Tehnpas Sarawi

Mie kahrepe tohto me emen konehng en inangihki kohla ni tehnpas sarawi. Likin tehnpas sarawi kan mwonok mwomwen kasalehda kahrepe loal kan me pid pali ngehn. Soahng tohto me pil ahpwete sansal nan tehnpaso. Me nting pohnangin wenihmw en tehnpas sarawi iei kaping “Sarawi ong Kauno.” Ni omw pahn patohlong nan sohte lipilipil tehnpas sarawi me kasarawihier, komw mih nan tehnpas en Kauno.

Nan tehnpas sarawi kan, towe kan en Mwomwohdiso me kin pilada irail en warohng kin kak iang towehda tiahk sarawi kan en komour me keieu sarawi me sansalohngehr aramas. Nan tehnpas sarawi, nan ehu tiahk sarawi, aramas emen kak en wideudda oh kasarawiala oh alehdi kasukuhl oh alehdi endaumen oh alehdi tiahk sarawi en katengteng. Oh ni atail pahn alehdier kapai pwukat ong pein kitail, kitail kak uhd wia weliepen mehteikan me melahr ni arail sohte ahniki ansou mwahu en alehdi ansou mwahu wet. Nan tehnpas sarawi kan tiahk sarawi kan kin wiawi ong me momour oh me melahr.

Wadawad keneinei en pwuhk sarawi kan pahn kasalehda me Kauno sohte mahsanihda soahng koaros ong aramas koaros. Miehte me anahne wiawi mwohn emen eh pahn kak alehdi iren kapehse sarawi kan. Kemwekid sarawi kan en nan tehnpas sarawi kan iang mih nan irair wet.

Kitail sohte kin koasoaia tiahk sarawi kan en tehnpas sarawi likin tehnpas sarawi kan. E sohte koasoandi me wehwehpen kemwekid sarawi pwukat pahn irairdi pwe ekeite aramas en nantiong pwe aramas teikan en sohte kak iang esehla. Ni mehlelo, kaidehn ih duwehnen met. Se kin uhdahn nantiong en kangoange aramas koaros en warohng oh kaunopohng kohla nan tehnpas sarawi. Irail akan me iangehr kohla ni tehnpas sarawi kin alehdi kasukuhl wet: Ehu rahn koaros ngehn me momour oh koaros ngehn me iangehr mour pohn sampah wet pahn ahniki ansou mwahu en rong rongamwahuo oh alehda de soikala kapai kan me kin kohda sang nan tehnpas sarawi. Ma aramas emen pahn katiasang ansou mwahu wet, pein aramaso me pahn soikala.

Tiahk sarawi kan oh kemwekid sarawi kan en tehnpas sarawio me mengei. Re me lingan. Re me sarawi. Re kin wie kolokol ni rir pwe aramas me sohte onop en alehdi en dehr sapwungala alehdi. Inangihte kilang mehkot sohte wia kaunop mwahu. Uhdahn inangih laud pil sohte wia kaunop mwahu. Kaunop ong tiahk sarawi pwukat kin iangahki dake keieu pwukat: pwoson, koluhla, pepdais, kasarawi en wiahla towe, warohng, koahiek oh soar me konehng aramas emen me kin lukodo nan tehnpas en Kauno.

Koaros me kin warohng oh pweida ni wiepe koaros kak pidolong nan tehnpas sarawio, wasa me irail pahn alehdi kapehsehpen tiahk oh kemwekid sarawi kan.

Ni omw pahn esehla ekis duwen kesempwalpen kapai kan en tehnpas sarawi oh manaman kesempwal en tiahk sarawi pwukat me kin wiawi nan tehnpas sarawi, ke sohte pahn peikasaliki koasoandi ileile kan me koasoandi sang Kauno me pid pidolong nan tehnpas sarawi.

