kèk sitiyasyon, tankou nan gwo soufrans ak maladi, lanmò vini kòm yon anj mizèrikòd. Men, anjeneral, nou wè li kòm enmi bonè lòm.
“Limyè verite revele a kapab efase tenèb lanmò pou tout tan. Mèt la te di: ‘Mwen se rezirèksyon an, ak lavi a. Moun ki kwè nan mwen ap gen pou l viv menm si l te mouri. Epi kèlkelanswa moun ki ap viv epi ki kwè nan mwen, li pap janm mouri.’
“Asirans sa a—wi, konfimasyon sakre sa a—konsènan lavi apre tonbo a ta kapab byen pote lapè Sovè a te pwomèt la lè Li te di disip Li yo: ‘M ap ba nou kè poze. M ap fè kè nou poze nan jan pa mwen. Mwen pap fè li jan sa fèt dapre prensip ki nan mond lan. Pa kite anyen toumante tèt nou, nou pa bezwen pè.’”3
Li pa isit la“
Sovè nou an te viv ankò. Evenman pi gloriye, pi rekonfòtan, ak pi rasiran nan tout istwa limanite a te rive—viktwa sou lanmò. Doulè ak agoni Jetsemani an ak Kalvè a te efase. Sali limanite te asire. Chit Adan an te rachte.
“Tonbo vid la jou maten Pak sa a, se te repons kesyon Jòb la: ‘Si yon moun mouri, èske l ap viv ankò?’ Pou tout moun ki ap tande vwa m la a, m ap deklare: Si yon moun mouri, l ap reviv ankò. Nou konnen sa paske nou gen limyè verite revele a. …
“Frè ak sè byeneme m yo, nan moman pi gwo chagren nou, nou kapab resevwa lapè pwofon ki soti nan pawòl zanj lan nan premye maten Pak sa a: ‘Li pa isit la; li resisite’”4
Tout Moun Ap Viv Ankò
“Nou ri, nou kriye, nou travay, nou jwe, nou renmen, nou viv. Epi apresa, nou mouri. …
“Epi nou t ap rete tou mouri si se pa t Mesye sa a, ki se Jezi Nazarèt la, ak misyon L Lan. …
“Avèk tout kè mwen ak tout fèvè nanm mwen, mwen leve vwa m pou m temwaye, antanke yon temwen espesyal e mwen deklare ke Bondye vivan, Jezi se Pitit Gason Li, Sèl Pitit Gason Literal Papa a nan lachè. Li se Redanmtè nou; Li se Medyatè nou bò kot Papa a. Li te mouri sou kwa a pou ekspye peche nou yo. Li te vin tounen premye moun ki te resisite. Poutèt Li te mouri, nou tout ap viv ankò.”5
Yon Temwayaj Pèsonèl
“Mwen rann temwayaj pèsonèl mwen ke lanmò te simonte, viktwa sou tonbo a te reyalize. Se pou pawòl sa yo, ke Li rann sakre a, Li menm ki te akonpli yo a, vin tounen yon konesans reyèl pou tout moun. Sonje yo. Cheri yo. Onore yo. Li resisite.”6
© 2012 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/11. Apwobasyon tradiksyon: 6/11. Tradiksyon First Presidency Message, April 2012. Haitian Creole. 10364 036
Ansèyman Ki Soti nan Mesaj Sa a
Apre ou fin pataje sitasyon ki nan mesaj Prezidan Monson nan, note temwayaj li rann sou vrè siyifikasyon Pak la. Ou ta gen dwa poze manm fanmi w ap vizite a kesyon sa yo: “Kisa sa vle di pou ou ke yon pwofèt vivan temwaye sou verite sa yo jodi a? Kijan ou ka aplike yo nan lavi w?” Panse pou ajoute temwayaj pa w.