Ia Saunia mo Faamanuiaga o le Malumalu

O loo tusia i malumalu taitasi ia upu “e paia i le Alii.”¹ O lena faamatalaga e faamatala uma atu ai lava e paia le malumalu ma lona faamoemoega. O i latou o e ulu atu i le malumalu e tatau foi ona i ai uiga o le paia.² A o saunia malumalu mo tagata, e manaomia ia tagata e saunia i latou lava mo le malumalu.

E ese lava le malumalu mai isi fale tapuai. E ese mai falelotu, o le malumalu e tapuni i le Sapati ina ia mafai ona auai tagata i le lotu ma faatasi ai ma o latou aiga i lena aso paia. E tatala malumalu i isi aso o le vaiaso mo galuega paia. O le malumalu o le maota moni lava o le Alii, ua faaleoleoina mo sauniga taua e faavavau. O na sauniga e aofia ai papatisoga, faaipoipoga, faaeega paia, ma faamauga.

O malumalu taitasi o se faatusa lea o lo tatou faatuatua i le Atua ma o se faamaoniga o lo tatou faatuatua i le olaga pe a mavae le oti. O le malumalu o se faamoemoega lea o gaoioiga uma, lesona uma, ma laasaga uma e agai ai i luma le Ekalesia. O a tatou taumafaiga uma i le talaiina atu o le talalelei, faaatoatoaina le Au Paia, ma le faaolaina o e ua maliliu e tau atu i le malumalu paia. O sauniga o le malumalu e matuai taua lava. E le mafai ona tatou toe foi atu i le mamalu o le Atua e aunoa ma na sauniga.

I totonu o le malumalu tatou te maua ai se faaeega paia, lea e, talanoaina moni lava, o se meaalofa. E manaomia lo tatou malamalama i lona taua faaleagaga ma le taua o le tausia o feagaiga paia ma tautinoga tatou te faia i le mauaina o lenei meaalofa. O “sauniga [taitasi] o le malumalu e le na o se sauniga e mauaina ai se aafiaga, o se gaoioiga o folafolaga paia.”³

Na tuuina mai i se faaaliga le faaeega paia. O lea la, e sili ai le malamalama i se faaaliga, lea na matua sailia lava ma se loto mama. Na faamalamalama mai e Peresitene Polika Iaga faapea “o o outou faaeega paia o le, mauaina lea o na sauniga uma i totonu o le maota o le Alii, lea e taua mo outou, pe a tea atu ma lenei olaga, e mafai ai ona outou savavali atu i le afioaga o le Tama, e pasi atu i agelu o loo tutu o ni leoleo, … ma maua o outou faaeaga e faavavau.”⁴

E faaaoga i totonu o malumalu taitasi le pule faamau o le perisitua. Na faamalamalama mai e Peresitene Gordon B. Hinckley faapea “e leai se tupu, leai se peresitene o se malo, leai se tagata o soo se faalapotopotoga i le lalolagi lea ua avea ai i tatou e i ai se pule i mea i tua atu o le tuugamau. E leai se fesoasoani mo tagata uma a o lei oo atu i le oti, ae o le faitaulaga sili agamalu, lelei, amiotonu o le na mauaina le pule faamau e mafai ona faamauina i le lagi mea na faamauina i le lalolagi.”⁵

E pei lava ona faavavau le perisitua—leai se amataga po o se gataaga—e faapena foi le pule o lena perisitua.⁶ O se taunuuga, o sauniga ma feagaiga o le perisitua e maoae le tulaga ese i soo se taimi. O le uluai faaaliga na tuuina atu e le agelu o Moronae i le Perofeta o Iosefa Samita na faatatau lea i lenei pule o le perisitua.⁷ I faatonuga na tuuina atu mulimuli ane i le Perofeta e faatatau i le malumalu, na fetalai atu ai le Alii faapea:

“Ia fausia lenei fale i lo’u igoa ina ia ou faaali atu ai a’u sauniga i lo’u nuu;

“Aua ou te loto ina ia faaali atu i la’u ekalesia mea ua natia pea a o le’i faavaeina le lalolagi, o mea tau le augatupulaga o le atoatoaga o aso.”⁸

Ua tatou ola ai i lena tisipenisione. O malumalu, sauniga, feagaiga, ma faamauga ua toefuataiina mai, i le tulaga tonu lava e pei ona valoia. O sauniga o le malumalu ua tuuina mai mo le toe faatasia ma le Alii ma faamau faatasi ai aiga e faavavau. O le usiusitai i feagaiga paia na osia i totonu o malumalu tatou te agavaa ai mo le ola e faavavau—o le meaalofa silisili lena a le Atua i tagata.⁹