Ke anahne kolokol kisin likoun mweimwei ong nan tehnpas sarawi pwehn pidolong. Kisin likoun mweimweio konehng en sain sang kaun kan en Mwomwohdiso me koasoandi en sain. Irailte kelehpw me warohng me konehng kohla nan tehnpas sarawi. Omw pisop de president en prans me ahniki pwukoa en kapeidek duwen pein ahmw warohng mwohn omw pahn alehdi tiahk sarawi kan en nan tehnpas sarawi. Ansoun kapeidek wet me inenen kesempwal, pwe e wia ansou mwahu en tehk mwahu rehn emen sounpapah Kauno duwen omw mour. Ma mie mehkot me sapwung nan omw mour, pisopo pahn seweseiuk en koasoanehdi. Sang ni wiepe wet, komw kak pakairki oh kak alehdi sawas pwehn warohng en patohlong nan tehnpas sarawi sang ni mweimwei en Kauno.

Kapeidek ong kisin likoun mweimwei ong nan tehnpas sarawi kin wiawi nanpwungen pisop men oh tohn Mwomwohdiso me peki en mweimweida. Ansou wet toweo kin kapeidek duwen ah mwekid, ma e warohng, oh duwen ah loaloapwoat ong Mwomwohdiso oh irail akan me kin apwalih. Aramaso anahne kadehde me e ahniki mour mwakelekel oh kin kapwaiada Mahsen en Eripit, pwain meiroang en eisek kis ehu ni unsek, kin momouriki padahk kan en Mwomwohdiso, oh sohte kin patehng de iang towehda pwihn kan me pwupwisangehr Mwomwohdiso wet. Pisop alehdier kaweid me en kolokol ni rir epwelpen kapeidek oh audepe koaros me kin wiawi rehn emenemen towe me inenen kesempwal.

Pasapeng kan me konehng ong kapeidek kan en pisop pahn elehieng pisop en kak kasawiada ma aramaso konehng en alehdi kisin likoun mweimwei ong tehnpas sarawi. Ma me kihda pekipeko sohte kin kolokol kosonned akan de ma mie mehkot soansuwed nan ah mour me anahne mahs koasoansoandi, e pahn mie anahnepen kasansalepen koluhla mehlel mwohn kisin likoun mweimwei ong nan tehnpas sarawi eh kak mweimweida.

Mwurin pisop eh kin wiahier soangen kapeidek wet, president en stake pahn pil wia kapeidek mwohn omw pahn kak alehdi tiahk sarawi kan en nan tehnpas sarawi.

Mwohn omw pahn tepin patohla ni tehnpas sarawi, de pil ansou tohto mwuri, e mwein pahn sawas ma komw wehwehki me padahk kan en nan tehnpas sarawi kin wiawi sang ni karasaras kan. Kauno, Sounpadahk Lapalapo, kihda pali laud en Sapwellime padahk ni wiepe wet.

Tehnpas sarawi wia ehu sukuhl kaselel. E wia tehnpas en kaiahn. Nan tehnpas sarawi kan katairong sohte kin mweimwei pwehn kak elehieng padahk kan me pid pali ngehn en kak pweida mwahu. Elder John A. Widtsoe en Pwihn en Wahnpoaron Ehk-riemeno, me melahr, wia emen sounpadahk nan wasahn sukuhl laud de university oh wia emen me saman oh ndand nan sampah pwon. Ohlo wauniki mehlel doadoahk en nan tehnpas sarawi oh mahsanih ehu ansouo:

“Tiahk sarawi kan en nan tehnpaso pid pilahn en komouro ni unsek, ni duwen me padahk nan ansou kan kohkohdo sang kaun kan en Mwomwohdiso, oh kin kamarainihada soahng kan me apwal en wehwe. Sohte me kin kapirekihla de wekidala padahk kan en nan tehnpas sarawi pwehn kak pahrek ong pilahn lap en komour. Unsekpen madamadau en endaumen wia ehu irair keieu kehlail me kin kamehlel duwen tiahk sarawi kan en nan tehnpas sarawi. Me patehng met, unsek en padahk oh kawehwehpen pilahn en Rongamwahuo, kin wiahda kaudok nan tehnpas sarawi eh wia ehu wiepe keieu mwahu ong kakehlailih madamadau me pid Rongamwahuo pwon” (“Temple Worship,” Utah Genealogical and Historical Magazine, Epreil 1921, 58).

