Iren Mahsen en Presidensi Keieu SEPTEMPE 2011
Tiepene Lap—Kaidehn Kapai Mwahl Ehu
Emen towe kaselel en Mwomwohdiso wie koaskoasoaieng emen aramas me sohte wia kisehn atail pelien lamalam. Ansou me ira uhd koasoaiahda tiepene lap, aramaso peidek, “Ke nda me kumwail ahniki soukohp akan oh wahnpoaron akan? Oh pak riau nan ehu pahr nan tiepene me kin wiawi nan sampah pwon irail kin kasalehda kupwuren Koht?”
“Ei maing,” toweo sapengki ni soupeikasal.
Aramaso medemedewe met ansou kis. E mwomwen mehlelki ah men ese duwen met oh peidek, “Dah me irail nda nan tiepene lap ahpwtehn imwisekilao?”
Ni ansou kiset towe mwahu meno en Mwomwohdiso uhd kohsang pereniki ehukihda rongamwahuo oh uhd ekis namenekda. E nantihieng uwen eh kak ahpw sohte douluhl kak tamanda oaritik en ehute padahk.
Kompoakapaho mwur pwunodiki irair wet oh nda, “Ke men ndahiengie me Koht ketin mahmahsen ong aramas nan atail mwehi oh ke sohte kak taman dah me E mahsanih?”
Ohlo pehmada sarohki ahn ohlo koasoaio. E koasoanehdi me e pahn nantihieng tamataman mahsen kan me kohda sang Sapwellimen Kauno sounpapah kan nan tiepene lap.
Kitail koaros ese uwen apwal en tamataman padahk koaros sang tiepene lap, oh I koapwoaroapwoariki me kitail sohte anahne namenek ma kitail sohte taman soahng koaros. Ahpw, mie padahk kan nan ehuehu tiepene lap me kin kohda duwen kisakis oh kapai sang nanleng me pahn pahrek ong atail mour.
Pwehn kaunop ong tiepene lap, mweidehngie en kasalehda madamadau siluh me mwein kak seweseikitail en ahpwete alehdi, tamataman, oh doadoahngki mahsen kan me kin kohda sang rehn sapwellimen Kauno sounpapah kan.
1. Towe kan en Mwomwohdiso ahniki pwuhng en alehdi kaudiahl ong pein irail ni arail pahn rong oh onopiki mahsen kamarain kan me kin kohda nan tiepene lap.
Ni omw pahn kaunop ong tiepene lap, I lukeiuk en medewe peidek kan me ke anahne diar pasapengpe. Ni karasaras, ke mwein inangih kaweid sang Kauno me pid kasongosong kan me kumwail sohpai nan mour.
Pasapeng kan ong ahmw kapakap inen kan mwein pahn kohda sang ehu padahk de sang ehu lepin mahsen. Ni ansou teikan pasapeng kan mwein pahn kohdo sang nan lepin lokaia, mahsen, de koul me mwomwen sohte doke ahmw peideko. Mohngiong me direki kalahngan pwehki kapai kan en mour oh ineng mehlel en rong oh idawehn mahsen en kaweid pahn kaunopada ahl ong kaudiahl ong pein emenemen.
2. Dehr soikala padahk ehu pwehki ke lemeleme me ke rongehr.
Soukohp akan kin ansou koaros padahk sang ni kapkapwurehieng; e wia kosonned ehu ong kasukuhl. Kumwail pahn rong oaralap oh tepin padahk kan me wie kopwurpwurieng nan tiepene lap. I men kadehdehieng kumwail: met kaidehn pwehki soakoahiek en madamadau. Kitail kin rongorongete padahk kan me pid irair kan me duwepenehte pwehki Kauno ketin padapadahk oh kamkamarainihki atail madamadau kan oh mohngiong kan tepin padahk poahsoan kan me kesempwal poatoapoat me uhdahn anahne kitail en wehwehki oh mwekidki mwohn atail pahn kak doulahng soahng teikan. Aramas me kin kawada ihmw ni eripit kin kihdi mahs poahsoan en ihmwo mwohn eh kin didih oh kihieng pwelenge.
3. Mahsen kan me kin kohda ni tiepene lap konehng en wia mehn kaweid de compass me kin idilahng ahl kitail en idawehn nan sounpwoung kan me kohkohdo.
Ma kitail rong oh idawehn kemwekid kapehm kan en Ngehno, re pahn kaweid kitail ni duwen Liahona, kaweid kitail nan wasa me kitail sehse, nan wahu oh nahna kasongosong kan me kohkohdo (tehk 1 Nephi 16).
Sangete tepin sampah, Koht ketin kakeirada soukohp akan me kin mahsanih duwen kupwur en lahng ong aramas akan en arail mwehi. E wia atail pwukoa en rong oh doadoahngki padahk kan me Kauno ketkihda ong kitail.
Samatail Nanleng kalahngan oh limpoak saikinte likidmeliehla oh sohte pahn likidmeliehla Sapwellime serihkan. Rahnwet, duwehte ansou kan mahs, E ketin idiada wahnpoaron akan oh soukohp akan. E ketin doulahte kaskasalehieng irail Sapwellime mahsen.
Kapai kalahngan kaselel ehu met en rong mahsen en Koht ong emenemen kitail ni ansoun tiepene lap! Kitail kaunop mwahu ong kapai laud wet en kaweid sarawi me kin kohda sang Sapwellime sounpapah pilipilda kan.
Pwe kaidehn kapai mwahl ehu met.
© 2011 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/10. Kamanaman ong kawehwe: 6/10. Kawehwehpen First Presidency Message, September 2011. Pohnpeian. 09769 885
Padapadahk sang Nan Iren Mahsen Wet
-
Wadekpene padahk wet. Kangoange peneinei en pilada soahng kan me re pahn rong mwahu nan tiepene lap.
-
Pwehn sewese seri pwulopwul kan doadoahngki kaweid sang President Uchtdorf, kasalehieng irail kilel en Kaun Lapalap kan (me mie nan makasihn Liahona). Padahkihieng irail me Presidensi Keieu oh Pwihn en Wahnpoaron Ehk Riemeno pahn padahk nan tiepene lap. Kangoange serihkan en rong tiepene lap oh mahlenihda kilel pwehn sewese irail tamataman dah me re esehla. Pahpa nohno kan kak tehk conferencegames.lds.org pwehn kilangada pil ekei kemwekid kapatapat ong tiepene lap ong serihkan.
Pali maun: kilel sang Les Nilsson