Talu ai ona o le malumalu e paia, ua fetalai mai ai le Alii ina ia puipuia mai le faaleagaina. E mafai e soo se tasi ona ulufale atu i ai, o le ua naunau e saunia lelei mo lena faamanuiaga. O le mataupu o le saunia e i ai foi i isi ituaiga gaoioiga. Ou te manatua a o ou laitiiti lava, sa ou fai atu i ou matua ou te fia alu i le iunivesite. Sa fai mai i la’ua e mafai, ae sei vagana lava ua ou galue malosi i a’oga amata ma ia ou ausia ia tulaga uma e manaomia mo le taliaina i le iunivesite. E faapena foi, e tatau ona tatou agavaa mo le taliaina i le malumalu. Tatou te saunia faaletino, faaleatamai, ma le faaleagaga. E iloiloina taitoatasi le agavaa o tagata uma o loo talosaga mo se pepa faataga o le malumalu.

O i latou o e umia ki o le pule ma tiutetauave o le perisitua latou te fesoasoani i le sauniaina o i tatou e ala i le faatinoina o faatalanoaga o pepa faataga o le malumalu. O nei taitai e popole ma fesoasoani ia i tatou e filifili po ua tatou saunia e auai atu i le malumalu. Latou te alolofa i le Alii ma faamautinoaina “ia le faatagaina se mea eleelea e oo mai i totonu o [Lona] fale.”¹⁰ O lea, e faataunuu ai nei faatalanoaga i le agaga o le tali atu o le tagata mo ia lava.

E faapefea ona e saunia mo se pepa faataga o le malumalu? E mafai ona e fesootai ma lau au epikopo, faapea foi ma ou matua, aiga, au peresitene o le siteki, faiaoga, po o le faufautua o le korama. O mea e manaomia e faigofie. I se faamatalaga faapuupuu, e manaomia e le tagata lava ia ona tausia poloaiga a Le ona le maota. Ua uma ona Ia faatuina ia tulaga faatonuina. Tatou te ulu atu o ni Ana malo faaaloalogia.

O le a fiafia le Alii pe afai o le a agavaa tagata matutua uma o le ekalesia mo se—ma umia—se pepa faataga o aoga o le malumalu. “O faatalanoaga … mo pepa faataga o le malumalu, ma [sui o la outou au epikopo] ma sui o la outou au peresitene o le siteki o ni aafiaga taua. Ma, i se isi itu, e mafai ona avea ma se “sauniuniga” mo lena talanoaga matagofie pe a e tu atu i luma o le Faamasino Sili.”¹¹

I le taimi lenei, faatasi ai ma se pepa faataga o le malumalu i lou lima, ua e saunia mo se sauniuniga faaopoopo. Ua e saunia faaletino e ala i laei talafeagai e alu ai i le malumalu. E le o se nofoaga mo ni laei faasamasamanoa. Na faamamafaina mai e perofeta o Aso e Gata Ai le faatauaina e le tagata lava ia o o tatou tino faaletino. E tatau ona matauina faapitoa lava lena tulaga e i latou o e o le a ulu atu i se malumalu paia.¹²

I totonu o le malumalu, e laei papae tagata uma. “O le faatusa o le mama o le paepae e faamanatu mai ai foi ia i tatou le tatau ona mama tagata o le Atua.”¹³ O le matua, ituaiga tagata, gagana—e oo lava i se tofiga i le Ekalesia—e lona lua lo latou taua. Sa ou auai i le tele o sauniga o faaeega paia lea na auai ai le Peresitene o le Ekalesia. O tamalii uma sa i totonu o le potu na tutusa lava le taulimaina e pei foi ona faia i le Peresitene. Sa nonofo faatasi ma na tutusa uma i le silafaga a le Alii. E ala i le tulaga tutusa o laei, ma le auai i le malumalu o loo faamanatu mai ai ia i tatou o le “Atua e le faailoga tagata.”¹⁴