Ma komw pahn patohla ni tehnpas sarawi oh taman me padahk koaros kin wiawi sang ni karasaras, sohte pak ehu komw pahn kohla ni omw pahn ahniki madamadau pwung me ahmw madamadau sohte pahn kalaudla, ahmw pepehm ekis ileilehla, oh ahmw wehwe laudla ong soahng kan me pid pali ngehn. Koasoandi en padahk me inenen mwahu. E me kamarain. Pein Kauno, Sounpadahk Lapo, ketin padahkih Sapwellime tohnpadahk kan ansou koaros ni karasaras—wiepe ni lokaia en kihda karasaras en soahng kan me mwein pahn kakete apwal en wehwehki ma sohte karasepe mie.

Pein tehnpas sarawi pil wia karasaras. Ma komw patohwanehr ehu tehnpas sarawi pwukat nihpwong, ni ansou me dengki koaros okohk, komw pahn wehwehki soangen lingan kaselel en met. Tehnpas en Kauno, ni dengki koaros ahr okohk, keskesihnen nan rot, wia karasaras en manaman oh kamarain en rongamwahu en Sises Krais me ketiket duwehte dengki nan sampah me wie susuhrla nan rotorot en pali ngehn.

Ni omw pahn patohlong nan tehnpas sarawio, komw pahn weliankihdi ahmw likou me komw likawih kohdo kan likou pwetepwet en nan tehnpas sarawio. Weliali en likou wet kin wiawi nan wasahn weliali likou, wasa me emenemen aramas kin ahniki wasahn nekidala arail kepwe oh wasahn weliali me rir douluhl. Nan tehnpas sarawi koaros kin likou mwahu me sohte kasansal. Ni omw pahn kihdi ahmw likoun sampah nan wasahn nekidala kepwe, komw pil kin kihdi ahmw pwunod oh nsensuwed kan oh kedirepw kan. Komw kin pidohisang nan wasahn welian likou wet ni omw likou pwetepwet tohr, oh komw kin pehm me komw patehng mehteikan oh koaros duwepenehte, pwe koaros kin likou duwepenehte.

Kumwail akan me kaskasik en kopwopwoud nan tehnpas sarawi mwein pahn men ese dah me pahn wiawi. Kitail sohte kin kak kihda lepin mahsen kan en tiahk sarawi en katengteng (kopwopwoud) likin tehnpas sarawi, ahpw kitail kak koasoaia me wasahn katengtengo me inenen kaselel, meleilei oh popohl laud mie pwehki ngehno, oh wia wasa sarawi pwehki doadoahk sarawi me kin wiawi wasao.

Mwohn pwopwoud kan ahr kin kohla ni pei sarawi pwehn alehdi tiahk sarawi en katengteng, e wia pwukoa oh ansou mwahu ong me pahn kasarawi ira en kihda, oh pwopwoud pwulopwulo en alehdi, ekis kaweid. Iet ekei madamadau me pwopwoud pwulopwul ehu kak rongada ni soangen ansou duwehte met.

“Rahnwet iei amwa rahn en kopwopwoud. Kumwa pahn mihla nan peren en amwa kopwopwoud. Tehnpas sarawi kan kokouda pwehn wia wasa sarawi ong tiahk sarawi kan duwehte met. Kitail sohte mih nan sampah. Soahng kan me pid sampah sohte ahniki manaman wasaht oh sohte pahn mie lipwe ong me kitail pahn wia wasaht. Kitail pidohisangehr nan sampah pwehn patohdo nan tehnpas en Kauno. Rahnwet pahn wia rahn me keieu kesempwal nan amwail mour kan.

“Komw ipwidi, lukodohng sampah, sang pahpa nohno kan me kaunopada paliwar en sampah pwe pali ngenomw en kousoan loale. Emenemen kumwa pepdaisehr. Pepdais, tiahk sarawi ehu, wia karasaras en kamwakel, karasaras en mehla oh kaiasada, karasaras en mour kapw. E kin katamando koluhla oh lapwepen dihp akan. Kamadipw sarawi en Kamadipw en Kauno wia weliakapw en inoun pepdais, oh kitail kak, ma kitail kin momouriki met, kin alehdi lapwepen dipatail kan.