E ulufale atu ia tamaitai ma alii faaipoipo i le malumalu ina ia faaipoipoina mo le olaga nei ma le faavavau atoa. I totonu o le malumalu, e laei ai e tamaitai faaipoipo ni ofu e papae, uumi lima, e talafeagai le mamanu ma le ie, ma e le tele ni teuteuga. E le laeiina e alii ni peleue e tele ni fegi. Na tusia e Peresitene Boyd K. Packer, lea o loo avea nei ma Peresitene o le Korama a Aposetolo e Toasefululua, faapea: “E faafiafiaina le Alii pe a fufulu mama o tatou tino ma laeiina ofu mama, tusa lava po o le a le taugofie o le ofu. E ao ona tatou laei i se ala e mafai ona tatou auai atu ai ma le le faamaina i se sauniga faamanatuga po o se faapotopotoga e aloaia ma faamamaluina.”¹⁵

I le talanoaina o laei o le malumalu, e mafai e tina ma tina matutua ona faaaoga se uunaiga maoae mo le lelei ia latou fanau ma fanau a a latou fanau. Pe a lava lo latou tomai ma tulaga, latou te mafai ai ona tuuina atu ni uunaiga mausali mo o latou aiga. O se meaalofa a se tina o se solosolo na suilimaina po o se isi vaega o laei o le malumalu e mafai ona avea lea ma se faatosinaga malosi i se tasi o le fanau po o se fanau a le fanau e faapelepele i ai.

O le laeiina o le ofusa o le malumalu e faaalia ai le taua o se faatusa maoae ma fai ma sui o se tautinoga faaauau pea. E pei lava on tuuina mai e le Faaola ia i tatou se faataitaiga o Lona gafatia e tumau seia oo i le iuga, o le laeiina o le ofusa o se tasi lea o auala tatou te faaalia ai lo tatou faatuatua ia te Ia ma i Ana feagaiga e faavavau ma i tatou.

Na saunia e le Au Peresitene Sili se tusi i le Ekalesia e uiga i lenei mataupu. Sa latou tusia:

“Ua matauina pea ni faiga o loo faia pea e tagata o le Ekalesia o loo faailoa mai ai o loo i ai nisi tagata e le o malamalama atoatoa i feagaiga na latou osia i le malumalu ina ia laeiina le ofusa e tusa ai ma le agaga o le faaeega paia.

“O tagata o le Ekalesia o e ua faaofuina i le ofusa i totonu o le malumalu ua latou osia se feagaiga ina ia ofuina i o latou olaga atoa. Ua faaliliuina lea faapea ina ia ofuina i totonu i le ao atoa ma le po. … O le folafolaga o le puipuiga ma faamanuiaga e faalagolago lea i le agavaa ma le faamaoni i le tausiga o le feagaiga.

“O le mataupu faavae o le tatau lea ona laeiina le ofusa ae le o se sailia o ni tulaga e aveeseina ai. O lea la, e le tatau ai i tagata ona aveeseina uma po o se vaega o le ofusa ina ia galue ai i le fanua pe nofonofo ai foi i le fale i lavalava masani ai po o ofu taele. E le tatau foi ona latou aveeseina ina ia auai atu ai i ni gaoioiga faafiafia lea e mafai lava ona faia pe a laeiina lelei le ofusa i totonu o ofu e masani ai. Afai e tatau ona aveeseina le ofusa, mo se auauga, e tatau ona toe vave ofuina i se taimi vave lava.

“O mataupu faavae o le tumama ma le ufiufiina faalelei o le tino ia talafeagai o loo faailoa mai i le feagaiga ma e tatau ona puleaina le natura o laei uma e laeiina. O tagata o le Ekalesia ua maua faaeega paia e ofuina le ofusa e avea o se faamanatu o feagaiga paia na latou osia ma le Alii ma o se puipuiga foi e faasagatau atu ai i faaosoosoga ma le tiapolo. O le auala e laeiina ai o se faailoga vaaia lea i fafo o se tautinoga i totonu ina ia mulimuli i le Faaola.”¹⁶

I le faaopoopo atu i le sauniuniga faaletino, tatou te manaomia ia saunia faalemafaufau ma le faaleagaga. Ona o sauniga ma feagaiga o le malumalu e paia, o lea e matua le mafai ai lava ona tatou talanoaina mea e faataunuuina i totonu o le malumalu i fafo atu o le malumalu. O mea paia e manaomia le tausia ia paia.

I lenei fale o le aoaoga, ua aoaoina i tatou i le ala a le Alii. O Ona ala e le o o tatou ala ia.¹⁷ E le tatau ona tatou ofo pe afai o metotia faaleaoaoga e ese mai i na aoaoga tatou te masani ai o loo tatou sailia. O sauniga ma feagaiga o le malumalu sa avea lava ma se vaega taua o le talalelei talu mai le vaitaimi o Atamu ma Eva. I aso anamua, sa faaaogaina ia faatusa e aoao atu ai upu moni loloto, ma o loo faaaogaina lenei metotia faaleaoaoaga i le malumalu i le taimi nei.

O lea, e taua ai, lo tatou mafaufau loloto i faatusa na tuuina atu i le malumalu ma tagai i le mea moni e uiga i ia faatusa taitasi.¹⁸ “O sauniga o le malumalu ua matua faatumulia i uiga faafaatusa ma e maua mai ai mafaufauga aoga ma aoaoga mo le olaga atoa.”¹⁹ O aoaoga o le malumalu e matagofie lava le faigofie ma e matagofie foi. E malamalama i ai i latou o e lei lava se aoaoga, ae e mafai foi ona musuia ai se e matua maualuga lava le aoaoga.

Ou te fautuaina tagata o le ekalesia faatoa o lava i le malumalu e faitau ia faamaumauga i le Bible Dictionary lea e faatatau i le malumalu, e pei o le “Anoint,” “Covenant,” “Sacrifices,” and “Temple.” Atonu e manao foi se tasi e faitau le Esoto, mataupu 26–29, ma le Levitiko, mataupu e 8. O Le Feagaiga Tuai, faapea foi ma tusi a Mose ma Aperaamo i le Penina Tau Tele, o loo faamamafa mai ai le talafaasolopito anamua o le galuega faalemalumalu ma le natura tumau o ona sauniga.

E lua mataupu e matua manaomia lava ona i ai i o tatou mafaufau a o tatou saunia mo le malumalu. O le mea muamua o le feagaiga. E tatau ona tatou manatua o le feagaiga o se folafolaga. O se feagaiga e osia ma le Atua e le tatau ona mafaufauina o se lapataiga ae o se puipuiga. O feagaiga e osia ma Ia e puipuia ai i tatou mai faalavelave.

E le fou lenei mataupu. Afai e fesiligia le tulaga lelei o la tatou sapalai o le vai, mo se faataitaiga, tatou te faamamaina le vai. E faapena foi, o feagaiga paia e puipuia ai i tatou mai faalavelave. Pe a tatou filifili e teena mo i tatou lava mea lelei uma,²⁰ tatou te le aveesea se tulaga faatonuina ma mauaina se mamalu ua na o latou o e ua maua le ola e faavavau e iloa. O le tausiaina o se feagaiga o le malumalu e le faatapulaaina ai ae faatagaina ai. E siitia maualuga atu ai i tatou mai sa tatou lava vaaiga ma le mana. E pei o le eseesega i le va o le tau laalaa i se lotoa palapala ma susu ma le lele i luga o le vateatea i se vaalele tele. O le tausiaina o se feagaiga ma le Atua e le gata ina malupuipuia ai ae faatagaina ai foi.

O le mataupu lona lua e faamamafaina i la tatou sauniuniga faalemafaufau o le Togiola. O le Togiola a Iesu Keriso o le galuega tutotonu lea o le talafaasolopito o tagata uma. O le autu o le ata o le faaolataga. A aunoa ma le Togiola e le i’u, o le a leiloa tagata uma e faavavau. O sauniga ma feagaiga o le malumalu e aoao mai ai le mana faaola o le Togiola.

O le auauna atu i le malumalu e aumaia faamanuiaga mo i tatou i lenei olaga faapea foi ma le faavavau. Na saunoa mai Elder Neal A. Maxwell o le Korama a Aposetolo e Toasefululua faapea o le “galuega faalemalumalu e le o le sola ese mai le lalolagi ae o se faamalosia o lo tatou manao ina ia faaleleia le lalolagi a o tapenaina i tatou lava mo se isi lalolagi e sili atu. O lea la, o le i ai i le maota o le Alii, e fesoasoani ai ia i tatou ina ia tatou o ese mai le lalolagi ina ia mafai ona faia ni suiga se tele i le lalolagi.”²¹

Afai tatou te faamaoni ma faatuatua i lenei olaga, e mafai ona tatou mauaina le ola e faavavau. O le tino ola pea o le ola lea e faavavau. O le ola faavavau e sili atu nai lo le tino ola pea. O le ola faavavau o le mauaina lea o le faaeaga i le lagi pito i maualuga ma ola ai i se iunite faaleaiga. Na folafola mai e le Atua o le faamatalaga o Lana misiona matagofie—“o la’u galuega ma lo’u mamalu lenei”—o le “ia faataunuu le faaofuina o le tagata i le tino ola pea ma le ola faavavau.”²² O Lana meaalofa o le tino ola pea e le totogiina—o se meaalofa maua fua o le faaolataga i tagata ola uma. O le mafai ona ausia o le ola faavavau—e oo lava i le faaolataga—e avanoa mo i tatou e ala i lo tatou usiusitai i feagaiga na osia ma sauniga na maua i malumalu paia a le Atua.