“Kowe, ohl me pahn kapwopwoud, kasarawihongehr priesthood. Me ke tepin kasarawihong iei Priesthood en Aaron oh mwein keirdahr nan ohpis koaros me iei—dihken, sounpadahk, oh priest. Eri rahno kohdo me ke warohng en alehdi Priesthood en Melkisedek. Priesthood wet, priesthood ileileo, kawehwehdi ni duwen priesthoodo mwurin koasoandi me keieu sarawi en Koht, de Priesthood Sarawi me idawehn Koasoandi en Sapwellimen Koht Iehroso (tehk Alma 13:18; Helaman 8:18; Doctrine and Covenants 107:2–4). Ke alehdi ohpis de pwukoa nan priesthood. Met ke wia elder men.

“Emenemen kumwa alehdier amwa endaumen. Nan endaumen kumwa alehdi inoupen ehu rahn me pid amwa pweida soutuk. Ahpw mepwukat koaros, ni wiepe ehu, wia mehn kaunop ong amwa pahn kohdo ni pei sarawi wet pwehn katengteng ni duwen ohl oh lih pwopwoud erein ansou oh ong mour soutuk. Met kumwa pahn wiahla peneinei ehu, saledek en mwekid nan kepikipik en mour, en ahniki ansou mwahu sang loaloapwoat oh meiroang en kaipwihdi serihkan pohn sampah oh en kairada irail oh apwalih irail ni keneinei nan arail momour; pwehn kilang irail ehu rahn, duwehte kumwa, en iang towehda tiahk sarawi kan en tehnpas sarawi.

“Kumwa pein kupwurki kohdo oh kadeikehr oh dierekehr me kumwa warohng. Pwehn alehda emenemen nan inoun pwopwoud wia pwukoa lap ehu, ehu me kin kohwahki kapai kan me sohte kak sosohng.”

Ma kitail pahn wehwehki koaros poadoapoad oh padahk kan en doadoahk en tehnpas sarawi, kitail anahne wehwehki dahkot manaman en katengteng. Kitail anahne wehwehki, menda ma ekiste, ia kahrepen kih kan en mweimwei en doadoahngki manaman en katengteng eh nohn kesempwal.

“Sises eri ketiketlahng wasahkis limwahn kahnimw en Sesaria Pilipai, wasao e ahpw keinemwe rehn sapwellime tohnpadahk ko, mahsanih, Dahme aramas akan kin ndinda duwen Nein-Aramas, ihs ih? …

“Saimon Piter ahpw sapeng, patohwanohng, Komwi me Mesaiao, Sapwellimen Koht ieias.

“Sises ahpw ketin sapeng, mahsanih, Meid pai kowe, Saimon, nein Sohn, pwe kaidehkin aramas me kasalehiong uhk mehlel pwoatet, pwe Semei me ketiket nanleng.

“Eri met I ndaiong uhk, pwe kowe Piter, paipalap ehu, oh pohn paipalap wet I pahn kauwada ei mwomwohdiso. Oh mehla sohte pahn kak kalowehdi.

“I pahn kihong uhk kih kan en Wehin Koht: mehkoaros me ke pahn keinapwihdi nin sampah pil pahn keinapwihdi nanleng; oh mehkoaros me ke pahn mweidada nin sampah, e pahn mweimweida nanleng” (Madiu 16:13, 16–19).

Piter me pahn kolokol kih kan. Piter me pahn koledi manaman en katengteng, mweimwei en katengehdi de katengepene pohn sampah de en kamweidpeseng pohn sampah oh e pahn pil duwehte nanleng. Kih pwukat mihmi rehn President en Mwomwohdiso—rehn soukohp, ohl sarawi, oh soun kihda kaudiahl. Manaman sarawi en katengteng mih nan Mwomwohdiso rahn wet. Sohte me kesempwalsang met rehn irail akan me kin wehwehki kesempwalpen manaman wet. Sohte me kin kolkoldi de epwel kesempwal duwehte met. Malaulau ohl me ahniki pwukoa en katengteng pohn sampah ni ansou tehkis—nan ehuehu tehnpas sarawi mie ohl me alehdier kamanaman en kolokol manaman en katengteng. Sohte emen kak alehdi likin sang rehn soukohp, ohl sarawi, oh soun kihda kaudiahl oh President en Mwomwohdiso en Sises Krais en Souleng en Imwin Rahn Akan.

Soukohp Joseph Smith mahsanih me e kin kalapw alehdi peidek “‘Kitail sohte kak komourla ma kitail sohte pahn alehdi koaros tiahk sarawi pwukat, oh soahng kan me duwehte?’ I pahn sapengki, Soh, kaidehn unseklahn komour. Sises mahsanih, ‘Pere tohto mie nan tehnpesen Semei, ma sohte, I sohte pahn ndaiong kumwail me I pahn kohla oh kaunopadahng kumwail deumwail.’ [Tehk Sohn 14:2.] Tehnpas me sansal wasaht konehng en kawehwehdi ong wehi; oh sohte lipilipil aramas me pahn kesepwilda ong tehnpas me keieu ileile anahne momourki kosonned en celestial de kilohri keieu, oh pil kosonnedo ni unsek” (nan History of the Church, 6:184).

Tehnpas Sarawi kan iei poahsoan en kehlail en pali ngehn en Mwomwohdiso wet. Kitail konehng kasik me imwintihtio pahn song en lidere kitail ni duwen Mwomwohdiso oh lidere emenemen kitail ni atail pahn rapahki en iang towehda doadoahk sarawi manaman wet. Doadoahk en Tehnpas Sarawi kin kahrehda dir me kin uhweng pwehki e wia utun kehlail lap en pali ngehn ong Souleng en Imwin Rahn Akan oh ong Mwomwohdiso unsek.

Ni kasarawi en takai pwukekeimw en Tehnpas Sarawi en Logan, Utah, President George Q. Cannon, me ansouo wia kisehn Presidensi Keieu, kihda lepin mahsen wet:

“Koaros takain pwukekeimw me kin kohdi ong Tehnpas Sarawi, oh Tehnpas Sarawi koaros me kin kokouda ni duwen koasoandi me Kauno ketin kasalehda ong sapwellime Priesthood sarawi, kin katikala manaman en Sehdan pohn sampah, oh kalaudehla manaman en Koht oh me pid Koht, kin kamwakid nanleng ni kehlail lap ong kitail, kin kamwerehdi ong pohtail kapai kan en Koht Soutuk kan, oh irail akan me kin pato rehrail” (nan “The Logan Temple,” Millennial Star, Nohpempe 12, 1877, 743).

Ni ansou me towe kan en Mwomwohdiso kin pwunod de ansou me pilipil kesempwal kan kin katoutouihala nan arail madamadau, irail kin kalapw kohla ni tehnpas sarawi. E wia wasa mwahu en apwaliala atail pwunod akan. Nan tehnpas sarawio kitail kak alehdi pepehm en pali ngehn. Wasao, ansoun atail papah nan tehnpas sarawi, kitail kin “sohte mih pohn sampah.”

Ekei pak nan atail madamadau kan kin direkihla kahpwal oh soahng tohto me kin kapkaping nan atail madamadau oh kitail sohte kak madamadau sansal de kilang wasa mwahu. Ni tehnpas sarawio pwelipar me kin kapingada wasa mwomwen kin sohrala, pwoik oh edied kan kin marahrahda, oh kitail kin kak “kilang” soahng kan me kitail sohte kak kilang mwowe oh diar wiepe kan en pidohisang nan atail kahpwal kan me kitail sohte kin kilang mwowe.

Kauno pahn kapaikitailda ni atail pahn iang towehda doadoahk en tiahk sarawi kan en nan tehnpas sarawi kan. Kapai kan me kin kohda sang nan tehnpas sarawi sohte pahn ididiong atail papah nan tehnpas sarawi. Kitail pahn kapaida nan atail doadoahk koaros.

Sohte ehu doadoahk kin wia silepen Mwomwohdiso wet duwehte doadoahk en nan tehnpas sarawi oh ropirop en poadoapoad en peneinei me kin utung doadoahk wet. Sohte ehu doadoahk me kin kamwakele pali ngehn duwe met. Sohte ehu doadoahk me kitail kak wia me kin kihieng kitail kehlail laud. Sohte ehu doadoahk me anahne koasoandi ileile en mour pwung.

Atail doadoahk en nan tehnpas sarawi kin pere oh sile pein kitail oh pil kitail ni duwen atail wia ehu pwihn en aramas.

Eri kohdo ni tehnpas sarawi—kohdo oh alehdi ahmw kapai kan. E wia doadoahk sarawi ehu.