O faamanuiaga o le malumalu e matua taua lava pe a aveesea mai i latou o e pele ia i tatou mai iunite o o tatou aiga ona o le maliu. O le iloaina o le taimi o loo tatou valavala ai ua na o se taimi e le tumau e aumaia ai le filemu lea e sili atu na i lo le malamalama e masani ai.²³ Na tusia e Peresitene Iosefa Filitia Samita faapea, “E ala mai i le mana o lenei perisitua lea na tuuina mai e Elia, ua mafai ai ona faamauina le tane ma le ava, pe faaipoipoina foi mo le faavavau; o fanau ua mafai ona faamauina i o latou matua mo le faavavau; o le mea lea ua faia ai le aiga ia faavavau, ma le mafai ai e le oti ona tuueseeseina tagata o le aiga.”²⁴ O le faamanuiaina i le faamauga e faavavau, ua mafai ai ona tatou feagai ma le oti, o se vaega tatau o le ata sili o le fiafia a le Atua.²⁵

O se vaaiga e faavavau o le a fesoasoani lea ia i tatou e tumau atoa ai ma le faamaoni i feagaiga na tatou osia. Na faamamafaina mai e Peresitene Packer e faapea “o sauniga ma feagaiga e avea ia ma o tatou tusi faamaonia mo le ulufale atu i le afioaga o le [Atua]. Ina ia agavaa e mauaina, o se sailiga lea o le olaga atoa; ina ia tumau ai pea mulimuli ane, o le lu’i lea i le olaga faaletino.”²⁶

O sauniga o le malumalu e le faapitoa na o lo tatou mamalu faavavau ae e faapena foi mo o tatou tuaa ua mavae atu. “Aua o lo latou faaolataga e tatau ma aoga i lo tatou faaolataga,… a aunoa ma i tatou e le mafai ona faaatoatoaina lelei i latou—e faapea foi i tatou pe a aunoa ma o tatou tagata oti e le faaatoatoaina.”²⁷ O auaunaga mo i latou o le a tatou maua ai pea le avanoa e tapuai ai ma le le manatu faapito i le malumalu i le tuuina atu o galuega e fai ma sui e pei ona mamanuina i le ala a le Alii a o Ia faatinoina le Togiola e faamanuiaina ai tagata o e o le a soifua mai.

E mautinoa lava lo tatou feiloai atu i se aso i lo tatou Matai ma tutu i Ona luma o le nofoa faamasino. O loo aoaoina i tatou e le mau “o le leoleo o le faitotoa o Le Paia o Isaraelu lea; na te le tofia ai se auauna; e leai foi se isi ala na o le faitotoa; aua e le mafai ona olegia o ia, o lona suafa o le Alii le Atua lea.”²⁸ O le a fuafuaina e le Alii Lava Ia pe na tatou faamaoni i feagaiga na tatou osia ma Ia i le malumalu ona agavaa ai lea mo faamanuiaga matagofie na Ia folafola mai i e e tausia a latou feagaiga.

E aumaia ia i tatou e lenei vaaiga le malosi e manumalo ai i tofotofoga o le olaga. Na saunoa mai Peresitene Packer e faapea, “O le faamoemoega autu o mea uma tatou te aoaoina atu o le faatasia lea o matua ma fanau i le faatuatua i le Alii o Iesu Keriso, ia latou fiafia i le aiga, faamauina i se faaipoipoga e faavavau, fesootai atu i o latou augatuaa, ma mautinoa le faaeaina i le afioaga o lo tatou Tama Faalelagi.”²⁹

O malumalu taitasi e avea o se faatusa o lo tatou auai i le Ekalesia, o se faailoga lea o lo tatou faatuatua i le olaga pe a mavae le oti, ma o se laasaga i le mamalu faavavau mo i tatou ma o tatou aiga. Ou te tatalo ia saunia tagata taitasi o le Ekalesia mo faamanuiaga matagofie o le malumalu.